211
Taksilər harda dayanır?
Təhminə:
—Yox, — dedi, — mən bura tez gəlmişəm, — sənin
təyyarəni gözləyən vaxt buradakı meşədə gəzdim. Bilirsən nə
gözəl meşədir... Gedək göstərim sənə...
Şosedən çıxıb şam meşəsinə girdilər. Zaur Təhminəni
öpmək istədi, amma Təhminə barmağını dodaqlarına qoyub:
—Sss, dayan, bir qulaq as, — dedi...
İnanılası deyildi, amma Zaur həqiqətdə də eşitdi... Adamın
ağlına sığışmırdı ki, burada, təyyarə uğultusundan qulaq batan
müasir aerovağzalın yaxınlığında, üstündən vıyıltıyla elədən-belə
maşınlar keçən şosenin lap böyründə — quşlar cəh-cəh vururdu,
elə bil bütün bu hay-küyü vecinə almırdılar...
Zaur:
—Lap bülbül kimi cəh-cəh vururlar, — dedi.
—Doğrudan, adam heç inana bilmir, hə? Gül-bülbül, aşiq-
məşuqə gülməlidir eləmi?.. Orta əsr qəzəllərindən çıxıb
gəliblər elə bil... Amma Zaurik, bu ki, yalan deyil, əzizim,
doğrudan da, elə bil bülbül oxuyur. Özü də zalım gör nə baş
alıb gedib, gör necə cəh-cəh vurur... Bizimçün oxuyur, e, Zaur,
eşidirsən.
Qollarını Zaurun boynuna doladı. — Qulaq as, Zaurik. —
Təhminə indi pıçıltıyla danışırdı. — Gərək mən sənə bu sözü
deməyəydim. Bilirəm bunu demək düz deyil, gərək deməyəm...
amma... sevirəm səni, Zaurik... dəli kimi sevirəm... Sənsiz dura
bilmirəm... Səndən başqa heç kəs lazım deyil mənə... bilirəm
gərək deməyəydim bütün bunları sənə... — güldü. — İndi
quduracaqsan yəqin, dartıb özüvü qoyacaqsan dağ başına...
amma neyləyim, demək istəyirdim bunları sənə...
Zaur da pıçıltıyla dedi:
—Təhminə, yəqin mən də sənə deməməliyəm bu sözləri,
amma mən də deyəcəyəm: ölürəm səninçün, Təhminə... Sənsiz
bir saat, bir dəqiqə qala bilmirəm... Bax, indi bu saat yıxılıb ölə
bilərəm xoşbəxtliyimdən. İstəyirsən çıxım şoseyə, özümü atım
212
maşının altına, bax bu saat, bu dəqiqə...
—Dəli, maşının altına niyə atırsan özünü.
Onlar meşənin içiylə gəzirdilər və Zaur elə hey danışırdı.
Təhminəni televizorda görməsindən, öz ad günündən,
qonaqlardan, qonşulardan, hətta Firəngizi ona ərə vermək
niyyətlərindən... Zaur indi yaşadıqları anların səadətiylə o
dərəcədə sərxoş idi ki, bu xəbərin Təhminəni ağrıda biləcəyini
heç ağlına da gətirmirdi: içi bəxtiyarlıqla limhəlim elə
dolmuşdu ki, bu bəxtiyarlığın bütün ətrafdakılara da sirayət
edəcəyinə, onları da xoşbəxtlik dəryasına qərq edəcəyinə
şübhəsi yoxdu... Doğrudan da, bu xəbəri eşidəndə ani bir kölgə
keçdi Təhminənin sifətindən, amma o dərhal gülümsündü və
Zaurun Firəngizlə evlənməsini zarafata saldı.
Təhminə onu öpürdü. Moskvaya gəlmələrindən, verilişdən
danışırdı, deyirdi ki, burada yaman bəyəniblər verilişi də,
Təhminənin veriliş aparmasını da... Meşədən çıxıb şoseylə
addımladılar. Moskvayacan piyada getmək istəyirdilər, —
Moskvaya isə yetmiş kilometr qalırdı...
Zaur indi sevdiyinə də əmin idi, sevildiyinə də və sevgi onu
elə qüvvətli bir xoşbəxtlik duyğusuna bürümüşdü ki, heç bir
şey bu səadəti yaralaya bilməzdi və ona görə də Zaur Spartak
söhbətini də elə-belə, sözarası saldı, dedi ki, bu qeybətlər neçə
gün məni dəli-divanə eləmişdi... neçə gecə yuxumu qaçırmışdı.
Təhminə:
—Ay səfeh, gör bir kimə qısqanırsan, — dedi. — Adam da
hər axmaq sözə, hər iyrənc qeybətə inanar?.. Spartak gicbəsərin
biridir... heç ağlıva sığışdıra bilərsən ki, onunla mənim aramda
bir şey ola bilər? Yəni heç məni tanımırsan? Ya onu tanımırsan
bəlkə? Demişəm sənə ki məsələ necədir. Spartak mənim bir
rəfiqəmlə görüşürdü və həmin o rəfiqəmin xahişi ilə bir-iki
dəfə zəng eləmişəm Spartakgilə, bu, düzdür! Anası da yəqin
sonra bilib ki, zəng eləyən mənəm... Amma mənimlə ömründə
iki gəlmə kəsməyib anası, o da ki, qalsın davamız ola... Mən
yəni o günə qalmışam ki, onun anasıyla ağız-bağıza verim?..
213
Əcəb fikirdəsənmiş mənim haqqımda.
Zaur indi, Spartak sarıdan tam bir arxayınçılıq duyarkən
Dadaşın dediyi o televiziya rejissoru haqqında da soruşmaq
istədi, heç olmasa bilsin görək o da burada Moskvadadırmı.
Amma bunun nə mənası vardı, madam ki, Təhminə Zauru bura,
yanına çağırmışdı və Zaur gəlmişdi, — onda deməli, həmin o
rejisorun Moskvada olub-olmamağının Təhminəyçün heç bir
təfavütü yox imiş… Yaxşı, bəs Dadaşın dediyi o baza
müdirləri, alverçilər — Təhminənin tanış-bilişləri, o barədə
necə, söz salsınmı? Amma Təhminə, sanki Zaurun fikirlərini
oxuyubmuş kimi özü danışmağa başladı:
—Zaurik, — dedi, — bunu bil: mənim barəmdə çox şey
danışırlar və bundan sonra, məhz bax elə sənə daha çox iftiralar
uydurub deyəcəklar... Əgər ürəklərinə damsa ki, biz səninlə
doğrudan-doğruya xoşbəxtik, bunu heç bir vaxt
bağışlamayacaqlar bizə... Yüz çirkab tökəcəklər başımdan və
çalışacaqlar ki, bunların hamısı sənin qulağına çatsın. Amma
mən istəyirəm ki, sən bir neçə şeyi dəqiq biləsən, Zaur.
Birincisi odur ki, mələkə-zad deyiləm, bu barədə heç bir
illüziyan olmasın. Amma bu da həqitətdir ki, mən hələ heç kəsi
səni sevən kimi sevməmişəm və indiyəcən hələ heç kəsə də
deməmişəm ki, onu sevirəm... Bax ən böyük, ən əsas həqiqət
budur... Zaurik, dünyada bir həqiqət, bircə həqiqət var —
qəlbin həqiqəti və səadət, xoşbəxtlik də elə budur, vallah. Bax,
bu axşam var dünyada, bu meşə var, quşlar oxuyurdu bu
meşədə, sən varsan, mən varam, bir-birimizi sevirik, bir yerdə
olanda bəxtiyar oluruq, — budur bax həqiqət və bundan başqa
heç bir ayrı həqiqət yoxdur. Sən uçub Moskvaya gəlmisən,
orada aerodromun qalereyasında uzaqdan səni görüb bilirsən
necə sevindim! Bəs sən?..
—Mən də...
—Görürsən... Bax bu dəqiqələr var e, bu şoseylə Moskvaya
gedirik ikimiz — sən və mən, — bəxtiyarlıq budur, Zaurik,
həqiqət, ən böyük həqiqət də budur... Ayrı bir həqiqət arama
Dostları ilə paylaş: |