471
Mənə cavab vermədilər, lakin işarə ilə göstərdilər ki, salam verib daxil olmaq olar. Bəlli oldu ki,
onlar danışmırlar, qaravulların heç yerdə danışmaq haqqı yoxdur. Bir addım da irəli keçib "Ya
həqq, ya mədəd!" dedim və içəri girdim.
Xoşavazlı tutilər, gözəl səsli bülbüllər yavaş-yavaş oxuyurdular. Müşk-ənbər qoxusu adamın
ruhunu təzələyir, hədsiz sevinc bəxş edirdi. Gül-çiçək getdikcə artırdı. Qəlbimdə hər an yeni
qüvvət doğur, gücüm anbaan çoxalırdı. Fərəhlə atdığım hər bir addımda sevincim artır, onun
müqabilində dünyanın və axirətin ləzzətini unudurdum. Həqiqi sevgi cazibəsi məni elə sürətlə
özünə tərəf çəkirdi ki, əl-ayağımı büsbütün itirmişdim. Özümü əsla saxlaya bilmirdim. Şadlıq və
sevincimin şiddətindən uşaqlar kimi atılıb düşür, əl çalıb oynayırdım. Göz işlədikcə yaşıl ağaclar
idi. Onların dibindən duru, saf su axırdı. Bəzən istəyirdim bu sərin, şəffaf suyun kənarında
oturub əl-üzümü yuyam, bir qədər sərinləyəm, cəhənnəmin tüstü və kəsafətini üz gözümdən
təmizləyəm, lakin mövhüm məhbubun vüsal şövqü mane olurdu. Mən qaça-qaça suyun kənarı ilə
gedir və öz-özümə deyirdim: "Bu səfərdə, şübhəsiz ki, bəxt mənə yar olmuşdur, iqbal və uca tale
məni buraya çəkib gətirmişdir".
Min könül qanı ilə bəxt yetirmiş yarə,
Ey gözüm, gözlə, yatarsan, daha olmaz çarə.
Getdim. Birinci darvaza kimi zəfər tağını andıran ağaclarla bəzənmiş bir yerə gəlib çatdım.
Sağında və solunda yenə də iki qaravul dayanmışdı. Bunların birinci qaravullarla fərqi yalnız
paltarlarının rəngində idi. Bunlar al-qırmızı paltar geymişdilər. Ağacların da qol-budağı,
yarpaqları tamamilə qırmızı idi, ləl kimi al rəngdə idi. Əvvəlki kimi irəli gedib salam verdim.
Salamımı aldılar. Daxil olmaq icazəsi aldım. İşarə ilə izin verdilər. Tağın başında lövhə
vurulmadan qırmızı xətlə "Ya həqq, ya mədəd!" yazılmışdı. Mən də "Ya həqq, ya mədəd!" deyib
içəri girdim. Burada hər şey -- çəmən də, ağaclar da, süsən də, sənubər də al rəngdə idi. Mənə elə
gəldi ki, Mars kürəsinə gəlib çatmışam. Çünki, eşitdiyimə görə, Mars kürəsində bütün ağaclar,
göyərtilər, hətta quşların qanadları qırmızıdır. Arxlarda saf, şəffaf sular axırdı, ancaq onların da
rəngi yaqut kimi qırmızı idi. Mən özümü anlamadan, hər şeydən xəbərsiz, mövhüm dosta çatmaq
üçün ixtiyarsız gedirdim. Sanki məchul bir qüvvə məni özünə tərəf çəkirdi.
Boynuma bir ip salıbdır sevgili,
Lütfdür, nazu məhəbbət hər teli.
Gah cəhənnəm, gah behiştə o çəkir,
Sövq edir hər yanə kim, o istəyir.
Yenə də tələsib sürətimi artırdım. Kimsəni görmürdüm ki, kefini soruşam, görsəydim də
danışmaq macalım yox idi.
472
Gəlib başqa bir tağın yanına çatdım. Yenə də əvvəlki qaravullar kimi, üzü nurani iki cavan tağın
sağında və solunda dayanmışdılar. Əllərində nur saçan qızıl çomaq tutmuşdular. Tağın başında
"Ya həqq, ya mədəd!" yazılmışdı. Onun da üstündə havada bir-birinin yanında bu hərflər bir
sırada dayanmışdı: VƏTƏN!
Qaravullara yaxınlaşıb salam verdim. Cavabını eşitdim. İçəri girmək üçün izn aldım. Əvvəlkilər
kimi işarə ilə izn verdilər. Yenə də bunlarla əvvəlkilərin arasında yalnız paltarlarında fərq var idi.
Bunların geyimi camaat arasında o qədər də işlənilməyən göy rəngdə idi. "Ya həqq, ya mədəd,
ya Vətən!" deyib içəri girdim. Bircə addım irəli atan kimi qəribə bir mənzərənin şahidi oldum.
Bəh-bəh, əcəb səfalı məva, nə gözəl abu həva! Hər tərəfdən sular şaqqıldayıb axır, xoş avazlı
quşlar ağacların budaqlarına qonub cəh-cəh vururdu. Arxlardakı qumlar da dürr və mərcan kimi
idi. Meyvə ağacları bir-birinin yanında səf çəkib dayanmışdılar. Arxların ətrafı gül-çiçək, lalə-
sünbüllə örtülmüşdü. Sərv ilə şümşad başını göylərə qaldırmışdı. Bu bağdakı ağacların yanından
sular axıb keçirdi.
Bir az da irəli gedib bir dəstə adamı bir yerə toplaşıb oturan gördüm. Bir qism də, -- bilmirəm
huri idilər, ya qılman, ya da insan cildinə girmiş göylər mələki idilər, -- dəstə-dəstə dolanıb
söhbət eləyir, deyib gülürdülər. Bura çəmənlik idi, yaxud həqiqi cənnət. Hamı şən və fərəhli idi,
hamı çalıb oynayırdı. Onlar başqa bir aləmdə, bizim gördüyümüz aləmdən tamamilə fərqli bir
aləmdə idilər. Düşmənin gözündən iraq, mən yazıq mat və məəttəl heyran olmuşdum.
"Fətəbarəkallahu əhsənül-xaliqin" dedim. Şeyx Sədinin bir şeri yadıma düşdü. Yavaş-yavaş
zümzümə eləməyə başladım:
Lətafətli gözəl bir abu həva.
Mübarək bir mənzil, ülvi bir məva;
Arxların kənarı gül ilə reyhan.
Jalədə yuyunmuş çiçəklər əlvan.
Cərgəylə düzülmüş ağaclar uca,
Gözəl dilbərlərtək qədləri rəna.
Hər bir budağında xoş səsli quşlar
Yüz mahnı bəstələr, min cəh-cəh vurar.
Sərvi sanki gəlmiş cənnət bağından,
473
Tuba ağacından verərdi nişan.
Heyrətimin şiddətindən məndə yerimdən tərpənmək taqəti qalmadı. İstər-istəməz oturdum ....
Yerimdən durdum, irəli gedib gördüklərimi daha yaxından diqqətlə nəzərdən keçirdim.
Ay üzlülər, günəş simalılar, ahu yerişlilər, zünnar saçlılar dəstə-dəstə gələrək göz yaşı kimi duru
sular püskürən qızıl fəvvarələrin yanında əyləşib gülümsəyirdilər.
Üz deyil gördüyüm, cənnətdir yəqin,
Bir cüt kəmənd idi sanki telləri.
Ləltək dodaqlar göyərçin qanı,
Zil qara telləri qaranquş pəri.
Dildə hanı o qüdrət ki, o işvəli-şivəli pəri-peykərləri layiqincə tərifləyə bilsin.
Məhcəbinlər dəstə-dəstə dayanmış,
Ayüzlülər qatar-qatar düzülmüş,
Yüz min bülbül olmaz yüz min çəməndə,
Hər budaqda yüz min bülbül oturmuş.
Əcəba, görəsən cənnət budurmu? Bu deyildirsə, bəs bura haradır? Bu sular, bu ağaclar behiştdən
başqa harada ola bilər? Belə meyvələri heç bir göz görməmiş, onların tərifini heç bir qulaq
eşitməmişdir. Ürəyimdən keçirdi ki, meyvələrdən bir az dərib yeyim, ya da cibimdə, qoynumda
saxlayıb, dünyaya aparım. Ancaq qorxurdum səslənsinlər ki, "bu ağaca yaxınlaşma", sonra da bu
mübarək yerdən qovulum. Özümü saxladım. Həva və həvəsin ardınca getmədim. Lakin yenə də
nəfsi-əmmarənin məni aldadacağından, mənim xəcalət çəkib başı aşağılığıma səbəb olacağından
qorxurdum. Qorxurdum ki, bunun üstündə məni bayıra atsınlar. Mən bu gülzarın və günəş üzlü
hurilərin tamaşasından məhrum qalım, xoş avazlı quşların səsini bir daha eşitməyim.
Belə bir vəziyyətdə özümü hər bir cəhətdən bəxtiyar hesab edirdim, heç nədən şikayətim yox idi,
fəqət bir dil bilən tapmırdım ki, ondan soruşam görəm mən haradayam.
Dostları ilə paylaş: |