100
bir yandan da tövlə sindromları, ictimailəşmək,
əbədiləşmək çağırışı. Odur ki, insan təbiət və
mədəniyyət, can və simulyakr, gerçəklik və imitasiya
arasında girinc qalmış məxluqdur. Bunun sonucunda
insanın həyatında, anlaşmalar və davranışlar zonasında
psixoloji tarazlıq pozulur, “mən”lə şüuraltı və
bilincsizlik arasında çözülməz konfliktlər yaşanır,
heçdən törəmiş problemlərin, dissonansların sayı
artır: insan öz bədənini “eşitmir”, onu “dinləmir”.
Nəticədə, bədənə kosmosdan ötürülən informasiyanı ya
oxuya bilmir, ya da onu alayarımçıq başa düşür. Belə
məqamlarda insan ritual qoynuna atılıb orada
təmizlənmək, kosmosla əlaqəni bərpa eləmək, bəşəri
harmoniya ilə qovuşmaq, eyniləşmək, onun içində əriyib
itmək istəyir. Təbiətə (bədənə) yabançılaşmanın ilk
pilləsi totem, növbəti pillələrisə ayin və ritualdır.
Dünya mədəniyyəti tarixində ruh haqqında birinci ciddi
söhbət totemlə bağlı başlayır. Totem atanın ruhunun
obrazıdır və bu o deməkdir ki, bədən olmadan da
keçinmək mümkündür. Bundan o yanası isə
FƏLSƏFİ-KULTUROLOJİ GƏZİŞMƏLƏRDİR.
Ruh gözəgörünməz adam kimi bir şeydir: hamı bilir ki,
o var, amma heç kim də onu görməyib. Bu, insanın
yaratdığı mədəniyyətin, fəlsəfənin paradoksudur və
bəlkə də fantomudur. Totem (maska) əcdadın ruhunun
üzüdür. Biz əgər
əcdadın ruhunun yaşadığına
inanırıqsa, deməli, inanırıq ki, bizim ruhumuz da
əbədidir. Ruhlar, fikirlər və idayalar ölümsüzdür.
Çünki maddi deyillər, təbiətə aid deyillər. Yalnız
bədənlər ölür. Odur ki, ruh bir totem (maska) arxasına
sığışa bilir. Əslində, totem bədənsiz başdır. İnsan
ruhu bədəndən üstün tutduğundan onu başda bulur, başla
əlaqəli bilir. Əbədinin, ölümsüzün yeri beyindir,
beynin içində olan fikirdir. Ona görə totemə bədən
lazım deyil. O, ruhu eyhamlaşdırır.
Bədəni beyin “təşkil edir”, yaşadır, tənzimləyir,
fəaliyyətə uyğunlaşdırır. Beynin imperativlərini bədən
gerçəkləşdirir; daha doğrusu, beyin bədənin energetik
101
nüvəsidir və bədənin “hökmdarı”dır. Beyin həmişə
bədəndən düz altı dəqiqə artıq ömür sürür. Dəlilərin
bədəni “olmur”. Dəlilik beyinlə bədən konfliktinin
gerçəkliyidir. Beynin nəzarətindən çıxan bədən özünü
tanımır, sözünü, istədiyini bilmir. Beyinsiz bədən
fiziki ölümdən öncə meyitdir.
Digər bir mülahizə... Bədən təbiətdən mədəniyyətə
keçəndə meyit olur. MƏDƏNİYYƏT FİKİRLƏR, İDEYALAR,
TOTEMLƏR QƏBİRİSTANLIĞIDIR. O ŞEYLƏRİN
QƏBİRİSTANLIĞIDIR Kİ, ONLAR ÇÜRÜMÜRLƏR. MƏDƏNİYYƏT
ÖLÜMƏ
İTHAFDIR, MEYİTLƏRİN SAXLANC YERİDİR.
Mədəniyyəti bədən yox, beyin yaradır. Toplumun heç bir
fərdi özünü təbiət kimi qavramır. Kimdən soruşsan ki,
“təbiət nədir” özündən dışarını göstərəcək; amma
deməyəcək ki, təbiət elə mən özüməm və ya mənim
bədənim təbiətdir. Niyə? Çünki insan yaranışından
təbiətdən qorxur, eymənir. Bu qorxu ölüm qarşısında
olan qorxudur. Mədəniyyəti və cəmiyyəti formalaşdıran
da özünü təhlükədən qorumaq hissidir. Bütün canlılar
qorunmaq istəyəndə özlərini cansız kukla, ölü kimi
aparırlar. Qorunmaq üçün ən gözəl vasitə ölüyə, meyitə
bənzəməkdir. Meyit üçün təhlükə olmadığından qorxu da
yoxdur. Əzrail meyitlərə biganədir, çünki onların
alınası canı yoxdur. Ona görə insan mədəniyyətdən
ikiəlli yapışır və bədənini güdaza verir ki, öz
“mən”inə etibarlı sığınacaq tapmış olsun. İnsanın
bədəni məzarlığa gömülməmişdən öncə onun “mən”i bir
təcrübə kimi mədəniyyətə basdırılır. İnsan güman edir
ki, bu “qəbiristanlıq” onu guya əbədiləşdirir. Bu da
fiziki ölüm, unudulmaq, həmişəlik yox olmaq haqqında
düşünüşləri qismən ağrısızlaşdırmaqdan ötrüdür.
Əbədiliyə doğru yol mumiyalanmaqdan keçir. Misir
fironları bu sayaq fikirləşirdilər. Amma neyləyəsən
ki, əgər meyit olmursa, mumiya da olmur. MƏDƏNİYYƏT
İNSANIN “MƏN”İ ÜÇÜN MUMİYADIR. “Mən” mədəniyyətə
mumiyalanmaq sorağı ilə gəlir.
Elə bu andaca məndən soruşmaq gərəkir: bəs qədim
yunan mədəniyyəti necə? O ki gözəl bədənlər
102
mədəniyyəti idi və tam şəkildə bədənə refleksiya
eləyirdi. Bu da onu bildirir ki, ruh və meyitlə bağlı
nəzəri konsepsiya burada işləmir, relevant deyil.
Doğrudanmı? Bəlkə mən yanılıram? Həqiqətən, ilk
baxışda adama elə görünür ki, qədim yunan mədəniyyəti
bədənin, bədəndə mövcud təbiətin (maddiliyin, başqa
sözlə, əzələlərin) vurğunudur və bu təbiiliyi
rəngləmək, çərçivəyə salmaq, onu paltarın içinə
“dürtmək” barəsində düşünmür. Qədim yunan nə çılpaq
bədənə həqarətlə baxırdı, nə də başqalarından öz
bədənini gizlədirdi. Bu mənada antik yunan mədəniyyəti
ən “həyasız” mədəniyyətdir. Yaraşıqlı, proporsional
bədən qədim yunandan ötrü elə dünyanın yarısına
bərabər idi. Antik mədəniyyətlə ilkin tanışlıq zamanı
elə təəssürat oyanır ki, bu mədəniyyət insan bədənini
“bütləşdirib”,(tanrılar insan qiyafəsində) ortaya
qoyub dövrəsinə
fırlanır. Ancaq bu, xalis
illyuziyadır, ilğımdır, yanlışlıqdır. Bəli, yunan öz
bədənini çox sevirdi. Hərçənd onun ruhunu çaşdıran
ağrılarla, ölümlə barışa bilmirdi və görürdü ki, bədən
tanrıların əlində yalnız və yalnız qəşəng bir
oyuncaqdır.
Lakin və bir də lakin... məsələ təsəvvür
edildiyindən də mürəkkəbdir. Fikir verin, dağ gövdəli
qəhrəman Filoktetin
18
meşəni lərzəyə salan bağırtısı
içində onun bədəni zəifləyib, kiçilib saman çöpü boyda
olur. Qəribə də olsa, Homer əsərinin faktıdır ki,
Filoktetin ağrısı onun bədənindən böyük və güclüdür.
Digər bir misal: atlet bədənli Sizif
19
əbədi
işgəncədədir. O, dirigözlü psixi və fiziki zülmə
məhkum edilmiş pəzəvəngdir. Cəsur Edipi
20
tale (alın
yazısı, yəni bədən) elə mucul eləyir ki, o, gözlərini
ovub potensial meyitə, kuklaya (kor adam kuklalaşır:
çünki davranışında yardıma ehtiyacı olur, idarə
edilir; digər tərəfdən isə bəsirət, gələcəyi görmək
istedadı qazanır) dönür. Nə tunc bədənli Heraklı, nə
igid Odisseyi, nə də qəhrəman Axillesi xoşbəxt adamlar
adlandırmaq mümkündür. Gözəllər gözəli Yelenanın
21
da
Dostları ilə paylaş: |