- 295 -
insanların xislətində deyil, dövrün, zəmanənin, mühitin
xislətində axtarmaq təşəbbüsü göstərir. Bu baxımdan,
C.Cabbarlının «Aydın»ı təkcə «Hamlet»lə deyil, həm də
«İblis»lə böyük ideya yaxınlığına malikdir.
* * *
Ayrı olsaq da,
həqiqətdə birik.
H. Cavid. «Xəyyam»
Hadisələri araşdırarkən və ilk nəzərə çarpan cəhətlərdən
çıxış edərkən, eyni dövrdə yazıb-yaratmış bu iki sənətkar
arasında xeyli böyük fərqlər və hətta ziddiyyətlər görmək
mümkündür. Lakin bu böyük düha sahiblərinin ideya dünyasına
daxil olduqda fərqlərin daha çox metod və təzahür fərqi olduğu,
ideyaların dərinliyində isə ağlasığmaz bir yaxınlıq və hətta
eyniyyət mövcudluğu aşkara çıxır.
Cavidlə Cabbarlı arasındakı fərq ancaq metod fərqi deyil.
Daha doğrusu, metod fərqi törəmədir və ən başlıcası, zamana
görə nisbidir. Təsadüfi deyildir ki, bir əsrdən sonra kimin daha
çox realist, kimin daha çox romantik olduğunu fərqləndirmək
çətinləşmişdir. Keçən əsrin əvvəlində dünyanı, həyatı planetar
miqyaslı, qlobal bir proses kimi götürən Cavid nə qədər
mücərrəd və «səmavi» görünürdüsə, yeni əsrin əvvəlində,
qloballaşma artıq həyatın bütün sahələrinə nüfuz etdiyi bir
vaxtda, bir o qədər realist görünür.
Əsl fərq bədii metodlardan öncə, ədiblərin ictimai tərəqqi
yoluna münasibətində, «nədən başlamaq» məsələsində üzə
çıxır.
Hər iki sənətkar yaxınlaşmaqda olan həşəmətli bir
kabusun, qorxunc bir qüvvənin, kapital dünyasının, Qərbin
«kütləvi mədəniyyətinin» milli-mənəvi dəyərlərimizin sərhəd-
lərini keçərək cəmiyyətimizə, ailəmizə, şəxsi həyatımıza necə
daxil olduğunu və bu proseslərin daha nələrə apara biləcəyini
anlayır və bütün bunlara qarşı mübarizə yolları arayırdılar. Hər
iki sənətkar bu böyük ümumbəşəri, fövqəlmilli proseslərin
qloballığını, dönməzliyini görür, onlarla üzləşməyin
- 296 -
qaçılmazlığını dərk edir və özünü, öz milli varlığını, əsrlərdən,
nəsillərdən bizə miras qalmış yüksək əxlaqi-mənəvi keyfiy-
yətləri bu burulğanlar içərisindən çıxarmaq üçün yollar axtarır,
bütün mümkün vasitələri və qüvvələri səfərbər etməyə
çalışırdılar. Azərbaycanda sosialist inqilabı deyilən hadisə baş
verdikdən sonra bu iki böyük qələm sahibinin mübarizə
metodları getdikcə daha çox dərəcədə fərqlənməyə başladı.
Cavid yenə də milli məni kapital dünyasının təsirlərindən
qorumaq istiqamətindəki bu mübarizəni davam etdirmək,
Cabbarlı isə kapital kabusunun qarşısını mahiyyətcə guya ona
qarşı dayanan yeni ictimai reallığın - kommunizm kabusunun
vasitəsilə kəsmək mövqeyindən çıxış etdi.
Cavid hətta sosializm mərhələsini də kapital cəmiyyətinin
ümumi meyllərindən fərqli, müvəqqəti bir hadisə kimi
«diqqətdən kənarda» qoyaraq, məhz ümumi problemləri araş-
dırmaqda davam edirdi. Cari zamana olan bu etinasızlığı o,
məkanı genişləndirmək, hadisələrin vaqe olduğu məmləkətləri
mücərrədləşdirmək, planetar miqyas seçmək hesabına
kompensasiya edirdi. Lakin o vaxt Cavidin nə üçün məhz belə
bir yol seçdiyini başa düşmək çox çətin idi. Bunun əsl
səbəblərini başa düşmək, məhz həmin dövrdə yaşanan həyati
gerçəkliyin heç də əsl böyük həqiqət olmayıb, bu böyük hə-
qiqətdən müvəqqəti bir sapıntı olduğunu dərk etmək üçün
zamana ehtiyac var idi. İndi biz, bir əsr keçdikdən sonra, böyük
ictimai-iqtisadi çevrilişlər, təbəddülatlar epoxası arxada
qaldıqdan sonra, yeni yüzilliyin zirvəsindən rahatca keçmişə
nəzər salaraq, Cavidin cari həyata, çağdaş proseslərin işıqlan-
dırılmasına nə üçün bu qədər etinasızlıqla yanaşdığını daha
aydın cavablandıra bilərik. Cavidin yerdə baş verən proseslərin
içərisinə nüfuz etmək naminə, qərar tutduğu uca səmalardan nə
üçün enmək istəmədiyini anlamaq o dövrün hətta ən böyük
sənətkarları üçün də, görünür, çox çətin idi. O vaxtın bir sıra
ədəbiyyatçıları Cavidin öz zəmanəsinə qatılmadığını, cari
proseslərə biganə qaldığını ideoloji mövqedən, soyuqqanlılıqla
tənqid edir, onu xalqın, cəmiyyətin problemlərindən uzaq bir
“burcua şairi” kimi təqdim etməklə guya sualın cavabını tapmış
olurdular. Lakin belə izah C.Cabbarlını qane etmirdi. Cabbarlı
üçün istedadına, böyüklüyünə şübhə etmədiyi və ideyalarını
- 297 -
şəksiz bölüşdürdüyü Cavidin təhkiyə və təsvir sərbəstliyi və
real cismani həyatın təfərrüatlarına sayğısız münasibəti çox
təəccüblü görünürdü.
Cabbarlı suallarında israrlı idi. O, burada nə isə gizli bir
səbəb olduğunu və bu səbəbin məhz fəlsəfə ilə bağlılığını bir
sövq-təbii ilə duysa da, konkret izah tapa bilmədiyindən
həyəcanlanır və bəzən çox kəskin tənqidi mövqe tuturdu: «Ya
Cavid həyatı olduğu kimi götürəmiyor və ya da bütün əsərlərini
bir fikir, bir fəlsəfə xatirəsi üçün quraşdırıyor...» (C.Cabbarlı.
«Ədəbi mübahisələr»).
Lakin Cabbarlı Cavidi tənqid edə-edə əslində onun
mahiyyətinə hamıdan çox yaxınlaşır. O, Cavidi onu tərifləyən-
lərdən daha yaxşı başa düşür. Tənqid edə-edə axtarır, axtara-
axtara mətləbin lap astanasına gəlib çıxır. Bəli, Cavid cismən
içərisində olduğu həyatı təsvir etmirdi. Zaman və məkan
müəyyənliyindən kənara çıxırdı. Bu isə sənətin, xüsusən,
realistik sənətin əsas prinsipləri ilə uzlaşmırdı. Zira, «ən gözəl
əsər mühitin, cəmiyyətin hal və keyfiyyətini bəyan edənlərdir»
(C.Cabbarlı. «Ədəbi mübahisələr»). Bəs zaman və məkanın
hüdudlarından kənara çıxan, lokal mühitin, cari həyatın konkret
rənglərinin, cizgilərinin fövqündə duran əsərlər nə ilə
səciyyələnir? Məhz burada Cabbarlı qoyduğu sualların cavabını
özü verir: «... Bir əsər bir fikir ifadəsi üçün yazılırsa, o artıq
sənət və ədəbiyyat deyil, bəlkə də fəlsəfədir» (C.Cabbarlı.
«Ədəbi mübahisələr»).
Bəli, fəlsəfə!
Cabbarlı Cavidi sənət prinsiplərindən uzaqlaşmaqda təq-
sirləndirir. Lakin Cavid sənətdən hansı səmtə doğru uzaqlaşır?
Aşağıyamı enir, «burcua idealogiyasınamı» qulluq edir? Yox,
Cabbarlı belə mücərrəd və əsassız ittihamlardan çox uzaqdır. O,
əsl səbəbi axtarır və tapır da! Fəlsəfəyə doğru!? Lakin nə kimi
bir fəlsəfəyə? Bax, sual budur. Sualın düzgün qoyulması ma-
hiyyətin dərkinə açardır.
* * *
Hələ XIX əsrdə böyük M.F.Axundovun qoyduğu sual:
«Qərbdə təhsil almağa gedən gənclərimiz oradan bizə nə gətirə-
Dostları ilə paylaş: |