6
Bir gün Ləya keçiləri qəbirstanlığa otarmağa apardı. Keçiləri qəbirstanlığa
buraxıb, atasının qəbrinə yaxınlaşdı.
– Ata, mən gəldim, – dedi. Atasının qəbrini qucaqladı. Ləya günlərinin necə
ağır keçdiyini ağlaya-ağlaya atasına danışdı. Sonunda ağlamaqdan yoruldu. Başını
qəbrin üstünə qoydu...
***
Ləya yuxu gördü. Budur, yuxuda onun atası-anası sağdır. Onlar necə də
mehribandırlar! Anası qızının sünbül saçlarını darayır, qayğısına qalırdı. Atası
onu qoz ağacının altındakı yelləncəkdə yelləyir. Ləya isə
gülür...gülür...gülürdü...
Ləya sancılandı. İşləməkdən codlaşmış əlləri ilə sancı dolan qarnını
qamarladı, uf...uf....f... – deyə, ufuldadı.
Yuxulu gözlərini qaldırıb qardaşına baxdı. Qardaşı bacısının qarnını
təpikləyir və bağırırdı:
– Axmağın biri, qalx ayağa! Hanı keçilər?
Ləya ağlamsındı:
– Bilmirəm, dedi. Vay, qaranlıq düşüb ki? Bura haradı? – yuxulu Ləya
soruşdu. Qardaşı hirslə;
7
– Hara olacaq, qəbirstanlıq!
Ləya içini çəkdi. Deməli, bu xoşbəxtlik yuxudaymış.
***
Ləya qorxudan evə qayıtmadı. Keçiləri tapmalıydı. Keçilər isə qaranlıqda
gözə dəymirdilər. Ləya ağlayır, keçiləri səsləyirdi:
– Meç... meç... meçi...haradan isə səs gəldi:
– Mə...ə...ə...mə...əə..əəə...Keçilər mələyirdi. Səs yaxınlıqdakı meşədən
gəlirdi.
Meçi.... meç... Ləya meşəyə sarı yüyürdü. Keçilərin səsi yenidən gəldi:
– Məəə..... əəəə.... ə.... ə... Səs uzaqlaşırdı.
Ləya gecə yarıya qədər keçiləri axtardı.
Bu vaxt onun vecsiz qardaşı şirin yuxudaydı. Analığı hirsindən qızcığazın
arxasınca söylənirdi;
– Ləya evə keçilərsiz qayıtsa, əlimdəki kəmərlə döyüb, onu evdən
qovacağam!
8
***
Gecənin qaranlığında çaqqallar vəkkildəşir, yarasalar gözü qarşısında
ağacdan-ağaca tullanır, budaqdan sallanaraq siçan kimi ciyildəşirdilər.
Yolu itirən Ləya meşədə azdı. Qorxdu. Meşədəki ağaclar gözünə vahiməli
göründü. Ləya yanından ötüb keçən tülkünü gördü: Tülkü deyəsən, kəndə sarı
gedirdi. Ləya tülkünün arxasınca düşdü. O, kəndə qayıtmaq istəyirdi. Birdən
analığı yadına düşdü.
– Yox, mən evə keçilərsiz qayıtsam o məni öldürər. Ləya ağaca qısıldı.
Soyuq onu üşüdürdü. Payızın son günləri olduğundan ağacdan qopan
yarpaqlar bir-bir onun üstünə düşür, sanki Ləya ilə oynamaq istəyirdilər.
Qız ayağa qalxdı. Böyük oyuğu olan bir ağaca yaxınlaşdı. Ağacdan tökülən
yarpaqlardan oyuğa yığdı və özü də oyuğun içinə girdi. Tezliklə yuxuya getdi.
***
Səhər açıldı. Ləya ağacın oyuğundan çıxdı. Üzünü göyə tutdu, Günəşə
baxdı. Günəş sıx ağacların budaqları arasından görünmədi. Lakin şəfəqləri
ağacların budaqlarını yarıb, şüalarını zəif olsa da, meşənin qaranlığına qədər
çatdırırdı.
Ləya Günəşi salamlayırmış kimi qollarını geniş açdı, gərnəşdi. Və elə bu
zaman keçilər yadına düşdü.
– Vay, mən keçiləri tapmalıyam. – deyib, onları haylamağa başladı.
– Meçi... meç... meçi... Lakin keçilərdən səs-səmir gəlmədi.
Ləya ac-susuz bütün günü keçiləri axtardı. Elə bil keçilər yox imiş. Zalım
analığının qorxusundan ağlamağa başladı.
Ləya evə qayıda bilmədi. Üzünü şərq istiqamətinə tutub addımladı...
9
***
Susamışdı, qızcığaz. İçməyə şirin su tapa bilmədi.
– Məəə.....ə ...mə...ə..ə.... Qəfildən qulağına keçi mələrtisi gəldi. Ləya
sevindi. Deyəsən, keçilərim yaxındadır. O, keçilərini yenidən çağırmağa başladı.
– Meçi... meçi... meçi... Keçiləri görmədi.
Ləyanın susuzluqdan boğazı qurudu. Udquna bilmədi. O, su tapmalıydı!
Amma necə?
Ləya dizlərini yerə atdı. Daha sonra isə qulaqlarını torpağa dayadı. Lap
uzaqdan, torpağın altından şırıltı səsləri duydu.
– Su...su..Su var! – deyə sevindi.
***
Gücsüz ayaqlarını sürüyə-sürüyə suya sarı gedirdi. Artıq nə meşə, nə də tala
gözə dəymirdi. Qızcığaz dərə-təpə ilə irəliləyirdi.
Hərdən də yanından tanıya bilmədiyi heyvanlar ötüb-keçirdilər. Onlar nə ev
heyvanlarına, nə meşə sakinlərinə oxşamırdılar. Ləya nağıllar ölkəsinə düşmüşdü.
Yenə də qulaqlarını yerə dayadı və suyun yerini müəyyən etdi. Suya
yaxınlaşdığını dəqiq bilirdi. Və yenə...
– Məəə.....ə... mə...ə..ə.... keçi mələrtisi gəldi.
Onun qulağına dəyən səs heç də keçi səsi deyildi. Dünəndən onun dalınca
düşən sarı ilanın səsi idi. Sarı ilan Ləya kimi susuzluqdan yanırdı. Ona görə də,
keçi kimi mələyirdi. İlan onun arxasınca gəlirdi.
Birdən Ləya ilanı gördü, amma qorxmadı. Dayandı.
– Nə var, ay sarı ilan? Nə mələyirsən keçi kimi? Mən də elə zənn etdim ki,
keçilərim yaxınlıqdadırlar. De görüm, sən mənim keçilərimi görməmisən?-
soruşdu Ləya
Sarı ilan haça dilini çıxartdı;
– Mən sənin keçilərini gördüm. Fıs... fıs... s... s.... İlan dili ilə qarşıdakı
təpəni göstərdi. Yenidən fıs... fıs... s... s.... edərək sözünə davam etdi; oradakı
böyük təpəni aşıb, getdilər. İlan fısıldayaraq güldü və dedi:
– Fıs...ha...haa...ha...fıs...s...s..Onlar məndən qorxub, qaçdılar.
Ləya təəccüblə soruşdu:
– Ay sarı ilan, onlar səndən niyə qorxdular ki, mən ki, səndən qorxmadım.
İlan:
– Mən keçiləri əmmək istədim, onlar da hürküb qaçdılar. Ləya hər şeyi indi
anladı.
– Deməli, keçilərimi sən hürküdüb, qaçırmısan!
İlan dilini çıxarıb, fısıldadı: fıs...s..s.ss...sss...
– Sənin keçilərin məni maraqlandırmır. Fıss..sss.sss...Su istəyirəm!
– Yaxınlıqda su var, mən də ora gedirəm. Gedək içək.