23
dünya iqtisadiyyatının formalaşmasının ikinci mərhələsində özünəməxsus rol oynamışdır.
İkinci mərhələdə həmçinin beynəlxalq əmək bölgüsünün yaranması və inkişafı baş
vermişdir ki, bu da son nəticədə özünü ölkələr arasında sabit iqtisadi əlaqələrin
yaranmasında, əmtəə ixracından kapital ixracına keçiddə göstərmişdir. Bu mərhələdə
həmçinin beynəlxalq ticarətin sürətli inkişafı baş vermişdir. Beləliklə, söyləmək olar ki,
ikinci mərhələnin sonunda dünya kapitalist bazarı tam surətdə formalaşmışdır.
Dünya iqtisadiyyatının inkişafının üçüncü mərhələsində isə dünya kapitalist bazarı
dünya iqtisadiyyatının mərkəzinə çevrilir. Belə ki, elektrotexniki inqilab, dünyanın iqtisadi
cəhətdən tam surətdə bölüşdürülməsi, inhisar kapitalizminə keçid beynəlxalq əmək bölgüsü
sisteminin və onun əsasında ümumdünya təsərrüfatının formalaşması ilə nəticələnir. Bu
mərhələ müstəmləkələrdə deyil ölkə daxilində istehsal edilmiş əmtəələrin ixracının artması
ilə xarakterizə olunur. Beynəlxalq iqtisadi münasibətlərin digər formaları işçi qüvvəsinin
miqrasiyası və kapital ixracı təşəkkül tapmağa başlamışdır.
Bu mərhələdə kapitalist istehsalı əsasında formalaşan dünya təsərrüfatı özündə
sənayecə inkişaf etmiş ölkələrin bir-birləri ilə və müstəmləkələrlə beynəlxalq iqtisadi
münasibətlərinin məcmusunu əks etdirirdi.
Dünya təsərrüfatının inkişafının dördüncü mərhələsi əvvəlki mərhələdə bərqərar
olmuş dünya təsərrüfat əlaqələrinin böyük bir hissəsinin pozulması ilə xarakterizə olunur.
Bir çox ölkələrin iqtisadi inkişafının 1920-ci ildən sonra sürətlənməsinə baxmayaraq,
beynəlxalq maliyyə sistemi yüksək qeyri-sabitlik nümayiş etdirirdi. Dünya ticarəti isə
dövrün sonuna qədər 1913-cü il üzrə əldə edilmiş səviyyəyə gəlib çata bilmədi.
Beynəlmiləlləşmə prosesinin inkişafında beşinci mərhələ beynəlxalq iqtisadi
münasibətlərin yenidən qurulması mərhələsi kimi xarakterizə edilə bilər. Bu dövrdə yeni
beynəlxalq iqtisadi qayda axtarışına başlandı. Bu axtarış zamanı daha əvvəl tənəzzülə məruz
qalmış xarici iqtisadi əlaqələr bərpa edilir, əmtəə, xidmət və istehsal amillərinin ölkələrarası
axını artırdı.
Bu mərhələdə beynəlxalq əmək bölgüsü sistemi tam gücü ilə funksiya göstərməyə
başlayır ki, bu da, elmi-texniki və texnoloji inqilabla, beynəlmiləlləşmə və inteqrasiya
proseslərinin kəskin surətdə güclənməsi ilə, əmtəə bazarı strukturunun köklu surətdə
dəyişməsi ilə sonuclanır. Əmtəə və kapital bazarının tənzimlənməsinə keçid isə bütün
ölkələrin iqtisadiyyatlarının qarşılıqlı asılılıqlarının güclənməsini sürətləndirir.
Beçinci mərhələdə dünya təsərrüfatı beş əsas amilin təsiri altında inkişaf edirdi:
24
görünməmiş iqtisadi artım;
ölkələrin iqtisadi fəaliyyət sahəsində birləşməyə göstərdikləri güclü meyl və əmək
məhsuldarlığının artımı;
xarici iqtisadi siyasətin liberallaşdırılması;
intensiv
elmi-texniki tərəqqi;
imperializmin müstəmləkə sisteminin dağılması.
Bu periodda inkişaf etməkdə olan ölkələr dünya təsərrüfatı orbitinə daha aktiv
şəkildə daxil olur, dünya kapitalist və sosialist təsərrüfatlarının beynəlxalq iqtisadi
münasibətləri aktivləşir, həmin sistemlər arasında dünya təsərrüfat əlaqələri bərqərar olurdu.
Milli iqtisadiyyatlar daha dərin şəkildə dünya təsərrüfatına cəlb edilir və ondan daha da asılı
vəziyyətə düçürdülər ki, bunda da dünya üzrə iqtisadi inteqrasiya prosesləri mühüm rol
oynayırdı. Dünya təsərrüfat əlaqələrinin tənzimlənməsi üçün beynəlxalq təşkilatlar sistemi
yaradılır, eyni zamanda beynəlxalq korporasiyaların fəaliyyəti aktivləşirdi.
Bu dövrdə dünya təsərrüfatı özündə beynəlxalq iqtisadi münasibətlərin və beynəlxalq
əmək bölgüsünə cəlb edilən, beynəlxalq mübadilədə iştirak edən və ondan asılı olan milli
iqtisadiyyatların məcmusunu əks etdirirdi.
Nəhayət, sonuncu, altıncı mərhələdə dünya təsərrüfatı vahid tam sistem halına
düşməyə başlayır. Bu cür inkişafın əsas amilləri kimi aşağıdakıları göstərmək olar:
SSRİ-nin dağılması, postsosialist ölkələrinin inkişafın bazar mexanizmlərini əsas
götürmələri;
dünyada inteqrasiya proseslərinin daha da güclənməsi;
beynəlxalq şirkətlərin dünya təsərrüfatının subyektləri kimi rollarının artması.
XXI əsrin əvvəlində dünya təsərrüfatı öz masştabına görə qlobaldır, tam olaraq bazar
iqtisadiyyatı prinsiplərinə, beynəlxalq əmək bölgüsünə, istehsalın beynəlmiləlləşməsinin
obyektiv qanunauyğunluqlarına əsaslanır və özündə üç əsas elementi – milli
iqtisadiyyatların məcmusunu, onları əlaqələndirən beynəlxalq iqtisadi münasibətləri və
beynəlxalq şirkətlər tərəfindən yaradılan beynəlxalq iqtisadiyyatı əks etdirir.
MÖVZU 2
25
2.1. BİM-in mahiyyəti, predmeti və formaları
2.2. BİM-in milli iqtisadiyyatlar üçün əhəmiyyəti, onun göstəricilər sistemi və
qarşılıqlı iqtisadi asılılıq
2.3. BİM-in inkişaf amilləri və meylləri
2.4. Dünya təsərrüfatının mahiyyəti, xüsusiyyətləri və onun inkişafınfa müasir
meyllər
2.5. Dünya təsərrüfatında qloballaşma prosesi və qlobal problemlər
2.6. BİM-də ölkələrin təsnufləşdirilməsi göstəriciləri və meyarları
Beynəlxalq iqtisadi münasibətlərin (BİM) mahiyyəti, formaları və
onun dünya iqtisadiyyatında rolu və əhəmiyyəti
2.1. BİM-in mahiyyəti, predmeti və formaları
Bəşər cəmiyyətlərinin müxtəlif təşkilati formaları dövründə iqtisadi əlaqələrin
inkişafı böyük tarixə malikdir ki, bu barədə əvvəlki mövzuda məlumat verilib. İlk vaxtlarda
bəsit məzmun daşıyan iqtisadi münasibətlər ən müxtəlif amilllərin təsiri nəticəsində daim
genişlənərək və inkişaf edərək hazırkı formasına gəlib çatmış, bütün ölkələrin maraqlarına
və mənafelərinə uyğun olan mürəkkəb münasibətlər sistemi halına düşmüş, beynəlxalq
iqtisadi münasibətlər formalaşmışdır.
Beynəlxalq iqtisadi münasibətlər (BİM) – maddi nemətlərin istehsalı, bölgüsü,
mübadiləsi və istehlakı üzrə müxtəlif ölkələrin təsərrüfat subyektləri arasında qarşılıqlı
fəaliyyət sistemidir. BİM ayrı-ayrı ölkələr, onların regional birlikləri, həmçinin ayrı-ayrı
müəssisələr (transmilli və çoxmilli şirkətlər) arasında iqtisadi münasibətlərin çoxsəviyyəli
təsərrüfat əlaqələri kompleksidir.
BİM-in predmeti kimi iki əsas tərkib hissəsi çıxış edir: BİM-in özü və bu
münasibətlərin reallaşdırılması mexanizmi. BİM bir elm kimi xarici ölkələrin iqtisadiyyatını
deyil, onların iqtisadi münasibətlərinin xüsusiyyətlərini öyrənir.
BİM, ümumilikdə iqtisadi münasibətlər kimi insan fəaliyyətinin bir sferasıdır və o,
təsərrüfat fəaliyyətinin ümumi qanunauyğunluqlarına tabe olur. BİM obyektiv olaraq əmək
bölgüsü prosesindən, istehsalın və elmin beynəlxalq ixtisaslaşmasından, təsərrüfat
fəlaiyyətinin beynəlmiləlləşməsindən çıxış edir.