birindən o qədər də fərqlənmirdilər... Onlar Səfəvilərdən əvvəl də bu və ya digər
dərəcədə siyasi ittifaqda
olmuş, xüsusilə Qaraqoyunluların, Ağqoyunluların dövründə daha sıx birləşmişdilər. Və bu baxımdan
Səfəviləri hətta özündən əvvəlki Azərbaycan dövlətlərinin bilavasitə varisi hesab etmək olar. Lakin onu
da etiraf etmək lazımdır ki, XV əsrdəki kimi, Səfəvilər dövründə də Azərbaycan türk tayfaları hakimiyyət
uğrunda mübarizədən əl çəkməmişdilər, yerli hakimlər — tayfa başçıları həm bir-birləri ilə münaqişəyə
girir, həm də Səfəvilər sarayının intriqalarında fəal iştirak edirdilər.
I
Şah İsmayıl (və onun xələfləri) yalnız hakimiyyətlərinin əsas dayağı olan türk tayfalarına deyil,
ölkə daxilində bu və ya digər dərəcədə nüfuza malik qeyri-türklərə də həm sarayda, həm də orduda
müəyyən yer verirdilər. Bu baxımdan talışları, kürdləri xüsusi qeyd etmək lazım gəlir... Əlbəttə,
Səfəvilərin həmin siyasəti
təsadüfi deyildi, Azərbaycan cəmiyyətinin etnosiyasi təmərküzləşmə
ehtiyacından irəli gəlirdi. Və dövlət quruculuğu sahəsində böyük istedadı olan Səfəvilər bu ehtiyacı
nəzərə almaya bilməzdilər... I Şah İsmayıl (və onun sələfləri!) tərəfindən əsası qoyulmuş dövlətin kifayət
qədər güclü ideologiyası vardı, "qızılbaşlıq" adlandırıla bilən həmin ideologiya köçəri türk əsilzadələri
arasında geniş yayılmışdı. Ona görə də Səfəvilər böyük bir coğrafiyada — Azərbaycanda (və həmhüdud
regionlarda) yaratdıqları dövləti idarə etmək üçün tədricən ordudan daha az istifadə edirdilər. Əslində,
haqqında söhbət gedən "qızılbaşlıq" ideologiyası ordunun özündə də böyük birləşdirici rola malik idi.
Səfəvilər dövlətinin Azərbaycan dövləti olduğuna şübhə etmək, onu,
ümumiyyətlə, (?) İran
dövləti saymaq özünü qətiyyən doğrultmur — O. Əfəndiyevin qeyd etdiyi kimi, dövlətin əsasını qoyanlar
da, onun yüksəlişini təmin edənlər də Azərbaycanda artıq məskunlaşmış köçəri türk tayfaları idilər; Sə-
fəvilərin dövlətçilik düşüncəsi, inzibati idarə sistemi bütünlüklə qədim türk dövlətçilik ənənələrindən irəli
gəlirdi. Və dövlətin mərkəzi olan Təbrizdə (o cümlədən də sarayda), orduda türkcə danışırdılar. I Şah
İsmayıl (və onun xələfləri) ənənəni "pozaraq" bir sıra fərmanlarını farsca deyil, məhz türkcə vermişdilər...
Azərbaycan Səfəvilər dövləti bir əsrdən sonra — XVI əsrin sonu, XVII əsrin əvvəllərində öz
tarixi tipologiyasını itirsə də, Azərbaycan xalqının formalaşmasında,
demək olar ki, həlledici rol oynadı.
XVII əsrin əvvəllərindən başlayaraq, ümumiyyətlə, regionda nə qədər böyük siyasi hərc-mərclik olsa da,
xalqın etnik, sosial-siyasi, mədəni konsentrasiyası prosesi kəsilmədi, bu və ya digər şəkildə davam etdi.
Hətta Azərbaycanın xanlıqlara parçalandığı XVIII əsrin ikinci yarısında da Azərbaycanın
mənəvi-ruhi
bütövlüyü güclənməkdə idi.
...
Azərbaycan xalqının formalaşması geniş miqyaslı milli intibah hərəkatı ilə müşayiət
olunurdu... Yalnız belə bir faktı qeyd etmək lazımdır ki, XVI əsrin əvvəllərindən başlayaraq Azərbaycan
ədəbiyyatının şedevrləri meydana çıxdı: "Koroğlu" eposu, xüsusi yaradıcılıq enerjisinin məhsulu olan
aşıq sənəti, xalq dastanları... Və həmin əsasda formalaşan milli yazılı ədəbiyyat, M. V. Vidadi,
M. P. Vaqif... Azərbaycan intibahı yalnız dil, ədəbiyyat və mədəniyyəti əhatə etmirdi, bütövlükdə milli
təfəkkürü, xalqın ruhunu hərəkətə gətirmişdi. İtaliya, Fransa, İspaniya... İntibahı kimi, Azərbaycan
İntibahı da xalqın etnososial, siyasi-ideoloji mədəni təmərküzləşməsinin ən
mühüm göstəricilərindən biri
sayıla bilər.
XVII—XVIII
əsrlərdə Azərbaycan dili — Azərbaycan türkcəsi demokratik təfəkkürün ifadə
forması olaraq yalnız azərbaycanlılar arasında deyil, Azərbaycanda yaşayan digər xalqlar arasında da
geniş yayılmış ünsiyyət vasitəsi idi. Ermənilər, gürcülər, dağıstanlılar... Azərbaycan sənətkarlarını təqlid
edərək Azərbaycan türkcəsində yazıb-yaradır, möhtəşəm Azərbaycan İntibahının təsirini öz üzərlərində
hiss edirdilər. Və onu da qeyd etmək lazımdır ki, Azərbaycan İntibahının bütün gücü ilə təzahür
etdiyi
XVII—XVIII əsrlərdə İran mədəniyyəti, demək olar ki, tənəzzül dövrü keçirirdi — bu da milli
formalaşma mərhələsində azərbaycanlıların iranlılardan (farslardan) tamamilə fərqli bir etnokulturoloji
həyat yaşadığını göstərirdi...
Azərbaycan İntibahı,
hər şeydən əvvəl, ölkənin daxili oyanışını təmin edir, müxtəlif vilayətlər,
regionlar mənəvi-mədəni baxımdan yüksəlirdi. Azərbaycan İntibahı milli xarakteri etnik (mifoloji)
təfəkkür əsasında tərbiyə edir, qədim (ümumi) türk düşüncəsi yaradıcılığın etnotipoloji əsasında
dayanırdı. Və "arxaik" janrlar — xalq şeiri şəkilləri yazılı ədəbiyyatın geniş istifadəsinə verilməklə
yanaşı, klassik (ümumşərq) şeir janrlarında da formanın "demokratikləşdirilmə"sinə cəhd edilirdi.
Azərbaycan ədəbiyyatının (və ədəbi dilinin) demokratikləşməsi, yaxud xəlqiləşməsi, həmin
sahədəki standartların, normaların pozulması ilə müşayiət olunmur. Əksinə, milli (daha doğrusu,
milliləşmiş!) təfəkkür özünün daha mükəmməl formalarını, modellərini yaradır. Və dilin, ədəbiyyatın,
mədəniyyətin demokratik əsaslar üzərində "yenidən təşkil"i xalqın etnokulturoloji təmərküzləşməsi
prosesinə əhəmiyyətli təsir göstərir.
...
Azərbaycan xalqının formalaşması,
heç şübhəsiz, etnoqrafik, sosial-siyasi, mənəvi, mədəni...
məsələləri özündə ehtiva edən mürəkkəb bir prosesdir. Buraya antropoloji məsələlər də aiddir...
Ə. S. Sumbatzadə R. M. Qasımovanın "tədqiqatlarına əsaslanaraq göstərir ki, türk tayfalarının
Azərbaycana təxminən on üç əsr davam edən axını, yerli avtoxton əhali ilə qarışması azərbaycanlıların
antropoloji simasının hər hansı köklü dəyişməsinə gətirib çıxarmadı — bunun əksinə olaraq,
gəlmə türk