- 44 -
müxtəlif sahələrdən olan adamları müqayisə etmək düzgün
olmaz. Haqlı fikirdir və bizim məqsədimiz heç də onları
müqayisə etmək deyil. Əsas məsələ bundan ibarətdir ki, xalqın
məhz hansı sahədən olan böyük şəxsiyyətlərə daha çox rəğbət
bəsləməsi faktı onun milli təfəkkürünün və duyğu dünyasının
strukturunda hansı sahəyə meylin güclü olduğunu aşkar etməyə
imkan verir. Məlik-Məmmədin, Dədə Qorqudun, Koroğlunun
timsalında tərbiyə almış gənclik, Nizaminin, Füzulinin, Vaqifin
timsalında tərbiyə almış gənclikdən nə ilə fərqlənir? Bəs bunlar
vəhdətdə götürüldükdə necə? Bəs muğamatın, sazın təsiri nə
dərəcədədir? Məhz belə bir təsir dairəsi, ola bilsin ki, bizi bir in-
gilisdən, rusdan fərqləndirə bilər. Lakin onların da Şekspiri, Bayro-
nu, yaxud Puşkini, Tolstoyu vardır. Onların da Robin Qudu, Kral
Arturu, yaxud İvan Qroznısı, İlya Murometsi, Suvorovu var.
Önəmli olan odur ki, hər hansı millətin formalaşmasında
fəlsəfəninmi, elminmi, şeirin-sənətinmi, yoxsa ticarətin,
təsərrüfatın, yaxud müharibələrinmi rolu böyük olmuşdur? Milli
nağıllar, dastanlar, laylalar, mahnılar insanlara nəyi daha çox
təlqin etmişdir? Sevgini, şəfqəti, yaxud cəsurluğu,
qəhrəmanlığı, yoxsa ağlı, tədbiri? Bəlkə hiyləni?
Hər bir millətin qəhrəmanlıq eposu da, sevgi dastanları da
vardır, milli Həmzəsi də, milli Koroğlusu da vardır, satqını da,
hiyləgəri də, qəhrəmanı da vardır. Lakin həmzələri müdrik
sayanlar kimdir, ona nifrət edənlər kim? Əsl sual bundan
ibarətdir ki, milli şüurun strukturunda onların nisbi payı nə
qədərdir? Fərdi millətçi şüurdan fərqli olaraq, statistik orta
göstərici necədir?
Milli mentalitet də, milli şüur da, hətta milli-fəlsəfi fikir
də bütün bu göstəricilərdən asılı olaraq formalaşır. Hər şey fərdi
və sosial idealın yönümü ilə müəyyənləşir. Başqa cür ola da
bilməz. Çünki həyatın mənasını arayan fəlsəfə bu mənanı milli
idealın fövqündə tapa bilməz.
Digər tərəfdən, hər hansı bir xalqın keçmişini əks etdirən
fəlsəfi fikir tarixi ilə həmin xalqın müasir düşüncə tərzi və milli
idealı arasında tam bir uyğunsuzluq da ola bilər; müasir millətin
öz tarixi sələflərinə nisbətən irəli getməsi, yaxud tənəzzülə
uğraması, ya da başqa təsirlərə məruz qalması nəticəsində.
Antik fəlsəfi fikri orta əsrlərdə yunanlar deyil, ərəblər, Yeni
- 45 -
Dövrdə isə almanlar daha çox yaşatdılar. Deməli, fəlsəfi fikir
nisbi müstəqilliyə malikdir və hər hansı bir xalqdan, millətdən
ayrılaraq, başqaları tərəfindən əxz olunmaq və davam
etdirilmək, hətta, sosial ideala, həyat normasına çevrilmək
imkanına malikdir.
Müasir millətlərin istifadəsində olan təkcə öz yaratdıqları
deyil. Bütün digər millətlərin həm elmi-fəlsəfi yaradıcılığı, həm
də sivilizasiyanın inkişafına olan digər töhfələri ümumiyyətlə
bəşəriyyətin istifadəsinə vermişdir. Ona görə də, tarix boyu
ümumbəşəri fikir və mədəniyyət xəzinəsinə çox şey verib, indi
ondan az faydalananlar olduğu kimi, tarixi keçmişdə xidmətləri az
olmasına baxmayaraq, indi bu ümumi xəzinədən hamıdan çox
faydalananlar da vardır.
Burada çox maraqlı bir məqamla rastlaşırıq. Milli men-
talitetdə nəyə isə yiyələnməyəmi, mənimsəməyəmi, yoxsa
verməyə, xidmət göstərməyəmi daha çox meylli olması özünü
ümumxalq, ümummillət səviyyəsində də göstərir. Əl tutmaq,
kömək etmək, xidmət göstərmək istəyənlər özlərinin indi nə
qədər geridə qaldıqlarını və ya kasıb olduqlarını unudaraq, yenə
də başqalarına qarşı səxavət və qonaqpərvərlik nümayiş
etdirməyə çalışırlar. Fərdi miqyasda həqiqətən çox gözəl olan
bu keyfiyyət ümummilli miqyasda, xüsusi dövlətçilik mövqe-
yindən yanaşdıqda çox mənfi nəticələrə gətirir.
Halbuki, öyrənməyin, mənimsəməyin də öz texnologiyası
var. Bu özü bir mədəniyyətdir və ona yiyələnmədən müasir
qloballaşma şəraitində ancaq ziyan çəkmək olar.
Bəli, qloballaşma şəraitində milli-mənəvi dəyərlərimiz
həqiqətən böyük təhlükələrlə üzləşir və milli-fəlsəfi fikrə istinad
etmədən, milli ideologiyanın formalaşmasını təmin etmədən və
milli-sosial özünüqoruma şüuru formalaşdırmadan bu
təhlükədən xilas olmaq çox çətindir.
Müasir dövrdə bütün dünya xalqlarının fəlsəfi fikrinin
strukturunda Qərb fəlsəfəsi üstün yer tutur. Qloballaşma,
qərbləşmə heç də sadəcə olaraq Qərb texnikasının, Qərb inves-
tisiyasının ekspansiyası ilə məhdudlaşmayıb, həm də Qərb
fəlsəfəsinin, siyasi düşüncə tərzinin təcavüzü ilə səciyyələnir.
Bir əli ilə müasirlikdən, Qərbdən möhkəm-möhkəm yapışanlar
o biri əlində Bəhmənyarın, Nəsiminin ideyalarını saxlamağa
- 46 -
çalışırlar. Lakin həyat yolunu seçərkən, fəaliyyət proqramını
müəyyənləşdirərkən aktiv düşüncə tərzi olaraq məhz birinci
əlindəkini seçməli olurlar. Çünki formaca və bəlkə həm də məz-
munca arxaikləşmiş Şərq fəlsəfi fikri bizi əhatə edən texnogen
dünyasında kara gəlmir. Biz o biri əlimizdəkini ancaq bir rəmz
kimi, bir ekzotika kimi saxlayırıq. O da əgər saxlayırıqsa!?
Bəs çıxış yolu nədədir? Milli-mənəvi dəyərlərimizi bir
rəmz edərək real proseslərə formal surətdə əlavə etmək, yoxsa
milliliklə müasirliyin məzmun müstəvisində vəhdətinə nail
olmaq?!
Milli fəlsəfi fikir millətin özünüdərk mərhələsində üzə
çıxır. Bu isə heç də bütün millətlərə nəsib olmur. Bu baxımdan,
“millət” anlayışını etnosdan fərqləndirən əlamətlərdən biri məhz
milli-etnik təfəkkürlə milli-siyasi təfəkkürün vəhdətindən doğan
milli-fəlsəfi fikrin formalaşmasıdır.
Bir sıra millətlərdə milli-fəlsəfi fikrin nəzəriyyə halında
üzə çıxmaması heç də onun tamamilə yoxluğuna dəlalət etmir.
Milli özünüdərk məqamları ədəbi-bədii fikir vasitəsilə də ifadə
oluna bilir.
Azərbaycan xalqının milli inkişafında ədəbi-bədii fikrin
rolu həmişə böyük olmuşdur. Obrazlı düşüncə bir təfəkkür tərzi
kimi rasional elmi düşüncəni həmişə üstələmişdir. Xalqımızın
milli-fəlsəfi fikri də çox vaxt öz əksini elmi traktatlar və
monoqrafiyalarda deyil, bədii ədəbiyyatda tapmışdır. Ona görə,
fəlsəfi təfəkkürə gedən yol da əsasən ədəbiyyatdan keçmişdir.
Fəlsəfi fikir çox vaxt konkretlikdən uzaq olduğuna görə
milli özünəməxsusluğu, xüsusiyyətləri ifadə etmək üçün heç də
əlverişli vasitə sayılmır. Böyük fəlsəfi fikir məktəbləri olan bir
çox xalqların, məsələn, yunanların, almanların, ingilislərin,
fransızların milli-etnik özünütəsdiqi də daha çox dərəcədə bədii
ədəbiyyatda öz əksini tapmışdır. Şekspir geniş kütlələrə
Bekondan, Göte Hegeldən, Nizami Bəhmənyardan, Səməd
Vurğun Heydər Hüseynovdan daha çox təsir göstərmişdir.
Ümumbəşəri ideallara xidmət edən, ümumiyyətlə insanın
mahiyyətindən çıxış edən fəlsəfi fikir daha çox milli-mənəvi
konkretliyin özünütəsdiqi kimi üzə çıxan ədəbi-bədii fikrin
tamamlanmasına xidmət etmiş, fikirdə konkretliklə ümumiliyin
vəhdəti gerçəklikdə milliliklə ümumbəşəriliyin vəhdətini əks
Dostları ilə paylaş: |