68
SEVƏN ZAMAN
Təklik məni üzür yaman,
Ən xoş soz də kömək olmur.
Riyakarlıq, sevən zaman,
Lazım olmur, gərək olmur.
Ayrı qalmaq deyil asan,
Nədən bunu demək olmur?
69
BİR GÜN
Bu şeirə bəstələnmiş mahnı 2006-cı ildə Aygün
Kazımovanın ifasında səslənib
Darıxma, sevgilim, bitər bu həsrət,
Ayrı yollarımız birləşər bir gün.
Yenə tapar bizi sevgi, səadət,
Rüzgarlar səmtini dəyişər bir gün.
Bu necə taledir, bu necə yazı?
Bilinmir ömrümün payızı, yazı.
Səbr et, çoxu gedib, qalıbdır azı,
Yəqin qismət bizlə barışar bir gün.
Ayrılıq bitəcək uzun olsa da,
Həsrət qəlbimizdə yuva salsa da.
Hər gün gözlərimiz yolda qalsa da,
Yorğun baxışımız birləşər bir gün.
70
TƏLƏS
Qəlbim həsrətindən qubar bağlasa,
Sevgilim, yanıma gəlməyə tələs!
Dolmuş bulud kimi birdən ağlasam,
Bu göz yaşlarımı silməyə tələs!
Sən mənim ömrümdə ən xoş təranə,
Sənsiz könül evim sanki viranə.
Nə olar, dərdimə qalma biganə,
Bu dərdi mənimlə bölməyə tələs!
Biz ayrı düşəli hicran kam alıb,
Sevda yollarında izimiz qalıb.
O xoşbəxt günləri yadına salıb
Sirrimi-sözümü bilməyə tələs!
Bir kərə çağırsan ollam yanında,
Gəl qədrini bilək bircə anın da.
Ömür keçib-gedər göz qırpımında,
Gecikmə, ürəkdən sevməyə tələs!
71
DÖZMƏRƏM
Sən – ömrümə doğan günəş,
Qəlbimdə yanan atəş,
Ey mənim göz bəbəyim!
Sən – bəxtimə düşən payım,
Mənim ulduzum, ayım,
Unuda bilmədiyim.
Mən kiməm – bir aşiqin.
Sənsə mənim ürəyim.
Sənə sevgilim deyim,
Yoxsa mələyim deyim?
Mən bütün keçmişimi
Unudaram səninçün,
Ey mənim gələcəyim!
Sənsiz mən bir damlayam,
Səninlə – coşqun bir çay.
Sənsiz – boranlı qışam,
Səninlə – günəşli yay.
Getsən, tükənər ömrüm.
Tükənər yoxsan deyə.
Mənə qıyma, gəl, gülüm,
Dözmərəm sənsizliyə.
72
ANLASAN ARTIQ
Mən çox yalvarırdım, tanrıma üz tutub,
Bilmirdim, sevgilim sevməkdən yorulub,
Unudub eşqini, əhdini unudub.
Mənsə unutmaram, anlasan artıq!
Bu eşq bir yuxudur, bu eşq bir yalandır,
Qəlb evim viranə, ümidim talandır.
Bu könül yarası ömürlük qalandır,
Səni unutmaram, anlasan artıq!
Mən sənin yolunda qatlandım nələrə,
Eşqimi kül edib sovurdun yellərə,
And olsun sevgimə, and olsun göylərə,
Səni unutmaram, anlasan artıq!
73
AYIRIR BİZİ
Ay əzizim, mehribanım,
Bu həsrət ayırır bizi.
Sənə bağlı könlüm, canım,
Bircə sədd ayırır bizi.
O gün sənə rast gələrək
İlk baxışdan sevdi ürək.
Tanrımız olsa da kömək,
Bir namərd ayırır bizi.
Ruhum uçur qucağına,
Yanır eşqin fərağına,
Heyif ömrün bu çağına,
Kəm qismət ayırır bizi.
2005
Moskva
74
ÖZÜMƏ QAYTAR
Sən mənim sevgimi özümə qaytar,
Neçə ki, yandırıb kül etməmisən.
Mənim ürəyimdən sən getməmisən,
Getsən, həsrətini özünlə apar.
Getsən, sakitcə get, demə: gələrəm,
Yoxsa mən yenə də yol gözləyərəm.
Azad et vədlərdən mənim qəlbimi,
Çünki bu yuxudan ayılmalıyam.
Səni sevdiyimi unutmalıyam,
Sən də məni unut, bir xəyal kimi.
75
DEYİRLƏR...
Daha əfv etmərəm, incimə, gülüm,
Qürurum qoymaz ki, əyiləm sənə.
Qürurum qoymaz ki, geriyə dönüm
Səni sevsəm belə dəlicəsinə.
* * *
Getsən gözlərimdən, sevsən birini,
Yanından sakitcə uzaqlaşaram.
Heç kim, sən özün də anlamazsan ki,
Yaşayıb yanaram, yanıb yaşaram.
* * *
Yaşlar gözlərimdən axsa da yerə,
Səni ürəyimdən silərəm səssiz.
Qayıdıb dönərəm bizim yerlərə
Bu dəfə tək-tənha, bu dəfə sənsiz.
* * *
Deyirlər, ürəyə hökm etmək olmaz,
Mənsə qəlbimə də hökm edərəm, bil!
Neçə yerə bölüb sədəqə kimi
Payladığin sevgi gərəyim deyil.
76
DÖN
Yollarımız ayrı düşüb...
Sənlə bir də görüşməyə yoxdur ümüd...
Nədən ötrü gəlmişəm ki, bu dünyaya?
Sənsiz keçən günlərimi saya-saya,
mən nə qədər yaşayacam?
Həsrət yükü yaman ağır!
Nə vaxtadək daşıyacam?
Dön, ürəyim! Dön, sevgilim!
Gəl ömrümə!
Gəl ki, bitsin bu nisgilim!
77
SEV
Məni istər gizli, istərsə aşkar,
Fikrində, qəlbində, ürəyində sev!
Bitsin yaşadığım bunca intizar,
Mənimdir ruhun da, ürəyin də, sev!
Soyuq sözlərimdən küsüb incisən,
Eşqimlə könlünü alacağam mən.
Sevdadan usanıb, “yoruldum” desən,
Yenə de arzunda, diləyində sev!
Gəl, gülüm, inanaq gələcək günə,
Arzumuz qarışıb biri-birinə.
Bizə nəğmə qoşsun küləklər, yenə!
Eşqi var o əsən küləyin də, sev!
Sən getmə, gen dünya mənə dar olar!
Getmə, həsrətini qoyma yadigar!
Sanma ki, bir qüvvə bizi ayırar,
Yetməz buna gücü fələyin də, sev!
Dostları ilə paylaş: |