156
DÖNƏCƏYƏM O YURDA
Yamac qalxdım, düzən keçdim, yal
aşdım,
Könlüm uman çox yerləri dolaşdım.
Hər ötən gün sinəm üstdən yol açdı,
Dönəcəyəm, dönəcəyəm o yurda.
…Üç qara daş nağıl başlar, nə başlar,
Ulu yurdda qəm xalıdı o daşlar.
Xatirələr! ay ağaclar! a daşlar!
Dönəcəyəm, dönəcəyəm o yurda.
Çəkmək olmur bu yolları göz ilə,
El-obadan gen düşən can üzülər.
O gəldiyim cığır ilə, iz ilə
Ya tez, ya gec dönəcəyəm o yurda.
Savabıyla günahımı yuyanlar!
İstəyimi, ürəyimi duyanlar!
Yurd yerində daş üstə daş qoyanlar!
Dönəcəyəm, dönəcəyəm o yurda.
Ya arzumun al libası əynimdə,
Ya yubanmış Vətən eşqi beynimdə.
Ya qayğıkeş insanların çiynində,
Dönəcəyəm, dönəcəyəm o yurda.
157
GÖZ YAŞINDAN
ÇİÇƏK BİTMƏZ
Şer həvəsində, söz həvəsində,
Duruldum yüz bulaq zümzüməsində.
Bir lalə saraldı dağ sinəsində,
Ürəyim göynəyə-göynəyə qaldı…
158
BAĞIŞLA
Sənin göz yaşlarını
Gözüm gördü, bağışla!
Göz yaşına göz yuman
Göydü, yerdi, bağışla!
Alçaldıqca ucaldı,
Böyüdükcə kiçilən.
Ömrümüzə ölçülən
Qəmi, dərdi, bağışla!
Mənim qazancım - itki,
İtkilərim qazancdı.
Ruhum ac – yalavacdı,
Səni yordu, bağışla!
Dünya - ruhlar ağrısı,
Ömür - tale yarası.
Eşqim - dilim arası
Bir ömürdü, bağışla!
159
SƏS
Nədən geçikmisən bu vaxta kimi,
Min ilin başından keçib gələn səs!
Xəfif titrəyişlə, incə gülüşlə
Ağrımı, acımı yarı bölən səs.
Bir qönçə dərdimlə gəldin yanaşı,
Səsim yandırırkən torpağı - daşı.
Danış, dünənimin dilsiz sirdaşı,
Danış sabahımla qoşa gülən səs.
Ahım ağardacaq gur saçlarını,
Tapsam yaylığında barmaqlarımı.
Dönür göz yaşına yanaqlarımı,
Ağlaya-ağlaya hər gün silən səs.
Dinib yüyrüyümdə, başdaşımda da...
Haçansa qalıbdı yaddaşımda da,
Tapacaq dünyanın o başında da,
Yerimi hamıdan yaxşı bilən səs.
O mənim şəkərim, balım dünyada,
Gərək ömrü qədər qalım dünyada.
Yaşadar, sevdirər zalım dünyada,
Məni öldürən səs, mənnən ölən səs.
160
***
Keçdiyim daşlı yollara
Gürşad yağardı, yağardı.
Bu yolların o başından
Bir qız baxardı, baxardı.
Qulağımdan səsi getməz,
Əl uzatdar, əl yetməz.
Göz yaşından çiçək bitməz,
Qəmi suvardı, suvardı.
Səngiməz taleyin qarı,
Yaxar, odlu baxışları.
Bəxtim tək qara saçlarım
Daha ağardı, ağardı…
161
GƏLİR
Hələ ürəyimdə arzudur o qız,
Bəlkə də ömrümə yazıdır o qız.
Yəqin bu istəyə razıdır o qız,
Əyninə güllərdən don biçib… gəlir.
Həya yanağını ha yandırıbdı,
Görkəmi laləni utandırıbdı.
Əyilən ömrümə həyan durubdu,
Mənim dərdlərimdən «pay» seçib gəlir.
Bir bulaq suyunda baxıb əksinə,
Sudan xoş duyğular axıb köksünə.
Bir cüt şamamanı sıxıb köksünə,
Qızlar bulağından su içib gəlir.
162
O GÜN Kİ…
O gün ki, eşqinin əsiri oldum,
Könlümü titrətdi məhəbbət yeli.
Arzular qoynunda çağladım, doldum,
Bu il o sevdanın beşinci ili.
Bulaq duyğularım axdı, selləndi,
Duymadın, - gözümdə yaş gilələndi.
Od oldu, sinəmə elə ələndi
O süzgün baxışın, ellər gözəli.
Düşdüm ayrılığa zaman ötüşdü,
Sənsiz ömür yaşım yaman ötüşdü.
Gəldim, gendən gördüm, bu nə görüşdü?!
Eşqindən ürəyim sözlü, nəğməli…
163
GÖRÜŞƏK
Sənin səbrin, mənim səbrim gen oldu,
Yenə sevən könüllərdə görüşək.
Axır gəlib yadlar deyən gün oldu,
Əyilməyək qəmə, dərdə görüşək.
Gəl Günəş ol atəşpərəst ömrümə,
Günü, ayı didərgin səs ömrümə.
Ömür bağla bu müqəddəs ömrümə,
İlqar bağla, gəlim pirdə görüşək.
Mən gözlədim, demədim ki, ilə dön,
Taleyimə elə qayıt, belə dön.
Mən saz olum, sinəm üstə telə dön,
Havalanıb pərdə-pərdə görüşək.
Sən səhərin, sən axşamın aşiqi,
Mən həsrətdən yanan şamın aşiqi.
Çox gözləmə, qaranlıqla işığın
Qovuşduğu qərib yerdə görüşək.
Göylər qərib, bəndə qərib, din qərib,
Zaman qərib, ömür qərib, gün qərib.
Bu qisməti Allah özü göndərib,-
Adımı tut, bu ömürdə görüşək.
164
KEÇƏR
O şaxtalı, qarlı gündən
Neçə-neçə zaman keçər.
Sevgilim, sənin həsrətin
Ürəyimdən hər an keçər.
Bu çaylar hicran səslidi,
Küləklər qəm nəfəslidi.
Heç bilmirəm nə fəslidi,
Ömrüm, günüm yaman keçər.
Möhnətim saz çanağında,
Ruhum tellər qucağında.
Gecə-gündüz xəyalımda
Tufan qopar, boran keçər.
Sənsiz ayım dönüb ilə,
Qayıt! ömrüm-günüm ilə.
Gəncliyimi silə-silə
Vaxt dolanar, dövran keçər.
Dostları ilə paylaş: |