94
NAXÇIVAN DÖVLƏT UNİVERSİTETİ.
ELMİ ƏSƏRLƏR, 2016, № 6 (76)
NAKHCHIVAN STATE UNIVERSITY.
SCIENTIFIC WORKS, 2016, № 6 (76)
НАХЧЫВАНСКИЙ ГОСУДАРСТВЕННЫЙ УНИВЕРСИТЕТ.
НАУЧНЫЕ ТРУДЫ, 2016, № 6 (76)
İSA ABDULLAYEV
Naxçıvan Dövlət Universiteti
Naxçıvan Diaqnostika Müalicə Mərkəzi
UOT:616.006
SİTOKİN PROFİLİ MEDİATORLARININ YAYILMIŞ PERİTONİTLƏRİN
PATOGENEZİNDƏ VƏ MÜALİCƏSİNDƏ ROLU
Açar sözlər: İltihab, peritonit, sitokinlər
Key words: Inflammation, peritonitis, cytokinins
Ключевые слова: Воспаление, перитонит, цитокины
Peritonitin inkişafının erkən dövrlərində bakterial endo- və ekzotoksinlərin aqressiv
fermentlərinin təsirindən hüceyrə membranı destruktiv dəyişikliyə məruz qalır, hemostazı
sabitləşdirən maddələr inaktivləşir, ürək-damar və həzm traktının neyrotənzimləyici fəaliyyəti
blokadaya alınır. Lakin endotoksemiya kompensəolunmuş xarakter daşıyır. Endogen intoksikasiya
sindromu (EİS) qana küllü miqdarda aqressiv mikrob toksinlərinin, yüksək konsentrasiyalı bioloji
aktiv maddələrin, proteoliz məhsullarının və iltihab mediatorlarının daxil olması hesabına
formalaşsa da, orqanizmin müdafiə və detoksikasiya mexanizmləri öz funksional aktivliklərini
saxlaması sayəsində, aparılmış cərrahi müdaxilə nəticəsində intoksikasiya qısa müddətdə aradan
qaldırıla bilir [3, 4,].
Yayılmış peritonitlər (YP) zamanı endogen intoksikasiyanın əsas mənbələri bakterial və
dismetabolik mənşəli toksinlərlə zəngin qarın boşluğu və paralitik bağırsaqdır [15].
Qarın boşluğu xəstəliyin ilk günlərindən toksemiyanın əsas mənbəyinə çevrilir. Proses
dərinləşdikcə intestinal müdafiə mexanizmləri zəifləyir, toksiki məhsullar bioloji hədləri – bağırsaq
divarını, peritonu və qaraciyəri – keçərək qana daxil olurlar [3,].
Qana daxil olan bakterial toksinlər, toxumaların destruksiya və proteoliz məhsulları,
hormonlar, aktiv fermentlər, iltihab mediatorları və digər maddələr makro- və mikrosirkulyator
səviyyədə pozğunluqlara – hipoksemiyaya, hipovolemiyaya, koaqulopatiyalara gətirib çıxarırlar
[11,]. Daha sonralar EİS əsas mənbələri olan peritoneal ekssudat və paretik dəyişikliyə uğramış
bağırsağın möhtəviyyatı bir-birini gücləndirərək endotoksikozu sistem səviyyəsinə çıxardaraq
hüceyrə və toxuma səviyyəsində metabolik dəyişiklərə səbəb olurlar ki, bu da poliorqan
çatmazlığına (POÇ) gətirib çıxarır [2, 3, ]. Orqanizmin müdafiə sistemlərinin dekompensasiyası
fonunda funksional POÇ dərin Eİ nəticəsində daxili üzvlərdə baş verən üzvdaxili struktur-morfoloji
dəyişikliklərə gətirib çıxarır və həqiqi poliorqan çatmazlıq sindromu (POÇS) inkişaf edir.
Həmçinin, pozulmuş metabolizm fonunda YP zamanı 100-dən çox aralıq mübadilə
məhsulları qanda anomal miqdarda toplanaraq Eİ-ni daha da dərinləşdirirlər. İltihab ocağından
fermentlərin, zülal mübadiləsinin toksiki məhsullarının və digər toksinlərin qana daxil olması
nəticəsində periferik damarlar genişlənir, mikrosirkulyasiya pozulur, damar divarı keçiriciliyi artır
[7, 10], plazma damar mənfəzini tərk edir, qan daxili üzvlərin damarlarında depolaşır, damarlarda
qanın həcmi azalır və ürək fəaliyyəti zəifləyir [8].
Qana külli miqdarda daxil olmuş vazodilatatorlara (histamin, serotonin, bradikininlər,
prostoqlandinlər) cavab olaraq vazokonstriktorların (adrenalin, noradrenalin) kompensator olaraq
miqdarı artsa da adekvat damar tonusu bərpa olunmur. Bu toksiki maddələr kiçik, orta və iri
molekul kütləli olub, kimyəvi tərkiblərinə görə müxtəlifdirlər: suda və yağda həll olanlar, suda və
yağda həll olmayanlar; plazma zülalları ilə rabitəli olanlar və rabitəli olmayanlar.
YP zamanı iltihab ocağına faqositlərin toplanmasına və onların aktivləşməsinə, nəticədə
iltihablehinə sitokinlərin hiperproduksiyasına və sərbəst radikalların generasiyasına gətirib çıxarır.