- 307 -
niyyət adi danışıq dilində, adi şüur səviyyəsində açıqlanır. Və
yeni əsrin zirvəsindən baxdıqda bu «adi şüur»un arxasında
böyük bir zəka sahibinin, milli-sosial təfəkkürün dayandığı
aşkar olur, əsl ziyalı qəlbinin çırpıntıları, millətin taleyi ilə bağlı
hiss-həyəcanları duyulur.
Ziyalılıq nədir və yeni əsrin, yeni minilliyin başlanğıcın-
da Azərbaycan ziyalısının ən böyük qayəsi nədən ibarətdir? Bu
barədə müxtəlif fikirlər olsa da, bütün tədqiqatçılar, demək olar
ki, bir mövqedə yekdildirlər: ziyalı ilk növbədə milli tərəqqi
yolunu işıqlandıran, xalqın maariflənməsinə xidmət edən
insandır. Lakin, təbii ki, ziyalı özü elə bir mərtəbəyə
qalxmalıdır ki, buradan millətin nicat yolu görünmüş olsun.
Xalqa xidmət etmək istəyi hələ azdır. Bu istək ancaq yüksək
təfəkkür səviyyəsi ilə birləşdikdə ziyalılıq yaranır. Əvvəlcə
millətin tərəqqi yolunu, nicat yolunu özü üçün aydınlaşdırmaq,
tədqiq etmək, dərk etmək tələb olunur. Cavid öz fəlsəfi biliyi
ilə, öz sənəti ilə məhz belə bir zirvədə dayanırdı. Onun əsl
məramı bədii əsərlərindən də hasil olur. Lakin müəllim Cavidin
tövsiyələrini başa düşmək daha asandır. Maarif yolu da ən
vasitəsiz, ən kəsə bir yoldur. «Demək ki, bir millətin hər halını
tədqiq etmək üçün ən doğru meyar, ən kəsdirmə yol o millətin
məktəbləridir». (Hüseyn Cavid. «Həsbi-hal – 1»).
- 308 -
CABBARLI VƏ MİLLİ FƏLSƏFİ FİKİR
C.Cabbarlı bütün yaradıcılığı ilə elə bir dövrün ideya-
bədii təcəssümü idi ki, bu dövrdə hər şey Şərqlə Qərbin vəh-
dətinin labüdləşməsindən xəbər verirdi. Sənayeləşən Bakı,
şəhərləşən Azərbaycan yeni sivilizasiya müstəvisinə qədəm
qoymuşdu və burada daha əvvəlki düşüncə ilə yaşamaq müm-
kün deyildi. Digər tərəfdən Azərbaycandakı sosial və mədəni-
mənəvi mühit yeni düşüncə tərzinə malik insanlar üçün hələ
tam yetişməmişdi. Avropada təhsil alıb gəlmiş bir insan
konservativ sosial-mədəni mühitin kapitalla daha da
bayağılaşmış ağır havasında nəfəs ala bilmirdi.
Şərqlə Qərbin vəhdətini şərtləndirən, lakin vəhdətin hələ
hasil olmadığı, hələ yarımçıqlıq sindromu ilə səciyyələnən bu
yeni situasiyanın daxili ziddiyyətlərini Cabbarlı «Aydın»da
ailə-məişət miqyasında şərh edir və Yeni Dövrün qəhrəmanını
obrazlı şəkildə oxucuya belə təqdim edir: «Günbatan fikirli,
gündoğan duyğulu bir sima», yaxud «Beyni kitab arasında
Parisdən, ürəyi isə mizraq ucunda Altay dağlarından
alınmışdır». Göründüyü kimi, burada Qərb-fikir, Şərq isə duyğu
timsalı kimi təqdim olunur. Və bu çox qısa, lakonik izah
C.Cabbarlının Şərq-Qərb problematikasını necə dərindən
mənimsədiyinə, öz pyesində bu problemin məhz mahiyyətindən
çıxış etdiyinə dəlalət edir.
Qədimdə də, indi də – bütün tarix boyu insan qarşısında
həmişə eyni fəlsəfi problemlər dayanır. Bunlar ilk növbədə
- 309 -
insanın cismi, nəfsi və mənəviyyatı arasındakı münasibət və
mücadilənin şəxsi və sosial prizmada, ailə və tarix miqyasında
müxtəlif təzahürləridir. Bir tərəfdən, cismani tələbat, nəfs və
onun ödənilməsinə yönəldilmiş fiziki-bioloji üstünlük, var-
dövlət, əmlak üstünlüyü və hökm, rəyasət, taxt-tac üstünlüyü.
Digər tərəfdən, maddi yükdən azad olmaq, imtina etmək
hesabına daxili mənəvi yüksəliş, intellektual və əxlaqi üstünlük.
Sosial müstəvidə nəfs iqtisadi və siyasi prizmalardan keçərək
başqa donlara girsə də, mahiyyəti eynidir. Bütün dövrlərdə
böyük sənətkarlar bu problemlərə müraciət etmiş və onları öz
dövrünün və öz mühitinin konkret cizgiləri ilə qələmə almışlar.
Cabbarlı da istisna deyil. O da Nizami kimi, Şekspir,
Axundov, Dostoyevski, Cavid kimi var-dövlət və mənəviyyat
qarşıdurmasına, sosial determinizm və ictimai azadlıq əksliyinə
dəfələrlə müraciət edir və problemi öz dövrünün və öz
mühitinin rəngində, konkret təzahürlərində qələmə alır.
Cabbarlıda gənclik və müdriklik qoşadır. O hələ ən gənc
yaşlarında sənətin poeziyasını qoca fəlsəfənin hüzuruna gətirir.
Və eyni ustalıqla qocaman cəmiyyətin qart problemlərinə
çağdaş həyatın al-əlvan libasını geyindirir.
* * *
SSRİ dağıldıqdan və Azərbaycan müstəqillik əldə et-
dikdən sonra, yenidən kapitalist ictimai-iqtisadi münasibətlərini
özünə inkişaf yolu kimi seçən ölkəmizin qarşılaşdığı problemlər
bədii ədəbiyyatda öz əksini necə tapır? Müasir dövrdə ictimai-
siyasi, sosial-iqtisadi və mədəni-mənəvi müstəvilərdə baş verən
böyük dəyişikliklər, heç şübhəsiz, insanların fərdi həyatına da
müdaxilə edir. Cəmiyyətlə insan arasında harmoniya pozulur.
Dağılmış köhnə münasibətlərin üzərində Yeni Dövrün
tələblərinə uyğun yeni münasibətlər formalaşanadək, sosial-
mənəvi harmoniya yenidən qərarlaşanadək insan «xaosun
qaydaları» əsasında yaşamalı olur. Bax, həmin bu təbəddülatlı
keçid dövrünün dramatizmini əks etdirən yeni ədəbiyyat da
harmonik həyata qayıdışın mühüm vasitələrindən biri olur.
Bəs hanı bu yeni ədəbiyyat?! Zahiri yeniləşmə, həyatın
üst qatlarındakı müasirlik, hadisəçilik səviyyəsində problemlər
- 310 -
və konfliktlər ədəbiyyatda da öz əksini tapmaqla onu cılız-
laşdırır, keçid dövrünün keçici hadisələri sırasına müvəqqəti
cari ədəbiyyat da əlavə olunur. Cari problemlərin alt qatlarını
açmağa, müasir cəmiyyətdə gedən proseslərə insanlığın əzəli-
əbədi problemləri kontekstində baxmağa qadir olan,
mahiyyətlər səviyyəsindəki invariantlara söykənən böyük
ədəbiyyat isə elə bil ki, yorulub fasilə vermiş və nəfəsini heç
cür dərib qurtara bilmir. Lakin məhz bu keşməkeşli keçid
dövründə bizə haradan gəlib haraya gedəcəyimizi nişan verə
bilən həqiqi böyük ədəbiyyat lazımdır.
...Bu günümüzü mahiyyət müstəvisində əks etdirə bilən
böyük ədəbiyyat intizarında ikən diqqətimiz istər-istəməz ötən
əsrin əvvəlində Cəfər Cabbarlının inşa etməyə başladığı
əzəmətli sənət abidələrinə yönəlir. Və yenə də heyrətlənməyə
bilmirsən. Onun bir sıra pyeslərində elə bil ki, bu günün prob-
lemləri əks olunur. (Bəli, böyük klassiklər həmişə müasirdirlər).
Digər tərəfdən isə görünür, zaman özü təkrar olunur. Biz yenə
də ilkin kapital yığımı dövrünü, yeni zənginlərin yaranması –
milli burcuaziyanın formalaşması ərəfəsində özünə pozitiv
funksiya tapa bilməyən pulun törətdiyi eybəcərliklər dövrünü
yaşayırıq. Yenə də kapital dünyasının açdığı yeni imkanlar ona
adekvat olan yeni əxlaqın formalaşması tempini qabaqlayır...
Yenə də azad dünyaya açılan qapılardan yeni texnologiya ilə
yanaşı çürük mənəviyyat, pozulmuş əxlaq da daxil olmağa
çalışır.
XX əsrin əvvəllərində Bakıda kapitalizm özünün ən
klassik formasında sürətlə inkişaf edirdi. Avropada yüz illər
ərzində gedən proses neft səltənətində on illər ərzində həyata
keçirdi. Sosial-iqtisadi və hətta siyasi mühitin sıxlıq dərəcəsi
xeyli artmışdı. Hadisələrin gedişini sürətləndirən bir amil də
xarici kapitalın və onun Avropada artıq formalaşdırmış olduğu
həyat tərzinin hazır şəkildə transformasiyası idi. Həm də belə
sürətli ictimai-iqtisadi yeniləşmə böyük mədəni yüksəlişlə
müşayiət olunurdu. Milli dirçəliş, milli özünüdərk prosesləri
artıq başlanmışdı. Bu, əlbəttə, yaxşı idi. Lakin şəxsi mənafeləri
naminə öz istəklərindən asılı olmadan milli iqtisadi dirçəlişə də
təkan verənlər bu prosesin mədəni-mənəvi dirçəlişlə müşayiət
olunması zərurətini təbii ki, nəzərə almırdılar.
Dostları ilə paylaş: |