LORD QORİNQ. Soruşmaq həmişə lazımlıdır, cavab vermək isə həmişə vacib
deyil.
Meyson gəlir.
SER ROBERT ÇİLTERN. Mister Trafford otağındadır?
MEYSON. Bəli, ser.
SER ROBERT ÇİLTERN (yazdığı kağızı konvertə qoyub onu ehtiyatla
yapışdırır). Ona deyin ki, bu məktubu dərhal şifrləsin və təcili göndərsin.
Yubanmasın.
MEYSON. Oldu, ser.
SER ROBERT ÇİLTERN. Ah! Dayanın, onu bura verin! (Konvertin üstündə nəsə
yazır, onu təzədən Meysona qaytarır.)
Meyson məktubu alıb çıxır.
SER ROBERT ÇİLTERN. Görünür, o qadının baron Arnheymə güclü təsiri
varmış. Bu nəymiş, görəsən?
LORD QORİNQ (gülərək). Mənim üçün də maraqlıdır.
SER ROBERT ÇİLTERN. Mən ölənədək onunla mübarizə aparacağam. Təki
arvadım bu barədə heç nə bilməsin!
LORD QORİNQ (ucadan). Siz onunla bütün hallarda mübarizə aparmalısınız!
SER ROBERT ÇİLTERN (pərişan-pərişan). Əgər arvadım bilsə, mübarizənin də
mənası olmayacaq! Hə, bax Vyanadan cavab alan kimi sizə deyəcəyəm. Bu bir
şansdır, ümid azdır, amma hər halda, ümidsizlik də yoxdur. Mən o qadınla onun
öz silahıyla vuruşacağam. Yalnız belə ədalətli olar. Əminəm ki, o qadının keçmişi
var.
LORD QORİNQ. Gözəl qadınların əksəriyyətinin keçmişi olur. Məsələ bundadır
ki, necə keçmişi olur! Keçmişin də paltar kimi dəbi olur. Ola bilsin ki, missis
ÇİVLİin keçmişi çox açıq-saçıq olub, indi o şeylər dəbdədir. Bundan başqa,
əzizim Robert, missis ÇİVLİi qorxudacağınıza çox da bel bağlamayın. Mənim
bildiyimə görə, o, qorxaq qadın deyil. O, bütün kreditorlarını üstələyib, onları
əzib gəlib çıxıb və o, heç vaxt özünü itirmir.
SER ROBERT ÇİLTERN. Ah! Mən indi ümidlə yaşayıram. Saman çöpünə də əl
ataram. Mən gəmisi batan adama bənzəyirəm. Su artıq dizimə qədər qalxıb,
ətrafda isə dəhşətli fırtına var. Susssss! Arvadımın səsi gəlir!
Ledi Çiltern daxil olur, gəzinti paltarında.
LEDİ ÇİLTERN. Axşamınız xeyir, lord Qorinq!
LORD QORİNQ. Axşamınız xeyir, ledi Çiltern! Parkda idiniz?
LEDİ ÇİLTERN. Yox! Mən elə indicə Liberal Qadın Assosiasiyasından gəlirəm.
İclasdaydım. Yeri gəlmişkən, Robert, sənin üçün orada yaman əl çaldılar. (Sonra
üzünü lord Qorinqə tutur.) Hə, indi çay içmək istəyirəm. Siz hələ buradasınız,
eləmi? Bizimlə çay içərsinizmi?
LORD QORİNQ. Bir az oturaram, təşəkkür edirəm.
LEDİ ÇİLTERN. İndi gəlirəm, qoy şlyapamı çıxarım.
LORD QORİNQ (çox ciddi). Xahiş edirəm, şlyapanızı çıxarmayın. Sizə çox
yaraşır. Gözəl şlyapadır. Ümidvaram ki, Liberal Qadın Assosiasiyası şlyapanızı
sürəkli alqışlarla qarşılayıb.
LEDİ ÇİLTERN (gülümsəyərək). Bizim bir-birimizin şlyapalarına göz
yetirməkdən savayı görüləcək daha vacib işlərimiz var, lord Qorinq.
LORD QORİNQ. Doğrudan? O, hansı işlərdir belə?
LEDİ ÇİLTERN. Ah! Çox darıxdırıcı, çox cəlbedici və çox faydalı işlərdir!
Məsələn, sənaye qanunvericiliyi haqqında, qadınların hüquqları, səkkiz saatlıq iş
günü, parlament seçkiləri... bir sözlə, sizin üçün çox maraqsız görünən bütün
məsələlər. Lord, bax biz bu məsələlərdən danışırıq.
LORD QORİNQ. Və heç şlyapalardan bir kəlmə belə danışmırsınız, hə?
LEDİ ÇİLTERN (acıqlı). Heç vaxt! (Qapıya sarı gedir.)
SER ROBERT ÇİLTERN (lord Qorinqin əlini tutur). Artur, siz mənim əsl
dostumsunuz! Mənə həmişə yaxşı dost olmusunuz! Əsl dost!
LORD QORİNQ. Robert, mən hələ sizin üçün nə etmişəm ki! Sizə hələ heç bir
kömək edə bilməmişəm! Özüm də buna pərişanam.
SER ROBERT ÇİLTERN. Siz həqiqəti söyləməkdə mənim yardımçım oldunuz.
Bu, elə özü də, bir növ, köməkdir. Mən hələ heç vaxt bunu kimsəyə deməmişdim,
bu, mənə əzab verir, qəlbimi parçalayırdı...
LORD QORİNQ. Həqiqət elə bir şeydir ki, mən həmişə ondan mümkün qədər tez
qaçmaq istəyirəm. Çox pis vərdişdir. Mənə bəzən klubda yaşlı üzvlər arasında
ziyan gətirir. Onlar güman edirlər bu, ondan irəli gəlir ki, mən özüm haqqında çox
yüksək fikirdəyəm. Bəlkə də, bu belədir.
SER ROBERT ÇİLTERN. Artur, əzizim, Allah özü şahiddir ki, mən həqiqətin
tərəfdarı olmuşam həmişə! Ah, mən necə istəyirdim həqiqəti deyim... Mən
həqiqətlə, düzgünlüklə yaşamağı necə istəyərdim! Namusla yaşamaqdan gözəl və
uca nə var axı! (Ah çəkir, qapıya tərəf gedir.) Artur, biz tezliklə görüşəcəyik,
eləmi?
LORD QORİNQ. Əlbəttə! Nə vaxt istəsəniz! Əgər maraqlı bir şey çıxmasa
qarşıma, bu gün axşam subaylar balına gedəcəyəm. Amma sabah səhər mən sizə
baş çəkərəm. Əgər məni bu gecə yenə görmək istəsəniz, onda Kurzon stritə
məktub göndərin, gəlim.
SER ROBERT ÇİLTERN. Təşəkkür edirəm!
Robert qapının ağzına çatanda buduardan1 ledi Çiltern çıxır.
LEDİ ÇİLTERN. Robert, sən gedirsən?
SER ROBERT ÇİLTERN. Əzizim, mən məktub yazmalıyam...
LEDİ ÇİLTERN (üstünə yeriyir). Robert, çox gərgin işləyirsən. Heç özün barədə
düşünmürsən. Sən çox yorğun görünürsən.
SER ROBERT ÇİLTERN. Boş seydir, əzizim, keçib-gedər. (Arvadını öpür və
çıxır.)
LEDİ ÇİLTERN (lord Qorinqə). Xahiş edirəm, əyləşin. Mən çox şadam ki, siz
gəldiniz. Mən sizinlə söhbət etmək istəyirəm... əlbəttə, şlyapa barədə yox, heç
Liberal Qadın Assosiasiyası barədə də danışmaq istəmirəm... Birinci məsələ sizi
çox maraqlandırır, ikinci isə az...
LORD QORİNQ. Siz mənimlə missis ÇİVLİ barədə danışmaq istəyirsiniz?
LEDİ ÇİLTERN. Bəli, tapdınız. Ötən gecə siz gedəndən sonra mən anladım ki, o
qadın həqiqəti söyləyir. Təbii, mən dərhal Roberti məcbur elədim ki, sözünü geri
götürsün. O qadına yazsın ki, təklifdən imtina edir.
LORD QORİNQ. Hə, Robert mənə dedi.
LEDİ ÇİLTERN. Əgər Robert ona verdiyi vədi yerinə yetirsəydi, onda bu, onun
nüfuzuna ilk ləkə olardı. Robert təmiz və saf olmalıdır. O, başqa kişilər kimi
deyil. O, başqaları kimi hərəkət edə bilməz. (Lord Qorinqə baxır, o isə susur.) Siz
mənimlə razı deyilsiniz məgər? Siz ki Robertin ən yaxşı dostusunuz! Siz bizim ən
yaxın dostumuzsunuz! Bizim ikimizdən başqa Roberti daha yaxşı kim tanıya bilər
ki? Heç kəs! Onun məndən və sizdən gizlin heç bir sirri yoxdur!
LORD QORİNQ. Əlbəttə, əlbəttə! Onun məndən gizlin bir sirri yoxdur. Hər
halda, mən biləni, bu belədir.
LEDİ ÇİLTERN. Bəlkə, mən Robert haqqında düz fikirləşmirəm, hə? Bilirəm,
mən yanılmıram. Amma siz mənimlə açıq danışın.
LORD QORİNQ (düz onun gözlərinin içinə baxaraq). Lap açıq danışım?
LEDİ ÇİLTERN. Əlbəttə! Gizlətməyə nə ehtiyac var ki?
LORD QORİNQ. Elədir, ehtiyac yoxdur! Lakin mən düşünürəm ki... daha keçib,
icazə verin, açıq danışım... real həyata gələndə...
LEDİ ÇİLTERN (gülümsəyir). ...həmin o real həyat barədə siz çox az şey
bilirsiniz, lord Qorinq...
LORD QORİNQ. Şəxsi təcrübə baxımından düzdür, heç nə bilmirəm... lakin
müşahidələrim mənə bəzi şeyləri deyir. Məncə, praktik həyatda uğur – söhbət
böyük uğurdan gedir – bir qədər qarışıq məsələdir. Daha doğrusu, onun və
şöhrətin qazanılması yollarında bir qədər qarışıqlıq, dolaşıqlıq olur. Əgər insan
zirvəyə qalxmağa qəti qərar veribsə, onu heç kəs saxlaya bilməz. Əyri yolla
Dostları ilə paylaş: |