35
reydə gələndə Cavanşir qardaş onu həmişə kababa göndərir. Üz-üzə oturmuşdular. Tosu sıxılırdı,
büzüşürdü, Ərkinazın üzünə çox baxa bilmirdi, gözlərini stolun üstünə dikirdi. Qara, dağınıq
saçlarla dövrələnən ağ üzün məlahəti, təravəti, ala gözlərin təmizliyi, duruluğu, çəhrayı donun
sıxdığı sinə, sinənin doluluğu, qabarıqlığı, şana barmaqların, şümşad biləklərin incə tərpənişi,
püstə dodaqların qönçə sıxımı, qönçə düyümü, gül açılışı, ətin saçımı onu utandırırdı, öz tayı-
bərabəri olmayan bir qızla bugünkü yoldaşlığı Tosunu acı almaya döndərirdi. – Tosu, adama
neçə kabab yeyək? Abır, həya sıxıntısı Tosunu qurcuxdurdu, üzünə təndir istiliyi, ürəyinə ocaq
yanğısı gətirdi. Dili dolaşdı. Dilinin dolaşığını çətin açdı: – Mən yemirəm. – Sən yeməsən, mən
də dilimə vurmaram. Tosunun o qədər pulu hardaydı!.. Cibində bircə üçlük qalmışdı, o da bircə
kilo çörəyin haqqını ancaq ödəyirdi. Süfrə xərcini kişi çəkməzdimi, oğlan qızı qonaq
eləməzdimi? O özünə ilk dəfə nifrət etdi, acizliyini ilk dəfə duydu, dünyadan, taledən ilk dəfə
küsdü: niyə onun da cibində çoxlu pul olmasın, belə yerdə xərcləməsin? Niyə onun gücü belə
xırda şeylərə də çatmasın? Ürəyindən bir təsəlli qalxdı, nifrətin acısını tez yuyub apardı:
səkkizinci sinfi təzə bitirməyibmi? İşə, işləməyə, pul qazanmağa birinci dəfə gəlməyibmi? Kimin
cibində havayı pul olur ki!.. Hamı zəhmət çəkmirmi, zəhmət çəkə-çəkə aldığı pulu xərcləmirmi?
Tosu dillənmədi. Ərkinaz barmağını divardakı düyməyə uzatdı. Aradan çox keçmədi ki, totuq bir
qız gəldi. Sifəti dəm çaydanı kimi yupyumru, dopdolu. Fındıqburun idi. Gülümsünəndə gözləri
itib-batırdı. Danışanda qalın dodaqları güclə aralanırdı. O, Tosuya baxıb gülümsədi, ondan ağlı
bir şey kəsmədi, yönünü Ərkinaza çevirdi. Ərkinaz:
– Fındıqburun, – dedi, – hələlik iki kabab, göy-göyərti, salat, iki yüz də konyak...
Fındıqburun: «Baş üstə!» deyib dabanı üstə geri fırlandı. Elə həmin anda da qayığın motoru
avtomat kimi guruldadı.
– Ələmdar gedir, – deyə Ərkinaz dirsəklərini stola dayayıb ağ, qarğı barmaqlarını altdan
yuxarı saçlarına sancdı. – Nə tez hazır oldu? – Dodaqlarına təbəssüm qondu. – O dəfədə alaçiy
aparmışdı, kapitan geri qaytardı, təzədən bişirtdi. İndi də elə olsa... – Təbəssüm yanaqlarına sarı
qaymağı götürülmüş dümağ süd üzünə oxşar buxağına yayıldı. Sonra o güldü, sədəf dişlərinin iki
qatar boyunbağı düzümü göründü, sinəsi uçundu, hər sözü də gülüşün bir qanadında uçub gəldi:
– Nə isə... Tosu hələ də key kimi idi. Dəniz onu yaman tutmuşdu, ağlı-başı yaxşı
işləmirdi. Gözlərində də bir torluq, ala-toranlıq qalmışdı, sanki buludlu payız axşamında, ya da
yağmurlu yaz səhərindədir, gün çıxmayıb, yerlərin, göylərin qaralığı havadan silinməyib. İndi
ona bəzən elə gəlirdi ki, qarşısında əyləşən bu qızı da elə bir ala-toranlıqda görür, yuxuda görür.
Aşxanaya gəlmək, oğlanı qonaq eləmək, içki sifariş etmək qız ismətidirmi, qız həyasıdırmı? O,
Tosudan heç utanmır da, çəkinmir də, elə bil yanındakı uşaqdır, o da əlindən tutub gəzməyə,
gəzdirməyə çıxıb. Ərkinaz bəzən uzaqlaşırdı, uzaqlaşa-uzaqlaşa şəklə dönürdü. Lakin bu şəkil
kirpik çalırdı, gülümsünürdü. Bu şəklin ala gözlərində bir istək ağdan qaraya, qaradan ağa
uçurdu, çırpınırdı, kirpiklərin çəpərindən kənara çıxa bilmirdi. O dişlərin boyunbağı düzümündə
bir gülüş şəkərlənirdi, şirinləşirdi, ağ süd buxaqda qaymaq tuturdu, çəhrayı donun alovunda
yanan ağ sinəyə süzülürdü. Birdən də bu şəkil şəkillikdən çıxır, lap yaxınlaşırdı, Tosu onun
sinəsindəki quş çırpıntısını da görürdü. Tosu yüz qram konyak içəndən sonra bu şəkil bir yaşıl
tülə büründü, püstə dodaqları necə tərpəndisə, hiss etmədi, ancaq səsini eşitdi. Bu səs Tosunun
başına yağdı, kefikök adamın başına yağan kəpək qar kimi yağdı. Tosu bu kəpək qarın kəpənək
uçuşunda, kəpənək qonuşunda yatmaq istədi. Bu yer-yataq necə yumşaq olardı, necə rahat olardı.
Bu kəpənəklər bir ucdan qonardı onun üstünə, özü də illər boyu, hətta ömrü boyu qonardı üstünə,
Tosu heç bir ağırlıq hiss etməzdi, əksinə sanardı ki, dünya ipəyə dönüb, həyat məxmərə dönüb.
Ərkinaz yaşıl tüllü əlini uzatdı, yaşıla çalan konyakı Tosunun qədəhinə süzdü. – Bunu da iç,
Tosu.
– Bəs sən niyə... Tosunu göy öskürək tutdu. Ərkinaz qalxıb onun kürəklərini oxşadı: –
Hamısı öz payın olsun, – dedi. – Keçib öz yerində oturdu. – Onu da iç, sinəni bassın. Ərkinazın
gözlərində yuxulu bir xumar vardı. Sanki üzü bu xumarın beşiyi idi, o beşikdə bir körpə
yatmışdı, çaylar, bulaqlar layla deyirdi, dağların sərinliyi bu laylanı bu beşiyə, bu körpəyə, bu
xumara ətir kimi çiləyirdi. Tosu «üzən şəhər»də gəzəndə də, qayıqla geri qayıdanda da, öz
36
kayutuna keçib çarpayıya uzananda da hər şeyi yamyaşıl gördü. Necə təmiz idi, necə sərin idi bu
yaşıllıq. Tosu yatanda da yaşıl yuxular gördü. Gördüyü yuxuların hamısında Ərkinaz vardı.
Birində bir yaşıl göl, Ərkinaz da yaşılbaş, üzürdü bu yaşıl göldə. Tosunu çağırırdı. Tosu göldə
boğulurdu, batırdı, amma ölmürdü, o biri yuxuya keçirdi. İkinci yuxuda Ərkinaz uçurdu. Tosu da
qanadlanırdı, göylərə qalxırdı. O, səmalara yüksələndə Ərkinaz yerə enirdi, quşluqdan,
pərvazlıqdan çıxırdı, həmincə Ərkinaz olurdu, Tosunu səsləyirdi, Tosu isə qanadlarını yığa
bilmirdi, qıra bilmirdi, uçub Ərkinazın başının üstündən keçirdi. Yerdən bir ah qopurdu. Bu ah
yaşıl dünyanı quru küləşlik təki yandırırdı. Tosu da yanırdı, amma yenə də göylərə çəkilən
yaşıllığa doğru havalanırdı. Bu alov ora da çatırdı, Tosunu külə döndərirdi, Tosu yenə də
ölmürdü, özünü Ərkinazla bir qayıqda tək görürdü. Haradansa mahnı gəlirdi, haradansa quşlar
gəlirdi. Quşlar oxuyurdu, Ərkinaz oxuyurdu, Tosu da oxuyurdu. Bu quşlar mahnıdan doyurdular,
uçub gedirdilər, təzə dəstələr gəlirdi, həmin mahnını onlar da oxuyurdular. Demə, bu quşların da,
Ərkinazla Tosunun da yemək-içməyi mahnılar imiş. Demə, onlar belə yaranıbmış. Demə, ömür-
gün mahnılarla keçirmiş, ruh nəğməsiz qalanda tez acırmış, tez qocalırmış...
– Tosu!.. Onu bu yaşıl yuxulardan Ələmdarın səsi ayırdı.
– Ə, bu necə oxumaqdır? – əlini əlinə vurub şaqqıldadı.
– Le-lü eləyirsən, ağzın da elə əyilirdi ki, Allah göstərməsin. Sən ayılanacan, düzü,
qorxdum. Dedim, birdən ağzın gerçəkli əyilmiş olar. Yatdığı yerdəcə ağzı əyilənləri çox
görmüşəm. Allaha çox şükür, səninki yuxuda əyilirmiş. Ələmdar soyunub özünü çarpayıya atdı.
Sonra qalxıb aynaların pərdəsini çəkdi, kayutda bir gecə yaratdı, yatağına uzandı.
– Tosu, – dedi, – sənə bir söz desəm, ağzından qaçırmazsan ki? Tosu hiss elədi ki, bu
«əmanətdə» xəyanət var, kal dilləndi: – Nə deyəcəksən ki? Pərdələr aynaların qabağını hər necə
tutsa da içəri xeyli işıq süzülürdü. Tosu onun dirsəkləndiyini gördü.
– Sənin xeyrinə bir neçə söz. O da dirsəkləndi: – Kim öz xeyrindən qaçar ki? – Ərkinaz
burda hamını dişinə vurmuşdu, bircə sən qalmışdın, səni də çənginə keçirdi. Axırda gülünc yeri
olmaq istəmirsənsə, ondan qıraq gəz. Tosu dikəlib oturdu. Əlini yastığa atdı. Ona elə gəldi ki,
eşitdikləri insan dilindən çıxmır, qara bir quyudan gəlir, yastıqla həmin qara quyunun ağzını
qapayacaq, ağ yuxularına, göy mahnılarına yağdırılan böhtanları susduracaqdır. Ələmdar
Tosunun hirsləndiyini duydu, özünü çəkdi: – Sənin kimi az yatıb çox yuxu görənə rast
gəlməmişdim. Bir qarın yemək-içmək gözlərini tez tutdu? Uşaqsan, ona görə. Vaxt gələr, bu
qoca Ələmdarın dediklərinə inanarsan. – Arxası üstə uzandı. – Bir söz dedim, deməmiş olum,
qələt eləmişəm. Ələmdar sussa da kayutda bir səs gəzdi, bir səs dolandı, hər gəzişində Tosunun
ürəyini bir dəfə çaldı, hər dolanışında Tosunun boynuna bir dəfə sarındı. Qapı döyüldü. Səs
gəldi: – Ələmdar, dostunu kep çağırır. Ələmdar dillənmədi, Tosu da bu «kep» sözündən heç bir
şey anlamadı. «Dostu – mənəm, bəs kep?» – deyə düşündü, Ələmdarın üzünə baxdı. O da
gözlərini yummuşdu, elə bil çağıran ona heç nə deməmişdi. – Məni çağırır? Ələmdarın ağzı
acıqla açıldı, o: – Hə, – dedi, – hə!.. Tosu qısıla-qısıla: – Kim? Ələmdarın gözləri qaranlıqda
ağardı: «kep də! Kapitan – deyib yönünü o yana çevirdi, elə bil bu dəfə cavabı gözləri vermişdi,
özü də sözlərinin qanını içib, ətini yeyib sümüyünü itin qabağına tullayan kimi Tosunun üstünə
atmışdı. Tosunu bu çağırış da qorxuzdu: «Yox, kapitan da mənə deyəcək ki, o qızla «üzən
şəhər»ə nə üçün getmisən, nə üçün içmisən? «Danış görüm başına nə oyunlar açdı». Ərkinaz
yəni elələrindəndi? Oğlanı eləsinin qabağında sındırarlarmı? Axı o gecə Ələmdarı məcbur etdi
ki, Ərkinazdan üzr istəsin. Bu qanacağı, hörmətli adama göstərmirlərmi?!» Tosu növbətçi
matrosun bələdçiliyi ilə kapitanın kayutunu tapanda da, qapını taqqıldadıb içəri girəndə də,
Cavanşirin göstərdiyi kətildə əyləşəndə də belə suallar, fikirlər içində idi. Kapitanın ilk sözü, ilk
sorğusu onu soyuq şübhələrin əlindən aldı. – Dənizi sevirsənmi? Cavanşir bu sözləri Tosunu təzə
qorxulara saldı: «Yox» desə, bildirməzmi ki, onda özünə qıraqda ip tap? Şəhərdə hara gedəydi:
kimin yanına gedəydi? Yenə kəndəmi qayıdaydı? Atası ona nə deyərdi, Nazlı onun üzünə necə
baxardı? Deməzdilərmi, a evdən küsüb gedən gədə, gördünmü çöllərdə baş saxlamaq necə
çətindir? Bəyənmədiyin zibilə pəpə deməyəmi gəldin? Gördünmü buranın yavanı necə