_______________Milli Kitabxana___________________
93
Yüz talançı tökülsə
Mənim ruhum talanmaz
Sən saz ol, mən də mizrab
Yoxsa o saz çalınmaz.
Görüşəndə bənzəmə
Sərt qayaya, daşa sən
Gözlərimdə sevinc ol
Gəl, çevrilmə yaşa sən.
Gül ətri axtarırdım
Çöldə kəpənək kimi
Sən çıxdın qabağıma
Bir dəstə çiçək kimi.
_______________Milli Kitabxana___________________
94
MƏHƏBBƏT
- Nədir məhəbbət?
- Açan bir çiçək.
Yanan bir çıraq
Dinən bir ürək.
- Nədir məhəbbət?
Coşan ləpələr,
Oxuyan quşlar,
Gülən körpələr.
-Sevgi bir dəniz,
Mavi asiman.
Onun qoynunda
Gülər hər insan.
- Ürəyə hardan
Gəlir məhəbbət?
- Dünya gülürsə
Gülür məhəbbət.
- Səni sevmişəm
Bir ağ çiçək tək.
Sən də məni sev
Sadiq ürək tək.
- Açan hər çiçək
Təzə sevgidi.
Dinən hər ürək
Təzə sevgidi.
- Ömür üzükdü,
Qaşı məhəbbət.
Insan hissinin
Başı məhəbbət.
_______________Milli Kitabxana___________________
95
DUET
- Ay qız, dənizdir gözün!
- Dəniz tufansız olmaz.
- Ay qız, çiçəkdir üzün!
- Çiçək tikansız olmaz.
- O tufandan, tikandan,
Heç qorxum yoxdur mənim.
- Gözlə, sinəndən keçər
Sözlərim oxdur mənim.
- Başladığın bu dava
Söylə nəyə gərəkdir?
- Dayan, kələkbaz oğlan
Hiylə nəyə gərəkdir?
- Neyləyirik bu cəngi?!
Sən bir çiçək çələngi,
Mən bir şirindil oğlan.
- Sözün şirindir oğlan.
- Anamın öyüdləri
Nə tez çıxdı huşumdan?!
Ağlım uçdu başımdan.
- Ay qız, gözün dənizdi!
- Dənizdi, tərtəmizdi!
Ay qız üzün çiçəkdi
Yanaqlarım ləçəkdi.
- Ləçəkdən doymaq olmaz
Çiçəkdən doymaq olmaz.
_______________Milli Kitabxana___________________
96
BAYKANUR
Gedəsi olsaq
Gərək
Baykanurdan gedək
Allahın yanına.
Hamı Baykanurdan
uçur göyə
Bəlkə elə buna görə
Oljasın misraları
Göylərlə əlləşir
Çingiz Aytmatov
Enmək istəmir yerə.
_______________Milli Kitabxana___________________
97
GƏNCƏ
Dedilər bir söz qoş doğma şəhərə,
Şeir təzə olsun, söz təzə olsun.
Tök könül varını ağ vərəqlərə,
Ocaq təzə olsun, köz təzə olsun.
Bəzənir, bəzəyir ana torpağı,
De onun hüsnündən kimlər doyubdu?!
Yenə payız gəlib, bayramsayağı
Çinarlar başına xına qoyubdu.
Gəncə sökülən dan, açılan səhər
Mən onun qoynunda bitən çiçəyəm.
Məni sinəsində gəzdirən şəhər,
Səni ürəyimdə gəzdirəcəyəm.
1970.
_______________Milli Kitabxana___________________
98
MƏN GEDƏSI OLSAM...
Başladı əsməyə xəzan yelləri
Mən gedəsi olsam küləklər ilə
Gedin, başa salın bizim elləri
Hər il qayıdacam çiçəklər ilə
Məni basdırmayın, əkin torpağa
Göyərib qalxacam ağaclar kimi,
Yazda çevriləcəm yaşıl yarpağa
Payızda güləcəm qızıl nar kimi
Dilə gətirməyək suçlarımızı
Sonra bilərsiniz mən kiməm, nəyəm
Əllərim gəzəcək saçlarınızı
Günəş şüasına çevriləcəyəm
Qulaq verərsiniz hər gələn səsə
Sizə əl eləyən yarpaq olaram
Qəlbiniz bir həzin nəğmə istəsə
Dağlarda çağlayan bulaq olaram
Qoy heç kəs çəkməsin dərdi – sərimi
Daim aranızda yaşayasıyam
Gül – çiçək qoxuyan nəvələrimi
Ömürlük çiynimdə daşıyasıyam
_______________Milli Kitabxana___________________
99
Şeir oxuyacam mən uşaqlara
Böcəyin, çiçəyin təmiz dilində
Xəzər nağıl desə qayalıqlara
Mənəm danışıram dəniz dilində
Qorxmayın, qoy əssin xəzan yelləri
Nə olsun
gedərəm küləklər ilə
Gedib öyrənəcəm kəsə yolları
Hər gün qayıdacam mələklər ilə