ŞƏrq ekspressində QƏtl (roman) I hissə faktlar
Yüklə 4,8 Kb. Pdf görüntüsü
|
yarım saat öncə öldürülüb və qatil vəziyyəti azdırmaq, alibi verməkdən ötrü saatı ikiyə on beş dəqiqə işləmişə gətirib. Puaro: – O qədər də etibarlı alibi deyil, – dedi. – Saat ikiyə on beş dəqiqə işləmişi göstərirdi. Qonşu kupedəkı adam cinayət yerindən tam o saatda ayrılıb. Bukun fikirləri dolaşmışdı bir az. – Doğrudur. O halda, sizcə, saatın mənası nədir? – Əgər saat irəliyə çəkilmişsə, o zaman göstərdiyi zamanın mənası var. Əgər qəsdən irəli çəkilmişsə, o zaman saatın göstərdiyi dəqiqədə, yəni ikiyə on beş dəqiqə işləmiş harada olduğuna, nə iş gördüyünə dair etibarlı alibisi olan adamlardan şübhələnsək, daha təbii olar. Doktor: – Bəli, bəli, – deyə başını yellədi. – Bu, məntiqə uyğundur. – Bundan başqa, o adamın kupeyə nə zaman girdiyinə diqqət göstərməliyik. Bunu etməkdən ötrü nə zaman fürsət tapdı? Əgər bələdçinin bu işlə bir əlaqəsi olmadığını düşünsək, o zaman yandakı kupeyə girmə fürsətini ancaq bir dəfə əldə edib. Yəni qatar Vinkovcidə dayandığı zaman. Qatar oradan çıxdıqdan sonra bələdçi üzü koridora dönmüş vəziyyətdə oturub. Yolçular yataqlı vaqon məmuruna fikir verməzlər, ancaq əsl bələdçi belə bir saxtakarı o saat görərdi, şübhəsiz. Ancaq qatar Vinkovcidə dayandığı sırada bələdçi də perronda olub. Yəni koridor boş olub. Buk: – Yenə başladığımız nöqtəyə qayıtdıq, – dedi. – Qatil yolçulardan biridir. Ancaq hansı? Puaro gülümsədi: – Mən bir siyahı yazdım, – dedi. – Əgər istəyirsinizsə, buna baxa bilərsiniz. Ola bilər, bəzi şeyləri təzədən yadınıza salar. Doktor və müsyö Buk kağıza doğru əyildilər. Kağızda aydın xətlə yolçuların adları dindirildikləri sıra ilə yazılmışdı. 1. Hektor Makkuin: Amerika vətəndaşı. 6 nömrəli kupe. İkincidərəcəli. Cinayətin motivi: öldürülənlə münasibətlərdə meydana çıxa bilərdi. Alibi: saat 12-dən gecə 2-yə qədər (12-dən 1.30-a qədər polkovnik Arbetnotun dediyinə görə, 1.15-dən 2-yə qədər bələdçinin dediyinə görə). Dəlillər: yoxdur. Şübhəli görünən məqamlar: yoxdur. 2. Bələdçi Pyer Mişel: Fransa vətəndaşı. Cinayətin motivi: yoxdur. Alibi: saat 12-dən gecə 2-yə qədər (E.P. saat 12.37-də, Retçettin kupesindən səs eşitdiyi zaman onu koridorda görüb. Saat 1-dən 1.16-ya qədər olan alibini başqa iki yolçu da təsdiq edir). Dəlillər: yoxdur. Şübhəli məqamlar: bizim tapdığımız bələdçi uniforması daha çox onun xeyrinədir, çünki, çox şeyə əsasən demək olardı ki, ondan şübhələnməkdən ötrü qəsdən atılıb. 3. Eduard Masterman : İngiltərə vətəndaşı. Kupe nömrəsi 4. İkincidərəcəli. Cinayət motivi: öldürülənlə münasibətlərdən qaynaqlana bilər. Alibi: yoxdur, təkcə bir istisna ola bilər, bədən ölçülərinə görə bələdçi uniforması ondan başqa kimsəyə uyğun deyil. Başqa bir yandan, o, fransızca yaxşı danışa bilmir. 4.Missis Habbard. Amerika vətəndaşı. Kupe nömrəsi 3. Birincidərəcəli. Cinayət motivi: yoxdur. Alibi: saat 1-dən 2-yə qədər yoxdur. Dəlillər və şübhəli məqamlar: Hardmanın və Şmidtin ifadələri ilə təsdiq olunan, gecə onun kupesinə girmiş adam haqqında hekayət. 5. Qreta Olson. İsveç vətəndaşı. Kupe nömrəsi 10. İkincidərəcəli. Cinayət motivləri: yoxdur. Alibi: saat 12-dən 2-yə qədər (Mari Debenham tərəfindən təsdiqlənir). Qeyd: Retçetti sağ ikən görən son adam. 6. Knyaginya Draqomirova. Fransa vətəndaşlığını qəbul edib. Kupe yeri 14. Birincidərəcəli. Cinayət motivi: Armstronq ailəsinin yaxın dostu və Sonya Armstronqun xaç anası olub. Alibi: saat 12-dən 2-yə qədər (bələdçi və qulluqçu tərəfindən təsdiqlənir). Dəlillər və şübhəli məqamlar: yoxdur. 7. Qraf Andreni: Macarıstan vətəndaşı. Diplomatik pasportlu. Kupe nömrəsi 13. Birincidərəcəli. Cinayət motivi: yoxdur. Alibi: saat 12-dən 2-yə qədər (saat 1-dən 1.16-ya qədərki vaxt istisna olmaqla bələdçi tərəfindən təsdiq edilir). 8. Qrafinya Andreni. Britaniya vətəndaşı. Kupe nömrəsi 12. Cinayət motivi: yoxdur. Dəlillər: saat 12-dən gecə 2-yə qədər (trional içərək yatıb. Ərinin ifadəsiylə təsdiq olunur. Dolabında trional qabı var). 9. Polkovnik Arbetnot: Britaniya vətəndaşı. Kupe nömrəsi 15. Motiv: yoxdur. Alibi: saat 12-dən gecə 2-yə qədər (1.30-a qədər Makkuinlə danışıb, sonra öz kupesinə çəkilib və oradan çıxmayıb. Makkuinin və bələdçinin ifadələriylə təsdiqlənir). Dəlillər və şübhəli məqamlar: trubka təmizləmək üçün fırça. 10. Sayrus Hardman. Amerika vətəndaşı. Kupe nömrəsi 16. Birincidərəcəli. Cinayət motivi: məlum deyil. Alibi: saat 12-dən gecə 2-yə qədər kupedən çıxmayıb (Makkuin və bələdçi tərəfindən təsdiqlənir). Dəlillər və şübhəli məqamlar: yoxdur. 11. Antonio Foskarelli. ABŞ vətəndaşı (italyan mənşəli). Kupe nömrəsi 5. İkincidərəcəli. Cinayət motivləri məlum deyil. Alibi: saat 12-dən gecə 2-yə qədər (Eduard Mastermanın ifadəsiylə təsdiqlənir). Dəlillər, şübhəli məqamlar: yoxdur, təkcə müsyö Bukun fikrincə, cinayətin yalnız temperamentli bir insanın törədə biləcəyi bir silahla işlənmiş olması istisna olmaqla. 12. Mari Debenham. Britaniya vətəndaşı. Kupe yeri 11. İkinci dərəcəli. Cinayət motivi: yoxdur. Alibi: saat 12-dən gecə 2-yə qədər (Qreta Olsonun ifadəsiylə təsdiq olunur). Dəlillər və şübhəli məqamlar: Erkül Puaronun eşitdiyi söhbət, qızın bu söhbəti açıqlamaqdan boyun qaçırması. 13. Hildaqarda Şmidt. Almaniya vətəndaşı. Kupe yeri 7. İkincidərəcəli. Motivlər: yoxdur. Alibi: saat 12-dən gecə 2-yə qədər (bələdçinin və knyaginya Draqomirovanın ifadələriylə təsdiqlənir). Yüklə 4,8 Kb. Dostları ilə paylaş:
|