onlara sığınmalı, onlara heç vaxt biganə qalmamalıdır. Əgər bir evdə hami ruha
- ev yiyəsinə hörmətsizlik
olarsa, oraya mütləq bədbəxtçilik gələcək, evin bin-bərəkəti bacadan göyə çəkiləcəkdir.
Evin yiyəsini narazı salmamaq üçün astanadan evə girən adam mütləq salam verməli və deməlidir:
- Salam ay ev yiyəsi. Allah mənim evimi sənsiz eləməsin.
İnama görə, insan əgər öz yiyəsini unutmasa, həmişə onun adını çəksə, ona öz hörmətini bildirsə, o evə nə
qada-bala yaxın gələcək, nə də o evdən bin-bərəkət əskik olacaq».
Yaxud: «İlan evlərdə yaşayan hami ruhlardan hesab olunur. Təsəvvürə görə, evin bütün xeyir-bərəkəti, ailə
üzvlərinin xoşbəxtliyi həmin ilanın əlindədir» [125, s.86 - 87].
Azərbaycanda, hər bir azərbaycanlı ailəsində əcdad ruhuna, valideyn ruhuna, hami ruha səcdə lap
qədimlərdən özünü yaşadır. Ölünün adına, ruhuna duz salmaq müqəddəs bir vəzifə kimi nəsildən-nəsilə
ötürülür. Bu da yuxarıdakı miflə birbaşa əlaqəsi olan ictimai fikir kimi (buna təkcə mifoloji əlamət, görüş
demək düzgün olmaz, həm də milli özünüdərki formalaşdıran keyfiyyət adlandırmaq daha dəqiq olardı) bir
yaşantıdır. H.İsmayılovun tədqiqatında Ata, Baba, Dədə əcdad kultunun nominativ funksiyaları kimi
işarələnmişdir: Ata ibtidai cəmiyyətdə icma başçısı, tanrıçılıq dövrünün patriarxı, Baba deqradasiya olunmuş
tanrıçı ata, tanrıçı dərviş, Dədə sufi dərvişdir, asketik inam daşıyıcısıdır [84, s.64].
3.İlkin halına qayıtma, yəni geri proses, insandan ruha (totem ruhuna) dönmək, reinkarnasiya. Bu, daha çox
mif qəhrəmanlarının öz arzusu ilə quşa, bitkiyə və s. canlıya çevrilməsi ilə müşayiət olunur. Yadda saxlayaq
ki, bu çevrilmədə insan ilə dönən subyekt arasında əlaqə yaradan ruhdur, onun metamorfoz halıdır. İstər
dində, istərsə də mifologiyada bu fikir hakimdir ki, ölənin ruhu başqa şəkildə, formada yeni əmələ gələn
bitkiyə, heyvana, quşa və s. keçir. Bu, reinkarnasiyanın miflərdə geniş yayılmış bir formasıdır, ancaq xüsusi
birforması, həm də az yayılmış birforması da vardır ki, bunlara da tək- tük halda nağıllarda rast gəlinir.
«Kəsik baş», «Quru kəllə», «Ağ atlı oğlan» və başqa nağıllarda ancaq özünə qayıdış, yenidən bərpaolunma
xüsusiyyəti canlanmaq - məhv olmaq tsiklində yaşayaraq, sonrakı dini görüşlərdə «torpaqdan yaranan
torpağa dönəcək» formasında qalmışdır. Belə çevrilmələrdən bəhs edən çoxlu mifləri misal göstərmək olar.
Bunlardan birinin məzmunu belədir ki, «Bir kişi səfərə gedibmiş. Elə olur ki, onun öz evinə qayıtması ilin
axır çərşənbəsinə düşür. Kişi gecə yarı gəlib evinə çatır. Gözlərinə inanmır. Qapıda nə qədər ağac varsa,
hamısı yerə əyilib. Kişinin yadına düşür ki, bu, qocaların söylədiyi Qədir gecəsi olacaq. Bu gecə nə niyyət
eləsən ona çatacaqsan sözlərini xatırlayıb bunu yoxlamaq üçün ürəyinə gələn: «nə olaydı, bir quş olub
uçaydım» - sözlərini qeyri-iradi pıçıldayır. Bu sözlər ağzından çıxan kimi o, sərçəyə çevrilib havaya qalxır.
Amma öz evindən, balalarından heç cürə ayrıla bilmir. Gecə-gündüz öz evinin həndəvərində fırlanır. Bütün
quşlar özlərinə isti yerlər axtarsa da, sərçə öz yurdunu qoyub heç yerə getmir» [125, s.86 - 87].
Azərbaycan türk mifologiyasında ruh ilə bağlı mifik görüşlər və təsəvvürlər yaşayır. Bunlardan biri ruh
tutma ilə bağlıdır [43, s.34]. Mifoloji dünyagörüşün bir hissəsini təşkil edən «ruh tutmaq» hadisəsi zamanı
ruhun həmin bədəni buraxması üçün xüsusi mərasim keçirilir. H.İsmayılov Göyçədə keçirilən ruh tutma
ritualını belə təsvir edir: ocaq üstündə tükdən asılmış qaşıqla xəstəni hansı qohumunun ruhunun tutmasını
müəyyənləşdirir və «qələm çalmaq»la xəstəni mərhumun ruhundan azad edirlər [84, s.19].
Ruh tutma ilə bağlı görüşlərə Azərbaycanın digər regionlarında da rast gəlinir. «Şəki folkloru»nun 1-ci
cildində ruh tutan adamın ölməsi ilə bağlı mif təsvir olunur. Qəbiristanlıqdan keçəndə bir Adam səs edşidir:
- Ay kişi, get kəndə, filan öyə, arvadıma denə durmasın gəlsin, onu gözdiyirəm.
Kişi duruxur. Səs yenə gəlir.
- Saa dimirəm get arvadı çağır? Kişi deyir arvadı necə inandırım?
Həmin anda səs kişiyə bir ot uzadır. Kişi otu əlinə alan kimi görür hər tərəf ruhla doludur. Otu götürür kəndə
gəlir. Kənddə görür arvad ölür. Arvada diyir ki, ərin səni qəbiristanlıqda gözdiyir. Arvadın ruhu kişinin
əlində otu görəndə onun əlindən almaq istəyir. Onlar dalaşırlar. Səs düşür. Arvadlar gəlir, görürlər ki, kişi əl-
qol atır, kiminlə dalaşır görünmür. Ot kişinin əlindən düşür, arvadın ruhu otu götürmək istəyəndə it onu
udur. O vaxtdan deyirlər ki, itlər ruh görəndə ulayır [23, s.50].
Bütün bu miflər ruhun ölməzliyinə, bir haldan başqa hala keçməsinə olan inamlarla bağlıdır. Novruzqabağı
günlərdə də adamlar ölən yaxın adamlarının ruhları ilə görüşmək üçün qəbiristanlıqlara axışır, onların
ruhları şad olsun deyə Yasin oxudurlar. Yazda təbiətin dirilməsi faktını görən qədim insanlar bu dirçəlişlə
bağlı olaraq öz ölülərinin də diriləcəyinə inanmışdılar. Din isə bu ideyadan Qiyamət günü hamının diriləcəyi
faktı kimi istifadə etmişdir. Göründüyü kimi, yuxarıdakı tək sınamalar və ənənə şəklini almış yad etmələr
mifdən sonrakı təfəkkür formasının qalığıdır. Taylor demişkən, «hər hansı mədəniyyət elementinin analizi
vaxtı baxılan təlim və adətlərin ən erkən dövr- dən dini təfəkkürün gec mərhələsinə keçdiyi məlum olarsa,
inkişaf prosesində onların yerini göstərmək lazımdır» [214, s.507 - 508]. Mifoloji şüur mədəniyyət aktı kimi
sonrakı dini təsəvvürlərin əmələ gəlməsində həlledici rol oynayırsa, deməli, belə bir nəticə çıxarmaq olar ki,
milli-dini özünüdərkin formalaşmasında da millətin hafizələrdə yaşayan ən qədim dövrünü müasir sosial-
siyasi dövrlə birləşdirmək, əlaqə yaratmaq vəzifəsi dini təfəkkürün üzərinə düşür. Çünki özünü mifoloji
cəhətdən dərketmə ilə milli özünüdərketmə arasında zaman hüdudu çox böyükdür. Onların predmetləri ayrı
olsa da (mifoloji dərketmədə təbiət, mifoloji-dini dərketmədə ibtidai cəmiyyət, özünüdərketmədə insan
amilləri əsas rol oynayır), subyektləri birdir [138; 157, s.142-154].
Mifologiyada ruh problemi onqonlarla da bağlıdır. Türk xalqları öz onqon- larına tos deyirdilər və bu quşun
ruhu qəbilənin əcdadı sayılırdı. Şamanlar da bu quşun donuna düşməklə öz əcdadlarının nə olduğunu sübut
edirdilər. Ruhları kiçik və əhəmiyyətsiz quş və heyvan olan şamanların hörməti qəbilə içərisində az olurdu.
Şamanların göyə qalxma mərasimində keçədən istifadə olunardı, belə ki, şamanı həmin keçə üzərində
oturdar, 9 dəfə döndərərdilər ki, tanrının yanına uça bilsin. Altay şamanlarının göyə qalxması haqda 1840-cı
ildə yazılan bir raportda şamanizmin əsas prinsipləri əks etdirilmişdir. Bu raporta görə şaman 9 qatı
aşmaqdadır. Pura - şamanın minib göyə çıxdığı atın ruhudur, dini, islami görüşlərdəki peyğəmbərin mindiyi
ata - Buraka oxşayır [133, s.164]. Şamanın ən müqəddəs silahı yay və oxdur. Bahaəddin Ögəl şamanizmi
daha ziyadə kişilər, ailələr və yaxud da ancaq bir qəbilə içində hökmü keçən bir din kimi səciyyələndirir.
Keçmiş türklərdə şamanizmin izlərinə dərvişlərin istədikləri zaman quş və ya heyvan şəklinə düşə
bilmələrində rast gəlinir [199]. Bildiyimiz kimi, şamanlar da tanrı ilə söhbət etmək üçün cildlərini dəyişərək
göyə uça bilirdilər. Bu, şamanların geyindiyi xələtin üzərində əks olunan quş və ya heyvan şəkillərindən də
bəlli olurdu. Üzərində quş və ya heyvan şəkli çəkilmiş libasın mənası vardı. Bununla şaman quş donunu
geydiyi zaman əcdadına yetişəyəcəyini göstərmək istəyirdi. Şəkildən şəkilə düşmək mifoloji araşdırmalarda
metamorfoz adlanır. Bahaəddin Ögəlin yazdığına görə, Əhməd Yasəvi durna donuna, Hacı Bektaş Vəli
göyərçin donuna, Abdal Musa keyik donuna girə bilirmiş [133, s.29].
Türk mifologiyasında don dəyişmənin əsasında sevgi durur. Bahaəddin Ögəlin də gətirdiyi misallarda
igidlərin qızılquşa çevrilməsinə səbəb onların istədikləri qızlara olan sevgisidir. «Kara-Könül adlı bir igid
silkinib atmaca donuna girir. Qızın evinin damına qonur»; «Bir qız quş olub uçur, Tebene kəndindən Koğa
adlı bir gənc də doğan donuna girib qızı qovalayaraq yaxalayır» [133, s.130] və s. «Oxxayla Əhməd»
nağılında da Əhməd qızın eşqi ilə müxtəlif dona düşərək Oxxaya qalib gəlir. «Ağ quş» nağılında isə bu
sevgi olmadığından Ağ quş donunu dəyişə bilmir, ölür. Don dəyişmək təkcə quşlara çevrilməklə olmur,
ilana, qurbağaya da çevrilməyin əsasında sevgi durur. Türk miflərində deyilir ki, «Ölən igidlərin ruhları bir
doğan olub, göyə uçmuşdu». Təsadüfi deyil ki, islam dini görüşlərində də ölən adamın ruhu öz bədənini tərk
edərək göyərçin cildində göyə uçur. Bu don dəyişmənin kökündə prototürk mifoloji görüşləri dururdu. Pəri
qızın donunu gizlətməklə insan oğlu pəri qızların suya olan sevgisinə qısqanclıq edir və nağılların sonunda
bu hərəkətinə görə cəzalandırılır.