Gülüstan müqaviləsi
9
ki, əgər Əfqanıstan şahı Hindistan üzərinə hücum etmək niyyətinə düşsə,
onda Qacar şahı Əfqanıstana qarşı hərbi əməliyyata başlamağı öz üzərinə
götürür. Bununla Əfqanıstandan Hindistana qarşı ehtimal edilən
təhlükənin qarşısı alınmış olurdu. Anlaşmanın 4-cü bəndində isə qeyd
olunurdu ki, əgər Əfqanıstan tərəfindən və ya Fransa tərəfindən Qacarlar
dövləti üzərinə hücum baş versəydi, onda ingilislər Qacarlar qoşunlarına
top, mərmilər və digər hərbi ləvazimat verməyi öz üzərinə götürürdü.
Sonuncu maddədə isə təsbit olunmuşdu ki, əgər Fransa qoşunları İran
ərazisindəki limanlardan birinə çıxarılmış olsa, onda onlara qarşı birgə
hərbi qüvvələr yaradılmalı idi. Bu zaman əsas ağırlıq yəni, fransalılara
qarşı qoşun çıxarılmasını Qacar sarayı təmin etməli, qoşunların silah və
sursatla təminatına isə ingilislər yardım göstərməli idi (13).
Bu müqavilənin imzalanmasından sonra Avropada cərəyan edən
proseslər onun icrasına da ciddi təsir göstərdi. Məlumdur ki, I Pavel qətlə
yetiriləndən sonra I Aleksandr Rusiya çarı elan edildi. Onun çarlığı
dövründə Rusiya ilə Fransa arasında münasibətlər dəyişdi və Rusiya ilə
Fransa bir-birinə düşmən olan dövlətə çevrildilər. Rusiyanın İngiltərənin
düşməni olan Fransaya qarşı mövqe tutması ingilislərin maraqlarına
uyğun idi. Çünki bu zaman Fransa zəifləyə bilərdi. Ona görə ingilislər
Rusiyanın zəifləməsinə səbəb ola biləcək addımlar atmaqdan çəkindilər.
Nəticədə, ingilislərlə Qacar sarayı arasında imzalanan müqavilə də icra
edilmədi. Çünki imzalanmadan sonra tərəflərin bu anlaşmaya münasibəti
birmənalı olmadı. Qacar sarayı bu anlaşmanı öz mənafelərinə müvafiq
saymadı və bir müddətdən sonra anlaşmanı imzalamış olan vəzir Hacı
İbrahim xan Etimadüddövlə qətlə yetirildi. Digər tərəfdən, anlaşmanın
məzmuna müxtəlif fərqli münasibətlər mövcud idi. Qacar sarayı ümid
edirdi ki, bu anlaşmanın imzalanmasından sonra Cənubi Qafqazda
güclənən rus təhlükəsinin aradan qaldırılmasına da ingilislər müvafiq
hərbi yardımı göstərəcəklər. İngilislər isə 1801-ci il anlaşmasına əsasən
özlərini Rusiya təhlükəsinin qarşısının alınması üçün Qacarlar sarayına
kömək göstərməkdə borclu saymırdılar və bildirirdilər ki, bu anlaşmanın
Qafqazdakı hadisələrlə heç bir bağlılığı yoxdur. Doğrudan da 1803-04-cü
illərdə Azərbaycan xanlıqları ərazisində aparılan döyüşlərdə yardım
göstərilməsi üçün Qacarlar sarayının ingilislərə olan müraciəti cavabsız
qaldı. İngilislər Qacar sarayına əməli kömək göstərməməklə bərabər,
Rusiyanın etirazına səbəb olacaq bir addım atmaq niyyətində deyildilər.
Çünki ruslar Avropada ingilislərin düşməni olan fransalılara qarşı
müharibə aparırdılar və ona görə də rusların zəiflədilməsi ingilislərin
marağına uyğun deyildi (14).
Mehman Süleymanov
10
Mövcud olan məlumatlara görə, ruslara qarşı Qacar qoşunlarına
kömək göstərilməsi üçün ingilislər bir neçə ağır şərtlər irəli sürdülər.
İngilislər şah sarayından tələb etdilər ki, Qafqazın ruslar tərəfindən
işğalının qarşısının alınması üçün Fars körfəzindəki Xark adası, Xəzər
dənizinin cənubundakı limanlar ingilislərə verilsin, habelə Buşehrdə
ingilislər tərəfindən istehkamlar yaradılmasına şah sarayı razı olsun (15).
İrəvan xanlığının ərazisində rus qoşunları ilə baş verən döyüşlər bir
daha göstərdi ki, Azərbaycan xanlıqlarına olan iddiaları həyata keçirmək
üçün Qacar sarayının xarici yardıma ehtiyacı vardır.
Rusiyanın Qafqaz təcavüzünün qarşısının alınmasında yardım
göstərilməsi üçün şah sarayı ingilis dövlətinin Bağdaddakı siyasi
nümayəndəsi ser Harvard Consa müraciət etdi. Baxmayaraq ki, bu vaxt
şah sarayı artıq Fransa ilə müəyyən əlaqələr qurmağa çalışırdı. Harvard
Cons 1805-ci il sentyabrın 19-da Mirzə Bozorga göndərdiyi məktubunda
bildirdi ki, şah sarayının xahişi Londona çatdırılıbdır. O eyni zamanda
onu da çatdırırdı ki, Fransa nümayəndəsinin Tehrana gəlməsindən xəbər-
dardır və bu nümayəndə şah sarayı ilə İngiltərənin dostluğuna xələl gətirə
bilər. Onun fikrincə, Fransa onsuz da şah sarayına yardım edə bilmə-
yəcəkdi. Çünki belə bir yardımı göstərmək üçün Fransa Almaniyadan,
Osmanlı dövlətinə və Rusiyaya məxsus olan ərazilərdən keçməli idi ki,
bu da mümkün deyildi. Dəniz yolu ilə Qacar sarayına kömək göstərməyə
isə Fransanın imkanı yox idi. Ona görə də qeyd olunurdu ki, Fransa vəd
etsə də Qacar sarayına kömək göstərə bilməyəcək (16).
Qafqaz cəbhəsində vəziyyət daha da mürəkkəbliyə doğru gedəndə
şah sarayı yenidən yardım üçün Məhəmməd Nəbi xanın rəhbərliyi altında
Hindistandakı ingilis hakiminin yanına nümayəndə heyəti göndərdi.
Həmin nümayəndə heyəti 1801-ci ildə imzalanmış anlaşmaya əsasən
ingilislərdən rus təcavüzünün qarşısını saxlamaq üçün yardım istəsə də
bir nəticə hasil olmadı (17). İngilislər bir daha belə bir bəhanə gətirdilər
ki, şah sarayı ilə imzalanan anlaşma yalnız Fransanın müdaxilələrinə
qarşı yardım göstərilməsini nəzərdə tutur. Qafqazda cərəyan edən
hadisələr isə bu müqavilənin mövzusu deyil.
Bununla, şah sarayına bir dəfəlik aydın oldu ki, Rusiyanın Cənubi
Qafqazdakı təcavüzünün qarşısını almaq üçün ingilislərə bağlanan
ümidlər tam əsassızdır.
Gülüstan müqaviləsi
11
2. Azərbaycan xanlıqlarının işğalında Fransa amili
Şah qoşunlarının İrəvan xanlığı ərazisində general Sisianovun
komandanlığı altında olan güclü rus qoşunlarına qarşı müharibəsi ciddi
hərbi yardıma arxalanmadan başlanmalı oldu. Yuxarıda qeyd edildiyi
kimi, elə ilk qarşılaşmanın Qacar qoşunları üçün əlverişsiz nəticəsi şah
sarayını məcbur etdi ki, xarici dəstək axtarışına başlasın, bu dəstəyin
yardımından bəhrələnməklə həm də qoşunların yenidən qurulmasına
kömək alsın. Əks təqdirdə rus qoşunlarının güclü müqaviməti qarşısında
Qacar sarayı Azərbaycan xanlıqlarında olan iddialarından əl çəkməli ola-
caqdı. Azərbaycan xanlıqlarının şah sarayı ilə hərbi-siyasi ittifaqa get-
məməsi isə qacarların hərbi durumunu daha da çətinləşdirirdi.
Əslində, Rusiya kimi güclənməkdə olan bir dövlətin qoşunlarının
qarşısının alınmasının çətin olduğunu görən Fətəli şah başqa bir xarici
dəstək axtarışına çıxdı və onun nəzəri Napoleonun üzərində dayandı. O,
Napoleonun Avropada, o cümlədən Misirdə qazandığı uğurlar haqqında
eşitmişdi və əmin idi ki, belə bir qüdrətli şəxslə müttəfiqliyə nail
olunması Rusiyanın Cənubi Qafqazda başlayan təcavüzünün qarşısının
alınmasında faydalı ola bilər.
Qacar sarayı hərbi-siyasi əməkdaşlığın qurulmasına əslində Fransa
rəhbərliyi də maraq göstərirdi. Belə bir əməkdaşlıq bir tərəfdən Fransanın
şərqdə işğalçılıq siyasətinin həyata keçirilməsinə kömək göstərə biləcəyi
kimi, digər tərəfdən də Fransanın gərgin münasibətlərdə olduğu
İngiltərənin şərqdəki mövqelərinin zəiflədilməsinə də kömək göstərə
bilərdi. Bu istiqamətdə Fransanın İran ərazisindən keçməklə Hindistana
qoşun çıxarmaq planının mövcudluğu da məlum idi.
Fransa direktoriyasının 1798-ci il aprel ayının 12-də qəbul etdiyi
“İngilislərin bütün şərq mülklərindən qovulması haqqında” qərarından
sonra Napleon şərq dövlətlərinin hakimləri ilə fəal yazışmalara başladı.
İran və Cənubi Qafqaz ərazilərinə hərbi-strateji əhəmiyyəti olan ərazilər
kimi Fransa rəhbərliyi tərəfindən xüsusi diqqət yetirilirdi (18).
Hələ Ağa Məhəmməd şah Qacarın dövründə Fransa sarayının Qacar
sarayı ilə siyasi-iqtisadi əlaqələr qurmağa çalışması haqqında faktlar
mövcuddur. Bununla bağlı, Fransanın bir heyəti İstanbuldan keçməklə
Tehrana gəldi. 1801-ci ildə isə Fransanın Bağdaddakı konsulu Russonun
köməyi ilə Fransa sarayının məktubları Tehrana göndərildi. Bildirilir ki,
Tehranda kimsə Fransa dilində olan məktubu oxuya bilmədiyi üçün iki
dövlət arasında ciddi əməkdaşlıq imkanları açılmadı (19).
Dostları ilə paylaş: |