problemlərdən biri də müxtəlif yollarla keçmiş hüquq və imtiyazlarını saxlamaq üçün
imkan aramaqdır.
Müasir Azərbaycan cəmiyyətinin yeni təzadları beləliklə qender
problematikasında da öz əksini tapır. Respublikada həmin ziddiyyətlərin yumşalması və
həlli yolu, zənnimizcə, aşağıdakıları tələb edir:
l.Qender problematikasının Azərbaycanın tarixi və müasir reallıqlarından çıxış
edərək elmi tədqiqini;
2.Elmi-nəzəri tədqiqin mütləq konkret əməli təklif, plan və fəaliyyətlə
tamamlanmasını;
3.Qadın probleminin qender kontekstində, qender problemlərinin isə - dövlət
inkişaf konsepsiyası kontekstində baxılmasını və həlli yollarının müəyyən edilməsini;
4.Qender problemlərinin həlli yollarında dövlət, qeyri-dövlət, dini və KİV
strukturlarının uzlaşdırılmış konsepsiya və planlar əsasında birgə fəaliyyətini;
Ölkə və bölgədə problemlərin həlli, zənnimizcə, bu sahəyə aid yeni siyasət
konsepsiyasını və ixtisaslaşmış yeni qurumları tələb edir.
Respublikada hazırda tədqiqata və həllə ehtiyacı olan mühüm problemlər kimi
aşağıdakıları saymaq olar:
l.«Keçid dövrü»ndə iqtisadi problemlər (xüsusən işsizlik, mülkiyyətə münasibət
əsasında təbəqələşmə) və qender münasibətləri;
2.Azərbaycan xalqının «keçid dövrü»ndə yeni mentalitetin formalaşması
kontekstində qender münasibətləri;
3.Keçid dövründə ailə və nəsil artımı problemləri və qender münasibətləri;
4.Azərbaycanda qender münasibətlərinin hüquqi aspektləri;
5.Qarabağ müharibəsi, qaçqınlıq, köçkünlük və qender problemləri;
6.Respublikada təhsil və qender problemləri;
7.Respublikada din və qender problemləri;
8.Respublikada qadın problemlərinin qender problemləri kontekstində tədqiqi və
həlli yolları;
9.Respublikada «keçid dövrü»ndə qender kontekstində qızların problemləri
(onların imkan və hüquqları);
10.Qender problemləri çərçivəsində uşaq hüquqlarının müdafiəsi;
11.Qender problematikası çərçivəsində yaşlı və qoca nəslin vəziyyətinin
respublikadakı özünəməxsusluğu;
12.Respublikanın daxili, xarici siyasəti və qender münasibətlərinin gələcək
inkişafının proqnozlaşdırılması. Qender münasibətləri Şərq-Qərb təsirləri çərçivəsində.
Göstərilən və problemlə bağlı başqa mövzuların nəzəri tədqiqi ilə əməli həllinin
vəhdəti hazırki şəraitdə günün tələbidir.
KEÇİD DÖVRÜNDƏ RESPUBLİKADA QENDER VƏ QADIN PROBLEMLƏRİ
Qender konsepsiyasının kateqorial məfhumları, qadın probleminin keçid
dövründə səciyyəsi, XX əsrin sonu XXI əsrin astanasında qender və qadın
problemlərinə dünya siyasət və elmində marağın səbəbi, qadın probleminin qender
çərçivəsində tədqiqinin məqsədəuyğunluğu, həmin problemlərin müasir Azərbaycanda
özünəməxsusluğu, əməli həlli yolları seçdiyimiz mövzunun gələcək tədqiq və təbliği
problemləridir.
Qender haqqında XX əsrin 70-ci illərindən qərb, əsasən ingilisdilli ədəbiyyatda,
sonralar isə müxtəlif ölkələrdə, hazırda Azərbaycanda da müəyyən tədqiqat cəhdləri və
mülahizələrilə rastlaşırıq.
"Qender" ingiliscə cins məfhumunun çoxçalarlığını (bioloji-növ qrammatik və
sosial cins və s.) ifadə edən sözdür. "Qender münasibətləri" cinslər arasındakı bioloji və
sosial-mədəni həyatda münasibətlərin bütövlüyünü, dəfələrlə ədəbiyyatda rast gəldiyiniz
"qender problematikası" isə - qenderlə bağlı problemlərin məcmusunu ehtiva edir.
Ədəbiyyatda hər üç anlayış zaman-zaman şərti olaraq adekvat terminlər kimi də işlənir.
Lakin onların elmi təyini və məzmun həcmi haqqında fikir müxtəlifliyi ilə də rastlaşırıq.
Müasir dövrdə "Qender münasibətləri" dedikdə bir sıra hallarda şərti olaraq
cinslərin ancaq sosial-mədəni sahədə olan münasibətləri nəzərdə tutulur. Hərçənd bu
baxış yekdilliklə qəbul edilməyib (Bax. 1989-cu il Pekin Konfransının materiallarına).
Zənnimizcə, məfhumun hər iki həcmdə (geniş və dar həcmlərdə) işlədilməsini
məqbul hesab etmək olar.
Qender tədqiqatları çox vaxt məxsusi ədəbiyyatda XX əsrin son rübü Qərb
elminin tapıntısı, icadı kimi təqdim edilir. Bu iddianın arayışa ehtiyacı var. Problem
qədim və daimidir. Sosial-mədəni sahədə cinslərarası münasibətlər və onların tənzimi
haqqında müxtəlif mülahizələr tarixin ilk çağlarından başlayaraq mifologiya, din,
qanunlar, ədəbi, fəlsəfı və s. abidələrdə öz əksini tapıb.
Qender və qadın problemlərinə XX əsrin sonu XXI əsrin astanasında bu cür
marağın səbəbi nədədir?
Məlum olduğu kimi, sosialist dövlətlər sisteminin dağılması və qlobal ictimai
inkişafın vahid iqtisadi, siyasi, hüquqi məkanının yaranmasına doğru təmayülü, bu
məkanın demokratiya və humanizm siyasi-mənəvi ideallar kimi qəbül etməsi və həmin
məkanda sosial təbəqələşmədən gələn müxtəlif çalarlı sosial ziddiyyət və konfliktlərin
sülh yolu ilə həllinin axtarması qender və qadın problemlərinin yeni mərhələdə dirçəlişini
və aktuallığını şərtləndirən səbəblərdəndir. Yaranmış və inkişafda olan məkanın
stabilliyinin müdafiəsi funksiyasını üzərinə götürmüş ideoloji cəmiyyətdəki ziddiyyətlərin
səbəbini, əsasən etnik, dini və cinsi fərqlərdə görür və onların həlli yolunu axtarır və
təklif edir.
Digər tərəfdən, qeyd etməliyik ki, cinslər arasında ziddiyyətlər həqiqətən də real
mövcuddur. Kapitalist məkanında, xüsusən hazırda ideoloji və elmdə geniş vüsət
tapmış qender tədqiqatları, həmin real ziddiyyətlərin aradan qaldırılması yollarını,
cəmiyyətdə cinslərarası ziddiyyətləri sosial münasibətlərdə ahənglə əvəz etməyi
qarşılarına məqsəd qoyub bu məqsədə çatmaq üçün real əməli yollar axtarması pozitiv
bir haldır.
Həqiqətən qadın problemlərinin hazırki dövrdə təcrid olunmuş şəkildə yox,
qender tədqiqatları çərçivəsində öyrənilməsi və həlli cəmiyyətdə sosial ahəng
baxımından daha məqsədəuyğundur.
Qender və xüsusən qadın hüquqları müdafiəsi problemlərinin əsas məğzi
Azərbaycanda müasir mürəkkəb, ziddiyyətlərlə dolu sosial-iqtisadi quruluşa keçid
dövründə məlumdur.
Yuxarıda qeyd etdiyimiz kimi, hazırda bu sahədə dünya miqyasında qəbul edilmiş
əksər sənədlərdə qender problematikasının sosial-işsizlik, dilənçilik, kriminal, əxlaqsızlıq
və s. problemlərdə üzvü bağlılığı göstərilir.
Odur ki, cəmiyyətin, o cümlədən Respublikamızın da problemlərinin kompleks
şəkildə tədqiq və həlli yolları axtarılmalıdır. Müxtəlif sahələrə aid konkret konsepsiya və
fəaliyyət planları tərtib edilməli sosial konflikt və stresslərə aparan məqamlar əvvəldən
nəzərə alınmalı və onların tənzimi: aradan götürülməsi və yaxud yumşalması
proqnozlaşdırılmalı və planlaşdırılmalıdır. Əks təqdirdə kor təbiilikdən gələn bəlaların
qurbanı olacağıq.
Ağrılı problemlərimizi sadalamazdan əvvəl bu problemləri həll edə biləcək və həll
etməli qüvvələri göstərmək məqsədəuyğundur. Məlumdur ki, keçid dövründə dövlətin
qanunverici və icraedici strukturları yaranan sosial ziddiyyətlərin həllində çox mühüm rol
oynaya bilər və oynamalıdır. Dövlət strukturları ümumxalq problemlərini həll etmədə
qeyri dövlət qurumlarla, o cümlədən partiyalar, dini strukturlar, ictimai-mədəni təşkilatlar,
xüsusən KİV-lə birgə iş planları əsasında fəaliyyət göstərərsə, bu fəaliyyətlərin səmərəsi
qat-qat artar.