71
IV BÖLÜM
TELEXƏBƏRİN HAZIRLANMASI /
KADRARXASI MƏTN
Reperaundun müxtəlif formaları var, yəni ayrıca
interküyün sözlü və səsli şəkilləri var (müsahibə
fraqmenti, kiminsə atmacası, şüar, xışıltı, gurultu,
tappıltı və s.). Çəkilmiş videomaterialı
gözdən keçirən
jurnalist (reportyor) istifadə edəcəyi görüntülərin
zaman açarını yazır və süjetdə yer alacaq sinxron
parçalarını müəyyənləşdirəndən sonra montaja hazır
duruma gəlir. İndi artıq kadrarxası mətni hazırlamaq
və həmin mətndə reperaund üçün pauzaları nəzərdə
tutmaq olar. Montaj zamanı reperaundun səs səviyyəsi
reportyorun səs səviyyəsində verilir (başqa sözlə,
2-ci səs cığırının səviyyəsi 1-ci cığırın səviyyəsinə
yüksəldilir və bu səs səviyyəsi reperaunda ayrılan za-
man boyu, tutalım, 5-8 saniyə davam edir).
Xəbər aparıcısı üçün bağlayıcı mətnlərin yazılması.
Belə mətn tiplərini, adətən, xəbər proqramını efirə
verən buraxılış qrupu hazırlasa da, bu zaman reportyo-
run da üzərinə bəlli öhdəliklər düşür. Hansı təcrübənin
əsas
götürülməsinə baxmayaraq, xəbər reportyoru
öz süjetinin bağlayıcı mətnlərini – aparıcı üçün “giriş
sözü” və “son sözü” hazırlamağı özünə borc bilməlidir.
Bu, olay və ya problemin mahiyyətcə açıqlanmasına və
bütün xəbər xidməti əməkdaşlarının baş verənlərdən
xəbərdar olmasına yarar saxlayır.
Aparıcı üçün bağlayıcı mətnləri məhz reportyo-
run hazırlamasını başqa səbəblər də doğruldur. İş
burasındadır ki, telexəbər xidməti hər hansı
olay barədə ilkin məlumatı, adətən, informasiya
agentliklərindən alır. Azərbaycan reallığını əsas
götürsək, bir gerçəyi gözardı edə bilmərik: xəbər
agentliklərində çalışanlar olay barədə məlumatı, çox
vaxt, telefonla və ya uyğun rəsmi qurumlardan alırlar.
Belə məlumtlar ya çox ümumi sözlərlə yazılır, ya heç də
həmişə dəqiq olmur. TV reportyoru isə xəbər agentli-
yinin məlumatına dayanaraq olayın izinə düşür, olay
yerinə baş çəkir və olayın anlaşılması üçün çox önəmli
əlavə bilgilər əldə edir. Ən başlıcası isə,
görüntülü
xəbər hazırlanır və olaya qatılanların gözü ilə həmin
olayı dəyərləndirmək mümkün olur.
Reportyorun xəbər aparıcısı üçün yazdığı bağlayıcı
mətnin üstün özəllikləri:
• xəbər süjeti bütövlükdə buraxılışa daha üzvi bağlanır
və onun təbii parçasına çevrilir;
• üslubi tamlıq qorunur;
• xronometraj baxımından süjetdən çıxarılan məlumat
bağlayıcı mətndə əksini tapır;
• olayın mahiyyəti daha dolğun açıqlanır.
Xəbər süjetindən öncə səslənən bağlayıcı mətnə
örnəklər:
Pis örnək:
Milli Məclis “Təhsil haqqında Qanun”
layihəsinin müzakirəsini davam etdirir...
Yaxşı örnək:
Milli Məclis “Təhsil haqqında Qanun”
layihəsinin 2-ci oxunuşuna başlayıb. Bugünkü müzakirə
təhsildə aspirantura pilləsinin qalıb-qalmamasına aydınlıq
gətirdi...
Xəbər süjetindən sonra səslənən bağlayıcı mətnə
örnəklər:
Pis örnək:
Bir il öncə bu qanun layihəsi ilk dəfə
müzakirəyə çıxarılmışdı...
Yaxşı örnək:
Azərbaycan təhsildə Avropa standartlarının
tətbiqinə başladı. Bu gedişlə ilk addım – aspiranturanın
ləğvi ola bilər...
Kadrarxası mətndə sitat gətirilməsi. Öncəliklə yadda
saxlamağa dəyər ki, telesüjetdə sitat gətirməkdən
və ya sitat səsləndirməkdən,
imkan olduqca, qaç-
maq lazımdır. Olaya aydınlıq gətirmək və ya olaya
baxışlar arasında balans yaratmaq üçün sitat gətirmək
qaçılmaz olanda, mətn qrafiklərindən faydalanmaq
daha məqsədəuyğundur. Bu zaman sitat müəllifinin
fotosunu, kimliyini göstərmək və sitat mətnini yazıb
səsləndirmək işə peşəkar yanaşmaq örnəyi sayıla bilər.
Tutalım, korrupsiya ilə mübarizə komissiyasının sədri Na-
dir Kamalov (misal şərtidir) jurnalistlərə müsahibəsində:
“Hərdən məndə elə təsəvvür yaranır ki, yalnız maymaq,
bir də tənbəl məmurlar rüşvət almırlar,” – fikrini dilə
gətirib. Kadrarxası mətndə bu sitata yer ayırmaq üçün
ekranın sol tərəfində Nadir Kamalovun fotosu verilir (yaxşı
olar ki, müsahibə anında çəkilmiş foto olsun). Həmin
fotonun altında sitat müəllifinin adı və soyadı, eləcə
də vəzifəsi yazılır. Sağ tərəfdə isə sözügedən müsahibə
parçası titrlərlə göstərilir və reportyor yox, başqa bir adam
bu sitatı səsləndirir.
DİQQƏT!
Reperaund – reportyor şərhi fonunda deyil, ayrıca
səslənən interküy daha çox birbaşa informasiyanın
çatdırılmasına yox, reportyorun öncə və sonra
söylədiyi sözlərin inandırıcı alınmasına xidmət edir!
72
IV BÖLÜM
TELEXƏBƏRİN HAZIRLANMASI /
KADRARXASI MƏTN
“Hər hansı sitatı reportyorun özü səsləndirə bilərmi?”
sualının, çox güman, tək cavabı var: reportyor
stəndapında belə səsləndirmə mümkündür və həmin
fraqmenti təxminən bu şəkildə gerçəkləşdirmək olar:
Reportyor kadrda:
“Korrupsiya ilə Mübarizə
Komissiyasının sədri Nadir Kamalov səhər qəzetlərində
yer alan müsahibəsində bildirib ki... olduğu kimi
oxuyuram... “Hərdən məndə elə təsəvvür yaranır ki, yalnız
maymaq, bir də tənbəl məmurlar rüşvət almırlar”. Sitatın
sonu”.
Kadrarxası mətndə şəxs sonluqlarından istifadə.
Önəmli incəliklərdən biri də kadrarxası mətni yazarkən
reportyorun həmin mətndə “biz”, “fikrimizcə”,
“əminik”, “düşünürük” və s.
sözləri işlədib-işlətməməsi
məsələsidir. Bənzər sözlərdən yararlanmaq olmaz, çün-
ki baş verən olayla bu olaya münasibəti qarışdırmaq
peşəkar reportyora yaraşmaz. Sadaladığınız sözlər
jurnalistin (reportyorun) qərəzli münasibəti kimi
qavrana və deyılənlərin identifikasiyasına – dəqiq
eyniləşdirilməsinə imkan verməyə bilər. “Biz” deyərkən
kimi nəzərdə tutursunuz və bu halda “siz” kimdir?
“Əminik” deyərkən məhz kimlərin əminliyindən söhbət
gedir və bu halda “əmin olmayanlar” kimlərdir? və
s. və i.a. Sadaladığınız sözlərdən bütövlükdə TV və
ya konkret proqramın rəhbərliyi adından və bəlkə
də, jurnalistin özəl – “bunu da bilmək maraqlı olardı”
qəbilindən reportajında yaralanmaq olar, ancaq bu hal-
larda da daha peşəkar davranış həmin sözlərin yerinə
proqramın və ya çalışdığınız TV-nin adını çəkməkdir
(“Xəbərlər” proqramı bu qənaətdədir ki”, “Cənub
TV” o fikri bölüşür ki” və ya “Sizin
reportyor düşünür
ki”). Bu məsələləri iş yerinizin “Üslub soraqçası”nda
tənzimlənməyə çalışın.
Kadrarxası mətndə rəqəmlərin verilməsi. Müxtəlif
rəqəmləri eşidib yadda saxlamaq həmişə çətinlik
yaradır. Özəlliklə TV-yə baxan adamın fikri
görüntülərdə olduğundan reportyorun səsləndirdiyi
rəqəmlər, adətən, diqqətdən kənarda qalır. Buradan o
nəticəyə gələ bilərik ki, k/a mətndə, imkan daxilində,
rəqəmlərə yer vermək lazım deyil. Düzdür, tutalım,
manatın məzənnəsi barədə süjet hazırlayanda və
milli valyutanı avro və ya dolların kursu ilə müqayisə
edəndə, rəqəmləri söyləmək mümkündür. Ancaq
bu halda da söylənən mətni uyğun görüntülərlə
uzlaşdırmaq şərtdir. Başqa sözlə, manatın
məzənnəsi
barədə konkret rəqəmləri səsləndirərkən uyğun
valyuta kurslarını əks etdirən tabloları göstərmək
məqsədəuyğundur.
Jurnalist mətnində mürəkkəb sayları işlətməkdən
qaçmaq üçün rəqəmlərin yuvarlaqlaşdırılması üsu-
lundan faydalanmaq olar.
Tutalım, Bakının 200
min sakini ən müxtəlif səbəblərdən yaşayış yerini
dəyişib.“Paytaxtın on minlərlə sakini yeni ünvanlara
köçüb” deməklə olayın miqyası barədə nisbətən dəqiq
təsəvvür yaratmaq mümkün olmayacaq. Ancaq evlərini
dəyişənlərin şəhər sakinlərinin ümumi sayına nisbətini
faizlə ifadə etsək, kadrarxası mətn teleseyrçiləri daha
dəqiq məlumatlandırar. Bundan ötrü statistikaya üz
tutur və Bakıda yaşayan əhalinin ümumi sayını öyrənirik.
Tutalım, söhbət 2 milyon sakindən gedir. Adi hesablama
aparsaq, paytaxt sakinlərindən 10 faizinin yeni ünvan-
lara köçdüyünü müəyyənləşdirəcək və bu məlumatı k/a
mətndə belə səsləndirəcəyik: “Paytaxt sakinlərinin on
faizi yeni ünvanlara köçüb”. Yuvarlaqlaşdırma üsulunun
başqa variantından da yararlana bilərik. Məsələn, Bakı
sakinlərinin toplam sayını – 2 milyonu 200 minə bölsək,
10 rəqəmini alacağıq. Bu, həm 10%, həm də “hər on
adamdan biri” deməkdir. Beləliklə, ünvanını dəyişən
200 min nəfər haqqında “Bakının hər on sakinindən biri
yeni ünvana köçüb” məlumatını işlədə bilərik. Diqqət
yetirdinizsə, k/a mətndə rəqəmləri sözlə ifadə etdik. Bu,
ona görə vacibdir ki, rəqəmlər reportyoru, redaktoru,
aparıcını yanıltmasın.
DİQQƏT!
Kadrarxası mətndə rəqəmlərdən istifadə edərkən
bunları unutma:
• hər hansı səhvdən qorunmaq üçün bütün rəqəmləri
sözlə yaz, məsələn: dörd milyon;
• mürəkkəb rəqəmləri yuvarlaqlaşdır, məsələn: 2,1
milyon yerinə “azı iki milyon”;
• rəqəmlərin verdiyi informasiyanı daha anlaşıqlı
biçimə sal, məsələn:
“insanların 10 faizi”əvəzinə, “hər on adamdan biri” yaz;
• süjetdə eyni tarixi təkrar-təkrar işlədərkən həmin
tarixi ilk dəfə tam söylə və daha sonra yalnız son
rəqəmləri de, məsələn:“min doqquz yüz doxsanıncı”
tarixini mətnin əvvəlində olduğu kimi, amma daha
sonrakı oxunuşlarda “doxsanıncı il” şəklində söylə.