Mehman Süleymanov
134
Fətəli şahın elçiləri ilə Sisianovla münasibətlər qurulmazdan əvvəl
görüşmüşdü və həmin görüş haqqında Sisianovun da məlumatı var idi.
Ona görə də Mustafa xan onun Rusiyanın düşməni olan dövlətlə əlaqələr
qurmaqda ittihamlandırılması ilə barışmadı (50).
General Sisianovu qəzəbləndirən digər bir məqam Mustafa xanın
Şamaxı xanlığının Rusiyaya birləşdirilməsi haqqında müqavilə imzalan-
ması üçün Kürəkçay ətrafına gəlməkdən imtina etməsi idi. Sisiasnov
onun tələbinə qarşı iradə nümayiş etdirilməsini şəxsiyyətinin təhqiri kimi
qəbul edirdi və bunun üçün də Mustafa xana özünə xas ironiya ilə
məktub göndərdi. Sisianov bildirdi ki, imzalanacaq müqavilənin şərt-
lərinə əsasən, Mustafa xan Gürcüstanın baş hakiminin (yəni Sisianovun)
iştirakı ilə Rusiya imperatoruna sədaqət andı qəbul etməlidir. Ona görə
də o tələb edirdi ki, Mustafa xan bir neçə əyanı ilə birlikdə Kürəkçay
yaxınlığına gəlsin və müqaviləni orada imzalasın. Mustafa xanın
təhlükəsizliyinə təminat verilməsi üçün Sisianov knyaz Eristovu Mustafa
xanın olmadığı günlərdə Şamaxıda saxlamağa hazır idi (51).
General Sisianovun təkidli tələbinə baxmayaraq, Mustafa xan xanlığı
tərk edərək Kürəkçaya getməkdən imtina etdi. O bəyan etdi ki, bu tələbi
qəbul etməmək üçün onun əsasları vardır və həmin əsaslar Sisianovun
nümayəndələrinin diqqətinə çatdırıldı. Mustafa xan bütünlükdə
müqavilənin harada imzalanacağına görə narahatçılığı əbəs sayırdı. O
təklif etdi ki, general Sisianov öz etibarlı nümayəndələrini onun yanına
göndərsin və həmin nümayəndələrin iştirakı ilə həm müqavilə, həm də
Rusiya imperatoruna sədaqət andı qəbul edilsin. Şamaxı xanı Sisianovun
nümayəndələrinin Şamaxıda təntənə ilə qarşılaşacağına söz verdi.
Mustafa xan Sisianov tərəfindən onun etibarsızlıqda günahlandırılmasını
qəbul etmədi. Əksinə, məktubunun sonunda o, Sisianova anlatdı ki, onun
ruslara qarşı inamsızlığı vardır və general Sisianov onun narahatçılıq-
larını aradan qaldıranda ikilikdə görüş keçirməyə də hazır olacaqdır (52).
Bütün təkidlərinə baxmayaraq, general Sisianov öz tələblərini
bütünlüklə Mustafa xana qəbul etdirə bilmədi. Belə olanda general
Sisianov özünün sınanmış vasitəsi olan güc tətbiqinə əl atmağı
qərarlaşdırdı. Sisianov əvvəlcə rus qoşun dəstəsini Şəki xanlığına
çıxarmaqla Şamaxı xanlığına yaxınlaşmaq, qoşunların yaxında olduğunu
göstərməklə Mustafa xana təzyiq etmək istədi. Bununla bağlı Sisianov
Şəki xanlığındakı rus qoşun dəstəsinin rəhbəri mayor Rebinderə müvafiq
göstəriş verdi. General Sisianov Mingəçevir yaxınlığında Kür çayını
adlamaq istəyirdi. O, mayor Rebinderdən tələb etdi ki, çoxlu ağac qırıb
Mingəçevir yaxınlığına gətirsin ki, Kürü adlamaq üçün həmin ağaclardan
sal düzəldilsin (53).
Gülüstan müqaviləsi
135
Sonradan Sisianov sadəcə güc nümayişi etdirmək deyil, doğrudan da
Şamaxı xanlığı üzərinə hücum təşkil etməyi qərar aldı. Bu məqsədlə Kür
çayını adlamaq üçün Mingəçevirə doğru istiqamət götürdü.
Mustafa xan isə görünür, açıq müqavimət göstərməyin onun üçün və
xanlıq üçün yaxşı qurtarmayacağını hiss edirdi. Ona görə də Şamaxı xanı
Rusiya təbəəliyinə qəbul edilməsi üçün müqavilə imzalamaq məqsədilə
general Sisianovla Tərtər çayı ətrafında görüşməyə razı oldu.
Mustafa xanın yazdıqlarından belə bir qənaətə gəlmək mümkündür
ki, Tərtər çayı sahilində görüş keçirmək də Sisianovun nümayəndəsi
Eristov tərəfindən təklif olunmuşdu. Mustafa xan bu təklifə razılığını bil-
dirərək öz nümayəndəsini Sisianovun yanına göndərsə də rus generalı ar-
tıq bu razılaşmadan da imtina etdi. Sisianov Mustafa xanı müharibə ilə
hədələdi və bəyan etdi ki, ya onun təklifi birmənalı şəkildə qəbul olun-
malıdır, ya da Mustafa xan Fitdağda müharibə ilə qarşılaşmalıdır (54).
Sisianov Mustafa xanın yaxınları və qoşunu ilə Fitdağdakı qalada
yaxşı müdafiə olunmaq imkanından xəbərdar idi. Ona görə də yürüşə
daha böyük qoşun dəstəsi çıxarmağı planlaşdırırdı. Bununla bağlı o,
İbrahim xana da məktub yazdı və ondan 1000 nəfərlik qoşun dəstəsi
göndərilməsini tələb etdi. Sisianov həmin dəstəyə xanın oğlu Mehdiqulu
ağanın rəhbərlik etməsini istədi. O tələb edirdi ki, dəstə yürüşə hazır
vəziyyətdə olsun və işarə verilən kimi hərəkət etsin. Sisianov eyni
zamanda Qarabağ ərazisində olan mayor Lisaneviçin dəstəsini də yürüşə
cəlb etməyi planlaşdırırdı (55).
General Sisianov eyni zamanda Şəki xanı Səlim xandan 500 nəfərlik
bir dəstənin hazırlanmasını tələb etdi. Yuxarıda qeyd edildiyi kimi, 1805-
ci il noyabr ayının ortalarında Səlim xan Sisianovla Mustafa xan arasında
vasitəçilik etmək təşəbbüsünü ortaya atdı və məlum olduğu kimi bu
təşəbbüs bir nəticə vermədi. Belə olanda Sisianov dəstəsi ilə Mingəçevir
yaxınlığında Kür çayını adlamağı qərara aldı. 1805-ci il noyabr ayının
30-da Sisianov dəstəsi ilə Kür çayını adladı və Şəki xanlığı ərazisi ilə
hərəkətini davam etdirərkən Səlim xanın hazırladığı 500 nəfərlik qoşun
dəstəsi də ona qoşuldu. General Sisianov Şamaxı yaxınlığına kimi 10
günlük yürüş həyata keçirdi və 1805-ci il dekabr ayının 11-də Yeni
Şamaxıdan 5 verst aralı olan Burumarx adlı məntəqəyə yetişdi. Rus
qoşun dəstəsinin Şamaxıya doğru irəliləməsi Mustafa xan tərəfindən
diqqətlə izlənilirdi və bu yürüş əslində Mustafa xanın iradəsinin əksinə
olaraq həyata keçirilirdi. Rus qoşun dəstəsi Burumarx ətrafında düşərgə
salanda yaxınlıqdakı yüksəkliklərin birində Mustafa xanın 80 nəfərlik atlı
dəstəsi göründü. Bu dəstədən qorunmağı Sisianov kazaklara tapşırdı.
Sisianovun yazdığına görə, kazaklar Mustafa xanın atlıları ilə danışıqlara