- 301 -
təmsilçisi ola bilməzlər. Lakin Cavid qarşısına heç də belə bir
məqsəd qoymur. O, Cəlal obrazını yaradarkən yanında Əkrəmi,
Afəti yaradarkən yanında Alagözü də təqdim etməyi unutmur.
Cavid sadəcə olaraq bu gün İstambulda və nə vaxtsa bizim
cəmiyyətdə mümkün ola biləcək alternativ həyat tərzini təsvir
edir. Onlar da ictimai mühitin reallıqlarıdır. Cəmiyyətin aparıcı
qüvvələrinin əsas vəzifələrindən biri də elə məhz bundan
ibarətdir ki, ictimai tərəqqinin daxili məntiqindən, milli
mentalitetdən irəli gəlməyən yabançı təsirlərin genişlənməsinə
imkan verməsin. Onların qarşısını tamamilə almaq isə ona görə
mümkün deyil ki, hətta ən yüksək inkişaf səviyyəli
cəmiyyətlərdə də milli özünüdərk həddinə çatmamış bəsit mə-
nəviyyatlı və zəif iradəli insanlar vardır. Qloballaşma və insan
hüquqları isə məhz mənəvi şikəstlərin də «hüququnu» müdafiə
edir.
Biz bu gün qapıları bütün dünyaya açılmış yeni, azad bir
cəmiyyət qurarkən, demokratikləşməni, fikir plüralizmini qəbul
edərkən, həyat tərzlərinin də plüralizmini qəbul etmək məcbu-
riyyətindəyik. Lakin başqa bir əxlaqın bizimlə paralel möv-
cudluğuna dözmək, heç də bizim hamımızı həmin yabançı
əxlaqı qəbul etmək məcburiyyətində qoymur. Biz, sadəcə ola-
raq, ictimai müxtəliflik və mədəni-mənəvi plüralizm şəraitində
özəlliyimizi qorumağı və inkişaf etdirməyi öyrənməliyik.
Bax, həyatın bu yeni dialektikasını, qloballaşma artdıqca
milliləşmənin də onunla həmahəng olaraq artmalı olduğunu an-
lasaq və cəmiyyətdəki milli iradədən məhrum tör-töküntü ilə
milli elitanın yerini dəyişik salmasaq təşviş üçün elə bir ciddi
əsəas yoxdur.
Sadəcə olaraq, anlamalıyıq ki, milli mənəviyyatın öz əta-
ləti ilə yaşayacağına əminlik dövrü arxada qalmışdır. İndi biz öz
vətənimizdə də milli məni qorumaq, yaşatmaq, inkişaf etdirmək
üçün hər an mübarizəyə hazır olmaq, yaxşı düşünülmüş
vasitələrlə mücadilə aparmaq məcburiyyətindəyik. Bu
mücadiləni uduzmamaq üçün klassik ədəbi-fəlsəfi irsimizi
yaşatmağı və müasir düşüncə ilə birləşdirməyi öyrənməliyik.
Müasir həyatın dialektikası isə ədəbiyyata münasibətdə
də müxtəlifliyin vəhdətini tələb edir. Bizə bu gün ayrılıqda
Cavid və ya ayrılıqda Cabbarlı deyil, həm Cavidin, həm də
- 302 -
Cabbarlının ideyalarından bəhrələnən vahid mədəni-mənəvi
özünümüdafiə və inkişaf konsepsiyası lazımdır.
Bu gün çox vaxt «milli birlik»dən danışılır, «biz niyə
birləşə bilmirik?» sualı qoyulur. Lakin unudulur ki, milli birlik
zaman kəsiyində mümkün deyil. Bunun üçün zaman oxunda
birlik axtarmaq, öz böyük mənəvi sələflərimizlə birləşmək
lazımdır.
* * *
Bütün bu deyilənlərə əlavə olaraq XX əsrin bu iki böyük
şəxsiyyəti arasında daha bir ümumi cəhəti qeyd etmək istərdik.
Bu – dil məsələsidir. Müasir Azərbaycan dilinin forma-
laşmasında onların rolu məsələsidir.
Hamı tərəfindən qəbul olunmuş, lakin yenə də layiq
olduğu dərəcədə vurğulanmayan həqiqətlərdən biri budur ki,
müasir Azərbaycan dilinin formalaşmasında heç kim Cəfər
Cabbarlı qədər böyük rol oynamamışdır. Cabbarlı türk dilini
gözəl bilməklə yanaşı, məhz yerli türk ləhcəsinin müstəqil
ədəbi-bədii dil səviyyəsinə çatdırılması sahəsində əvəzsiz
xidmət göstərmişdir. Lakin Cavidin dilimizin inkişafında rolu
barədə fikirlər müxtəlifdir. Çoxları hətta onu yabançı üslubda
yazmaqda təqsirləndirir, müasir dilimizdə fərqli ünsürlərə
Osmanlı şivəsinin təsiri kimi qiymət verirlər. Lakin məhz
Cavidin dilimizi zənginləşdirmək, böyük türk dilinin potensial
imkanlarının müasir Azərbaycan dilini inkişaf etdirmək sarıdan
xidməti ədalətsizcəsinə heçə endirilir və ya ən yaxşı halda çox
sönük şəkildə qeyd olunur.
Bax, bu sahədəki həqiqətə işıq salmaq üçün o dövrün
gerçəkliyindən verilən qiyməti yada salmaq yerinə düşərdi.
Həm də ona görə ki, bu böyük həqiqi qiyməti kim isə başqası
deyil, məhz C.Cabbarlı verir: “Caviddə su kimi duru, almaz
kimi saf, parlaq və oynaq bir lisan vardır ki, bu, islahına çalışan
lisanımızın təkamül özülü ola biləcəkdir, zənnindəyik. Zatən,
bir millət üçün lisanı onun şairləri, ədibləri yaradırlar ki, Cavid
də bu cəhətdən qiymətlidir. Bizcə, Cavidin orta bir yol
götürmüş lisanı Azərbaycanda tətbiq ediləcəyi kimi, ərəbləşmiş
Fikrət və Hamid lisanlarını da meydandan sıxıb-çıxaracaqdır”
- 303 -
(C.Cabbarlı. “Ədəbi mübahisələr”).
Müasir dövrdə, məhz Cavidlərin, Cabbarlıların böyük
səyləri nəticəsində formalaşmış Azərbaycan ədəbi dili ilə müqa-
yisədə bizə bəlkə də çətin görünən Cavid lisanının o dövr üçün
həqiqətən böyük bir tərəqqi olduğunu ancaq onun müasirləri
düzgün qiymətləndirə bilərdi.
* * *
Cavid milli və dini dəyərlərlə müqayisədə, ümumbəşəri
dəyərlərə daha böyük önəm verir. Onun maarifçiliyi də, dün-
yəvi məktəblər uğrunda mübarizəsi də, bizcə, hər hansı bir
millətə və dinə mənsub olmaqdan öncə, bir bəşər övlədı olaraq
özünü dərk etməyi ön plana çəkməsindən irəli gəlir. Maraqlıdır
ki, gəncliyində daha çox millətçi olan Cabbarlı da tədricən
ümumbəşəri ideyalara doğru təkamül yolu geçir. «Od
gəlini»ndə oxuyuruq: «Bizim üçün ərəb, fars, rum, yəhudi olsun
– heç bir fərqi yoxdur. Bax, bu ərəbdir. Bizə azad əmək əli
uzadır. O, bizim qardaşımızdır, Biz ərəb mötəsəmlərinə,
Bağdad xilafətinə qarşı vuruşuruq. İki addımlığımızda Şirvan
şəhriyarlığı da ona qarşı çarpışır. Lakin biz onunla birləşmirik.
Çünki bizim üçün Şirvan şəhriyarilə Bağdadın mötəsəmləri,
Bizansın imperatorları, Makedoniyanın iskəndərləri, Romanın
qeysərləri, neronları arasında heç bir fərq yoxdur. Biz insan
dostunun dostu, insan düşməninin düşməniyik». (səh.63)
Cavid məkan və zaman müəyyənliyindən, etnik və dini
mənsubiyyətindən, mənəvi-əxlaqi məxsusiyyətindən asılı olma-
dan bütün insanların eyni bir mahiyyətə yüksəlmək şansını
qəbul edir. Məhz mahiyyətə varanda, insani, ümumbəşəri
keyfiyyətlər önə çıxanda üfüqi müstəvidəki fərqlər itir və
insanlar ancaq vertikal müstəvidə, haqqa, həqiqətə yaxınlıq
dərəcəsinə görə fərqlənirlər. Burada «məni hər kim sevirsə,
yüksəlsin» («Şeyx Sənan») fəlsəfəsi rəhbər tutulur. Yaxud
Cabbarlıda «alçaq cismani duyğuları atıb, ruhani bir yüksəkliyə
varmaqdan» («Od gəlini») söhbət açılır.
Həm də bu yüksəliş intellektual müstəvidən daha çox
mənəvi müstəvidə həyata keçməlidir. Çünki allaha ancaq inan-
maq, onu ancaq müqəddəslik duyğusu ilə dərk etmək olar.
Dostları ilə paylaş: |