54
Yarasa uçub qarışqalara yaxın gəldi. Qurbağa hop..hop...hop... deyə-deyə
yarasaya yaxın yerə tullandı. Cır..cır cırıldayan çəyirtkə yaxınlıqdakı kola sarıldı.
Maraq onları bürüdü: Gözlərini yumru olan nəyəsə zillədilər.
Papağa bənzəyən yumru tərpəndi. Hamı qorxdu. Ətrafa səpələndilər. Yarasa
siçan kimi ciy edib, dişlərini göstərdi, qulaqlarını dikəltdi, sonra da başıaşağı
ağacdan yelləncək kimi sallandı. Amma gözlərini papaqkimidən çəkmədi.
Qurbağa soruşdu:
– Qur... qur... bu nədi belə?
Cırcırama cavab verdi:
55
– cır ...cır... Göbələkpapaq!
Onlar qorxa-qorxa çağırdılar;
– Göbələkpapaq, ay Göbələkpapaq, sən kimsən?
Elə bu zaman papaqsız qalan göbələyin səsi gəldi. Göbələk yüyürə-yüyürə
özünü yumru olan nəyəsə çatdırdı.
Hara gedirsən, hara?
Papağımı ver bura.
Qur...qur... bu ki, göbələyin səsidir. Göbələk, sənsən? – soruşdu qurbağa.
Papaqsız göbələk:
– Bəli, mənəm.
Qarışqa güldü:
– Papağın hanı bəs?
Göbələk:
– Budey, dozanqurdunun başında. Papaq altında itib-batan dozanqurdu
papağı gözünün üstündən qaldırıb göbələyə məzəmmətlə baxdı.
– Görməmişin biri, verəcəydim də papağını özünə. Günəş çıxıb isti vurur
üzümə. Səni dost bilirdim özümə.
Göbələk:
– Səndən mənə dost olmaz! Papağımı ver bura. Onlar papağın;
56
Ətəyindən yapışdılar.
Papaq üstə dartışdılar.
Yaramazsan deyə-deyə,
Hirsləndilər, bağrışdılar.
Tamaşaya duranların hərəsi bir məzəmmətlə
Yarasa: – ciy..ciy...y...dişlə onu, yaramaz, Qurbağa: – qur...qur... ay...ay
səni, qanmaz! Qarışqa: -Ah, dalaşmayın, heç kim sizi anlamaz. Beləcə hər biri öz
fikrini dedi.
Toz dumana qarışdı. Bir-biriylə dalaşdılar. Yadlar gəlib bu söhbətə
qarışdılar.
Göbələklə dozanqurdu danışdılar. Nəhayət ki, bir dil tapıb barışdılar.
Dozanqurdu papağı göbələyin başına qoyub dedi:
– Göbələk, bağışla məni.
İstəmirdim incidəm səni.
Göbələk:
Başa düşürəm səni.
Gedək gəzək çəməni.
Onlar qolboyun olub, getdi. Nağılımız burda bitdi. Qarışqa evinə getdi,
qurbağa suya tullandı, Yarasa ağacdan sallandı. Cırcırama cırıldadı. Yarasa yatıb
xoruldadı.
Gözləyin, ay uşaqlar, növbəti nağıl başladı.
57
Dandana
Dandana... dandana... dandana...
Ay haray, danalar girmiş bostana...
Qoymayın, ha, qoymayın, danalar bostana girib, -deyə Şoti baba çığırırdı.
Nəvəsi Şoşi bala isə ağlayırdı. Baba danaları çomağın qabağına qatıb, onları
bostandan çıxartdı. Bundan sonra isə heyf!- deyə-deyə bostanın halına yandı.
Dandana... dandana... dandana...
Vay tutulub bostana,
Tərəvəzlər yox olmuş,
Heç nə gəlmir gümana,
Dandana...
dandana...
dandana...
Bəs nə qalmış balama!?
Şoşi hələ də ağlayırdı. Danalara acığı tutmuşdu. Axı danalar onun yemiş-
qarpız payını yemişdilər. Xiyarlarını-pomidorlarını əzmişdilər. Bəs indi
neyləyəcəyik? -deyib hönkürdü.
O, ağlaya-ağlaya oxuyurdu:
Dandana... dandana... dandana...
Ay haray, danalar girmiş bostana...
Yemişləri yemişlər,
Qarpızları yemişlər,
58
Xiyarları əzmişlər,
Dandana...
dandana...
dandana...
Bəs nə qalmış babama?
Baba görür ki, nəvəsi Şoşi onun halına yanır. Onu gülmək tutur. Sən demə,
bir-birindən xəbərsiz baba nəvənin, nəvə isə babanın halına yanırmış.
Şoti baba Şoşi balasını yanına çağırıb deyir:
– Şoşi balam, ağlama. Onsuz da bostan bir azdan sovrulacaqdı. Darıxma.
Biz yenidən bostana tərəvəz əkəcəyik. Sən də yeyəcəksən, mən də. Hələ üstəlik
danalara pay da verəcəyik.
Şoşi bala sevinir və oxuyur:
Dandana...
dandana...
dandana...
Danalar bağdan qovulmuş,
Bağ-bostanlar sovrulmuş.
Babam bostan əkəcək,
Yanına çəpər çəkəcək,
Yetişəcək tərəvəz,
Şoşi onu yeyəcək.
Dandana...
dandana...
dandana...
Nağılımız burda bitdi. Hərə öz evinə getdi. Bir də görüşərik Şoti babanın
bostanında. Hər şey də öz yolunda!
59
Sasan
Vızz...
vızz... vızz...
Biri vardı, biri yox... vızz...vızz...eyləyən Sasan adlı arı vardı. Onun elə gözəl
qanadları var idi ki... Amma dodaqları sallaq idi. Sasan dil-boğaza qoymurdu ki,
qoymurdu. O qədər vızz...vızz...edir ki... elə buna görə də vızıldamaqdan dodaqları
sallanırdı.
***
Bağda yaşayan digər heyvan və cücülər onun dodağına gülərdilər. Bu da
Sasanı əsəbiləşdirərdi.
Arı Sulutəpə adlı məkanda gözəl bir bağda yaşayırdı. Bağda çarhovuz,
çoxlu ağac və güllər vardı. Hələ üstəlik burda yuvasını qurmaq üçün çoxlu
oyuqlar da vardı. Sasan buna çox sevinirdi. Amma onu hirsləndirən bir məqam
vardı. Bu bağa tez-tez Totu adlı balaca bir oğlan qonaq gələrdi. Və onun yuvasına
çomaq salardı. Bu da Sasanı özündən çıxarardı.
60
Vızz...vızz...edərək yuvasından kənar qaçar, hərdən də oğlanı öz iynəciyi ilə
sancmaq istəyərdi. Və bir gün sancdı da...özü də dodağından. Toti bağırdı. Sasan
uçub kənardakı ağaca qondu.
O, vızz...vızz... deyə – deyə Totuya baxırdı. Totu ağladıqca dodaqları şişirdi.
Şişdi....şişdi....və şişdi...sonra da sallanmağa başladı. Bunu görən Sasan
qəhqəhəylə ona güldü. Sərçə onun yanına gəlib soruşdu:
– Cik...cik... Ay Sasan, niyə gülürsən?
Sasan silkələnən qarnını qanadları ilə tutub, hey gülürdü.
Sərçə dedi:
– Bəlkə deyəsən, mən də güləm, cik...cik...
Sasan qanadları ilə Totunu göstərib dedi:
– Vız...z...Sərçə, sən bir onun sallaq dodaqlarına bax, gör necə də
gülməlidir!
Cik...cik..cik...edən sərçə;
– Hə gülməlidir, dedi.. Lap sənin dodaqların kimi, -deyib, hündürdən
qəhqəhə ilə cikkildədi.
– Cik...ha...ha...ha...
cik...cik...ha...ha...ha...
Sasanın dodaqları yadına düşdü. Pərt oldu. Və bir də heç zaman heç kəsin
dodaqlarından sancmadı.
61
Sehrli mücrü
Biri vardı, biri yoxdu... Yox, ay uşaqlar ikisi də vardı.
Bu dünyada əkiz bacılar vardı. Onlardan birinin adı Sehri, o birinin isə adı
Mehri idi. Onlar ucqar dağ kəndində yaşayırdılar. Sehri qoçaq, Mehri isə tənbəl
idi.
Sehri odun daşıyar, sobanı qalayar, səhər yeməyi hazırlayardı. Sonra tənbəl
Mehrini yuxudan oyatmağa çalışardı ki, səhər naharlarını etsinlər. Lakin tənbəl
Mehrini oyatmaq asan deyildi. Oyanmaq istəmirdi ki, istəmirdi. Belə vaxtlarda
Sehri onun üçün oxuyardı;
Tənbələ bax, tənbələ,
Yatır, yatır, hey yatır.
Yuxusunda görür ki,
Muncuq alır, zər satır.
Mehrinin bu
mahnıdan xoşu gəl-
məz, bacısına hər dəfə
qadağa qoyardı ki. Da-
ha bu mahnını oxuma-
sın. Və bir səhər Sehri
nə qədər çalışsa da
tənbəl Mehrini yuxu-
dan oyada bilmədi.
Gözlədi ki, bacısı yu-
xudan oyansın.
***
Sehri darıxdı. Su
qabını götürüb çaya su
gətirməyə getdi. Çaya
çatanda musiqi səsi
duydu. Diqqətlə qulaq
asdı.
Düzdür, səhv
salmayıb, kim isə san-
ki hansısa sehrli mah-
nı çalırdı. Sehri ilk
62
dəfə idi ki, belə gözəl mahnı eşidirdi. Və birdən suyun üzündə bir mücrünün
üzdüyünü gördü. Mücrü ona sarı gəlirdi. Mücrü oxuyur və deyirdi:
Qapağımı aç, qapağımı,
Bax, o zaman görərsən...
Mücrü Sehriyə çatdı. Sehri mücrünü suyun üzündən götürüb evə gətirdi.
***
Tənbəl Mehri hələ yatırdı. Sehri mücrünü yerə qoydu ki, bacısını oyatsın və
mücrünü Mehriyə göstərsin. Elə bu zaman mücrü oxumağa başaldı.
Qapağımı aç, qapağımı,
Bax, o zaman görərsən...
Səs o qədər gözəl idi ki, tənbəl Mehri musiqi səsinə yuxudan oyandı. Mehri
yorğan -döşəyin içərisindən qalxmadan soruşdu?
– Bu nədi belə, Sehri.
– Mücrü.
– Hardan tapdın?
– Çaydan.
– Ay qız, o nə deyir elə?
– Deyir, Mehri durub mənim qapağımı açsın. Mehri tənbəlliyindən ayağa
qalxmadı. Yanındakı çomağın köməkliyi ilə qapağı açmaq istədi. Mücrünün
qapağını çomaq vurub qırdı. Sehri güldü. Mehri qorxudan yorğanı başına çəkdi.
***
Sehri mücrüyə yaxınlaşdı. Mücrünü əzizləməyə başladı.
Gözəl mücrü,
ağıllı mücrü,
Açıl-açıl...l...
sehirli mücrü.
Sən demə mücrüyə elə bu sözlər lazım imiş ki, qapağı açılsın.
Cingiltili zınqırov səsi gəldi. Mücrünün qapağı açılmağa başladı. Mücrünün
qapağı açılan kimi qızıl bir mirvari düzümü Sehrinin boynuna dolandı. Bunu
görən tənbəl Mehri zirək qızlar kimi qalxıb mücrünü qucaqladı.
– Bu mənim mücrümdür!-deyib onun qapağını açdı ki, qızıl mirvari
götürsün. Amma gördü ki, mücrü boşdur.
Tənbəl Mehri mat-məəttəl bacısının üzünə baxdı. Sehri mahnını yenidən
oxudu
63
Gözəl mücrü,
ağıllı mücrü,
Açıl-açıl...l...
sehirli mücrü.
Mücrü açıldı və bir qızıl mirvari yenidən onun boynuna dolandı.
Sehri Mücrüdən soruşdu:
Gözəl mücrü,
ağıllı mücrü,
sehirli mücrü,
– bəs niyə Mehriyə, mənim bacıma boyunbağı vermədin?
Mücrü oxuya-oxuya diləndi:
Tənbəlləri sevmirəm,
Sevmirəm a..a..sevmirəm.
Kim tənbəldi mən ona
Boyunbağı vermirəm.
Qoy o mənə söz versin ki, daha tənbəllik etməyəcək. Bax o zaman mən də
ona qızıl mirvari hədiyyə edəcəyəm.
Və o gündən Mehri tənbəlliyin daşını atdı. Mücrü onlara qızıl mirvari
hədiyyə verib, yeni tənbəlləri axtarmaq üçün çaya sarı yollandı.
Mücrümüz suya getdi. Nağılımız burda bitdi.
64
Meşə və insan
Qar...qar...qar... edən qarğa hay-həşir saldı və göydə uça-uça ağladı.
Elə bu zaman meşədən tüstü qalxdı. Dalınca da qıpqırmızı alov dilimləri
meşənin əl-ətəyini yalamağa başladı.
Tülkü vəkkildədi. Quyruğunu qısıb meşədən qaçdı. Sincab və dələlər
ağlamağa və hay-həşir salmağa başladılar. Maral və ceyranlar hürkdülər.
Beləliklə, meşədə olan bütün heyvanlar qaçıb canlarını qutarmağa çalışdılar.
65
Ağaclar yanıb, kül oldu. Meşədən əsər-əlamət qalmadı. Meşənin sakinləri qaçqın
düşdülər.
Təkcə maral və qarğa heç hara getmədi. Maral hara gedirdisə qarğa da
onunla birlikdə gəzirdi. Çünki qarğa onun buynuzuna qonmuşdu.
***
Bir gün maral qarğadan bezdi:
– Ey, qarğa, ordasan? – soruşdu.
Qar..qar... edən qarğa: – Burdayam, – deyə cavab verdi.
– Yəni, harda?
– Guya bilmirsən? Sənin buynuzunun üstündə.
– Hə, düz deyirsən, onsuz da qonmağa yer yoxdur. Hara qonacaqdın ki,
buynuzumdan başqa. Qarğa, bilirsən nə var?
– Nə var ay maral?
– Daha bəsdi, get başqa yerə qon.
– Məsələn hara? Qar...qar...
– Nə bilim, məsələn, elektirik xətlərinə.
– Qar...r...r vay...vay...qar...r...Deyirsən, məni cərəyan vurub, öldürsün?!
– Mənə nə var! Mənim istəyim buynuzumdan əl çəkməyindir.
– Nə qədər ki, qonmağa yer tapmamışam, o qədər də buynuzunda məskən
quracağam.
– Pay atonan, işə düşmədim!- dedi maral.
– Səni kim işə saldı? Qar...r...r...qa...r...r....
– Sən.
– Xeyr. Yaxşı fikirləş. Səni bu əziyyətə salan meşəni yandıranlardır.
66
– Kimdir ki, onlar, tanıyırsan? Maral soruşdu. Qarğa isə cavab verdi:
– Bəli, tanıyıram. İnsanlardır.
– Sən hardan bilirsən, ay qarğa?
Qar...qar...r...r...
– Mən göydə uçurdum, gördüm ki, iki kişi ocaq qalayır. Onlar ocaq
qaladılar, yazıq dovşanı kəsdilər, ocaqda bişirdilər, yedilər. Sonra da ocağı
67
söndürmədən çıxıb getdilər. Mən də çoxlu qarıldadım, onların da qarıltımdan
xoşları gəlməyib məni daşladılar.
***
Maral qaçırdı. Bərk hirslənmişdi. Qarğa isə onun başının üstündə uçur, elə
hey soruşurdu?
– Maral bacı, maral bacı, hara qaçırsan? Maral hirsindən cavab vermir, hey
qaçır...qaçırdı...
Və birdən qarğa Maralın yaxınlıqdakı kəndə girdiyini gördü. Qorxdu.
– Ey Maral, ora olmaz. İnsanlar bizim üçün təhlükəlidir. Qayıt, qayıt,
deyirəm sənə.
Maral isə qayıtmadı. Qarğa ağlamağa başladı.
– Onlar səni kəsib, yeyəcəklər. Bəs mən hara qonacağam, -deyib,
qanadlarını göydə şappıldatdı. Maral onu onsuz da eşitmirdi.
Maral kəndə girib qarşısna çıxan ilk qapını ayaqları ilə bərk-bərk
döyəclədi....döyəclədi...
Qapını qoca bir kişi açdı. Maral onu qarşısına qatıb, qova-qova meşənin
yanan yerinə gətirib, dedi:
– Siz insanlar evimizi yandırdınız. Meşə sakinlərini qaçqın saldınız. Budur,
biz evsiz-eşiksiz qaldıq. Meşəni siz insanlar yandırdınız, odur ki, sizlər də yeni
meşə salmalısınız.
***
Yanan meşənin yerində böyük insan axını vardı. Hərə əlində bir fidan
gətirib, yanan ağacların yerində basdırırdı.
Yağış yağdı. Fidanları sulandı. Çox keçmədi ki, onlar böyüdülər. Meşə
əvvəlkindən də gözəl göründü. Qaçqın düşən heyvanlar öz vətənlərinə qayıtdılar.
Onlar indi də həmin meşədə xoşbəxt və firəvan yaşayırlar.
68
MÜNDƏRİCAT
Ləya ................................................................................................................................................................. 4
Görməmiş pişik ....................................................................................................................................... 18
Beş barmaq ............................................................................................................................................... 27
Hoppa .......................................................................................................................................................... 31
Lamoşkanın ağ corabları ..................................................................................................................... 33
Merinin yuxusu ........................................................................................................................................ 37
Nənə və tutuquşu ................................................................................................................................... 40
Düyməcik ................................................................................................................................................... 43
Günəş bizim dostumuzdur .................................................................................................................. 47
Külək ............................................................................................................................................................ 50
Göbələkpapaq .......................................................................................................................................... 53
Dandana ...................................................................................................................................................... 57
Sasan ............................................................................................................................................................ 59
Sehrli mücrü ............................................................................................................................................. 61
Meşə və insan ........................................................................................................................................... 64
Uşaqlar, səhifədə öz fikirlərinizi
qeyd edə bilərsiniz.
Qeyd üçün
Təşkilati dəstək:
Ukrayna Azərbaycanlılarının Birləşmiş Diasporu
www.aybkitab.az
www.kitabevim.az
"Yazıçı" nəşriyyatı
"Vektor" nəşriyyatı
"Mütərcim" nəşriyyatı
Yayım Assosiasiyası
"Bayatı" kitab dükanı
Əlaqə telefonu: (+99450) 358 77 55
Kitab «Mütərcim» Nəşriyyat-Poliqrafiya Mərkəzində
səhifələnmiş və çap olunmuşdur.
Çapa imzalanıb: 10.02.2016. Format: 70x100
1
/
16
.
Qarnitur: Times. Həcmi: 4,5 ç.v. Tiraj: 300. Sifariş № 37.
Qiyməti müqavilə ilə.
TƏRCÜMƏ
VƏ NƏŞRİYYAT-POLİQRAFİYA
MƏRKƏZİ
Az 1014, Bakı, Rəsul Rza küç., 125
596 21 44; (055) 715 63 99
e-mail: mutarjim@mail.ru
www.mutercim.az
Dostları ilə paylaş: |