Şamxorlu aşıq Teymur da, Məsim də gəldi. Çal-çağır başlandı, həyət, ev-
eşik toy-bayrama döndü.
Eh, ömrün necədə gözəl, dadlı günləri vardı, ötüb keçdi. Heyf, - deyə Aftab
xala yanıqlı-yanıqlı fikirləşdi. Əlinin arxası ilə nəmli gözlərini sildi. Həyətinə
girəndə gözü bir müddət nəyisə, kimisə axtardı. Dayandı, duruxub diqqətlə ətrafına
baxdı. Nəzərləri qoca tut ağacının altında qərar tutdu. Şair burda oturardı. İri,
qaynar gözlərini zilləyib, bir-birinin dalınca papiros çəkərdi.
- Bax, burda oturmuşduq - Səməd, mən, Xavər, bir də böyük qızım Zenfira.
Ailəvi söhbət edirdik. - Aftab xala ayaq üstə dayanıb öz-özünə danışırdı. Birdən
darvaza açıldı. Tat Heydər içəri girdi.
- Bu kimdi, a yengə, - deyə Səməd soruşdu. Aftab xala gələnə etinasızlıqla:
- Ay Səməd, - dedi, - sən atanın goru, otur yerində, qoy bir dərdimizdən,
azarımızdan danışaq, sənin heç bu başının yığnağı kəsmir, qonşumuzdu, Tat
Heydərdi, neynirsən...
Səməd isə canıyananlıqla:
- Nə olsun Tat Heydərdi, o adam döyülmü, qoy görüm, nə yaxşı gəlib, nə
istəyir?
Xavər də:
- Otur, - dedi, - səhərdən nə qədər adam yola salmısan, otur yerində,
yorulmusan...
Amma Səməd heç birinin sözünə əhəmiyyət vermədi. Durub Tat Heydərin
qabağına getdi. Əl verib görüşdü.
Tat Heydər qoca, kasıb güzəranlı bir kişi idi. Klassik Şərq ədəbiyyatından,
xüsusilə şeyx Sədidən müdrik kəlamlar deməyi çox sevirdi. Doğma qardaş kimi
şairi qucaqladı. Əyilib şairin əlindən öpdü.
- Niyə əlimdən öpürsən, a kişi, öpüşmək istəyirsən gəl əməlli-başlı, bax,
belə öpüşək, - deyib Tat Heydərin üzündən öpdü.
Tat Heydər:
- Səməd, ay oğul, - dedi, - bu əllər qızıldan qiymətlidi, öpülməlidi. Bu əllərin
yaratdığı milyonların qəlbini kəm eləyibdi.
Tərifdən xoşu gəlməyən şair söhbətin yönünü bir az dəyişdi:
- Nə yaxşı bərilərə gəlibsən, xeyir ola, a kişi, mənə görə, qulluq?
- Heç, elə-belə, səni görməyə gəldim.
Şair zarafatla:
- Allahsız oğlu, - dedi, - mən kiməm ki, mən də sizin kimi bir insanam.
Sonra kişinin xətrinə dəyəcəyindən ehtiyat edib:
- Yaxşı eləyibsən, çox sağ ol, gəl otur, söhbət eləyək.
Şair onu keçmişlərdən sorğu-suala tutdu. Söhbətlərinə aludəliklə qulaq asdı.
Dolanacağını, ailəsini soruşdu. Üst-başının köhnəliyini görüb, onun nimdaş
çuxasının cibinə bir neçə yüzlük qoydu:
- Tütün puludu, elə bir şey deyil, Heydər dayı...
Aftab xala düşüncələr içində irəli yeridi. Həyət-bacada heç kəs yox idi.
Günəş günorta yerinə qalxmışdı. Arvad bütün varlığı ilə Səmədli günlərinə
qayıtmışdı. Günorta qatarı fit verib sürətlə Dəllər stansiyasına girdi. Qatarın səsi
onu diksindirdi.
...1950-ci ilin yayında Kislovodskdan qayıdanda perronda gəzir, qatarın
gəlməsini gözləyirdi. Birdən kimsə:
- Salam, a yengə, səfərin uğurlu olsun, hardan belə? Gəl oturaq, söylə
görüm, nə var, nə yox, - dedi.
... Səməd uşaqları, ev-eşiyi, qohumları soruşdu.
- Bə əmioğlu, səni niyə tək buraxıb, - dedi. - Sonra gülə-gülə: - Əmioğlu da
az bilmir, bilir ki, yengəmi dəyirmanın boğazına ölü salsan diri çıxar.
Səməd kürəyini stola söykəyib yayxandı:
- Of, - dedi, - nə gözəl havası var bu Kislovodskın, adam heç ayrılmaq
istəmir burdan. Ancaq Vətən, Bakı bizi öz qoynuna çağırır. Vətən yaman şirindi, a
yengə, adam beş gün ayrılanda, altıncıda onun üçün darıxır. - Şair bir az da yaxın
oturub; - A yengə, - dedi, - indi bilirsən nə ola burda? - Onun cavabını
gözləmədən - qoyunun arsalası, soyutmasını deyirəm eyy, alasan əlinə, çəkəsən
dişinə. Yanında bir nazənin ceyran ola daha sən yox ey, - deyib bərkdən güldü.
Aftabın çiyinlərini mehribancasına qucaqladı. Sonra qohumluq ərkilə: - Olmaya
xətrinə dəydi, a yengə, vallah, səni çox istəyirəm, ona görə də sərinlə görürsən hələ
də uşaqlıq zarafatı eləyirəm.
Səmədin sözündən inciməkmi olardı? İncimədi də Aftab xala. Balaca
sumkasını açıb həmişə özü ilə gəzdirdiyi şəkli axtarıb tapdı. Bu ailəvi şəkil
Səmədlə birgə çəkilmişdi. Elə burda, bu həyətdə. İndi Aftab xala bu şəkil çəkilən
yerdə tək-tənha əyləşmişdi. Ehtiyatla əlini şəklin üstündə gəzdirdi. Yaşdan
dumanlanmış gözlərini yumdu. İri yaş damcıları üzünün qırışları ilə axıb çənəsində
dayandı. Yazıq, kimsəsiz adam kimi həyətdəki tut ağacının dibində tənha oturan
arvad ötən günləri beynində, fikrində hey vərəqlədi.
...Min doqquz yüz əlli beşinci ildə Aftab xala böyük qızı Zenfiranı
köçürəndə Səməd Moskvada olduğuna görə toya gələ bilməmişdi. Toydan xeyli
sonra gəlib çıxan şair təzə kürəkənlə çox maraqlanır, onu görmək istəyirdi. Aftab
xalanın əri İbrahim, rayon partiya komitəsinin katibi, şairin dostu Bilal
Ağamalıyev və Səməd yenə bu tut ağacının kölgəsində oturub çay içə-içə söhbət
edirdilər. Darvaza açıldı. İçəri cavan, gödəkboylu bir oğlan girdi. Qayınata İbrahim
gələn oğlanı göstərib dedi ki, budu ay Səməd, mənim kürəkənimdi. Şair
özünəməxsus ərkyanalıqla:
- A bala, buraya gəl görüm, - deyə yanına çağırdı. Ona başdan-ayağa
diqqətlə baxıb: - Bir de görüm, o gözəl, ceyran qızımız Zenfiranı sənin nəyinə
veriblər? - soruşdu.
Kürəkən gözləmədiyi sualdan duruxdu. Rəng verib, rəng aldı. Hiss etdi ki,
şair onun boyunun balacalığına işarə vurur. Özünü toxtadıb:
- Ağlıma, kamalıma, boyuma, buxunuma, - deyib yerə baxdı.
Oturanların hamısı gülüşdü. Səməd cəld ayağa qalxdı. Onu oğlu kimi
qucaqlayıb:
- Əyə, - dedi, - eybi yoxdu, qızıl da balacadı. - Üzünü əmisi oğlu İbrahimə
tutub:
- A İbrahim, sağ olsun, əla kürəkənin var, hazırcavablıqda bizə Vəkilovlara
çəkib, - dedi.
Aftab xala əli çənəsində ömrün elə şirin günlərinə qayıtmışdı ki, ətrafda baş
verən heç nəyi hiss edib görmürdü. Onun gözündə əli belində bu həyətdə ərklə
gəzən, deyib-gülən ağsaçlı, qaraşın Səməd Vurğundan başqa heç kəs yox idi. Aftab
xala onun son günlərini, son gəlişini fikirləşəndə yanıb-yaxılırdı. Kimin haradan
ağlına gələrdi ki, bu onun son gəlişi, son zarafatları olacaqdı. Gecə-gündüz
qulağından bir səs getmirdi: “Səni hamıdan çox istəyirəm, a yengə”.
Aftab xala oturmaqdan üyüşmüş dizlərini övkələdi. Sanki qanı damarlarında
donmuşdu, daha axmırdı. Yaş gilələnmiş iri, ağıllı gözlərini çöl qapısından ayıra
bilmirdi. Ona elə gəlirdi ki, iyirmi dörd il əvvəlki kimi indicə bu yaşıl darvaza
açılacaq, qalın, ağ saçları çiyinlərinə dağılmış peyğəmbərə oxşayan Səməd Vurğun
gülə-gülə içəri girəcək. Məğrur, gur səslə:
- Xoş gördük, a yengə, - deyəcək...
- Canına qurban olum, ay Səməd, səndən nə yaxşı?
- Necə yanı nə yaxşı, a yengə? Bəs qohum qohumun evinə gəlməzmi?
- Gələr, ay Səməd, niyə gəlməz, qurbanın olum, deyirəm, nə yaxşı belə
ailəlikdə gəlmisən. Bir ildə iki dəfə?
- Hə, a yengə, bunu yaman dedin. Fikirləşdim ki, ölüm-itim dünyasıdır. Qoy
uşaqlar bir-birini tanısınlar, mehriban olsunlar.
Onda bütün günü üzdə Səmədə mehribanlıq göstərən Aftab xala dərdini
ürəyində çəkdi. Dinməz-söyləməz. Səmədin bu sözü onu odsuz-ocaqsız yandırırdı:
“Ölüm-itim dünyasıdır”. Arvadın ahına od tutsan, püskürüb yanardı. Gözünü
Səmədin üzündən çəkə bilmirdi. Özü də anlaya bilmirdi ki, bu nə sirdir. Şair arabir
onu zarafatla dindirər, yaxınlaşıb doğma bacı kimi qucaqlar, yenicə dən düşmüş
saçlarını qayğılı-qayğılı sığallardı. Aftab xala gecəni yata bilmədi. Qovruldu, ah
çəkdi. Bir müddət qaranlıq tavana baxa-baxa qaldı:
- A İbi, - dedi, ərini oyatdı, - Səmədin bu gəlişindən heç gözüm su içmir.
- Niyə, nə olub ki? - İbrahim hövlnak soruşdu.
- Heç, nəsə elə bil ürəyimə damıb ki, bu onun bizimlə son görüşüdü.
- Nədi danışdığın, dəlisən, nəsən, deyəsən yuxu görürsən. İbrahim arvadını
danladısa da onun da ürəyində şübhə yeri aldı. Dan ağarana kimi nə arvad yatdı, nə
də kişi.
Səhərisi günortaüstü Səməd sürücüyə maşını hazırlamağı tapşırdı, bir azdan
yola düşəcəklərini bildirdi. Öpüşdülər, görüşdulər. Hamı maşına oturdu. Maşın
darvazadan çıxdı, Aftab xala, Zenfira, uşaqlar - hamı dalınca su atdı. Beş-on metr
aralanan maşın dayandı. Aftab xala tez-tələsik soruşdu:
- Nəsə yadımdan çıxıb yəqin, ay Səməd?
- Yox, a yengə, özüm əylətdim. Qoy uşaqların hamısı yaxın, gəlsin. A
İbrahimlər, siz də yaxın gəlin. Siznən yaxşı-yaxşı halallaşmaq istəyirəm. Ömürdü,
kim bilir, bir də ya qismət - görüşək-görüşməyək...
Səsində hədsiz bir kövrəklik vardı, üzündə ayrılıq nişanələri. Hamı
yerindəcə quruyub qalmışdı.
Aftabın xəyalı şairlə birgə çox uzaqlarda idi.
Dostları ilə paylaş: |