25
ansambl musiqisi əmələ gəlir. Rus bəstəkarları P.İ.Çaykovski,
A.P.Borodin, A.K.Qlazunov, S.V.Raxmaninov
ümumdünya
ansambl repertuarını yüksək bədii səviyyəli əsərləri ilə
zənginləşdirmişlər.
XX əsrin əvvəlindən ən rəngarəng və müxtəlif növlü alət
tərkiblərinə meyl yaranır və bu cür tərkiblər üçün yazılmış
əsərlərdə hər xəttin və hər ştrixin qabarıq göstərilməsi,
vurğulanması ilə tembral təfsilatlı yazının rolu kəskin surətdə
artır.
1930-50-ci illərdə XX əsrin əvvələrində cərəyan edən
bədii avanqardın “sol”, radikal yönəmli istiqaməti, təmayülü
A.Vebernin, İ.Stravinskinin yaradıcılığında öz davamını tapır.
Bu dövr musiqisinin urbanistik budağı da (
B.Bartok, A.Jolive,
B.Britten) radikallığı ilə seçilir,
çox vaxt zərb alətlərinin
intensiv enerjisinə müraciət edir. Bu dövrdə ara-sıra subyektiv
romantik xüsusiyyətləri qeyri-adi adlarda əksini tapan əsərlər
də peyda olur, məsələn,
P.Arm, “31 an”,
H.Eysler, “Yağış
təsvirinin 14 üslubu”,
R.Leybovits, “Metaforaların izahı” və s..
Eyni zamanda bu dövrün bir sıra əsərlərində (
F.Pulenk,
B.Martinu, Q.Batseviç) obyektivliyə meylliliklə, insanın və
dünyanın saf, pozitiv nöqteyi-nəzərdən qiymətləndirməsi ilə
fərqlənən əsərlər yaranır ki, bütün bunlar da izharın daha
tarazlaşdırılmış forması və aydın üslubunda, həmçinin geniş,
demokratik auditoriyaya müraciət edilməsində özünü göstərir.
Buna bənzər ənənələrə meyllilik və qayıdış dalğasında artıq
“klassiklik” anlayışı ümumestetik
harmoniya, gözəllik, aqillik
prinsiplərinin bərqərar olması və hətta köhnə üslub
musiqisinin bu və ya digər stilistik ifadələrindən istifadə
edilməklə əvvəlki
bəstəkarlıq modellərinə riayət etmə kimi
şərh edilir (buna gözəl nümunə kimi
D.D.Şostakoviçin
Fortepiano kvintetini göstərmək olar).
XX əsrin ikinci yarısında kamera ansamblı janrında əsas
olaraq iki istiqamət –
birincisi,
“yeni folklor dalğası”nın
26
davamçıları, ikincisi,
“ekstremal avanqard”a əks-təsir olaraq
neoromantizm özünü daha parlaq göstərir. Belə ki, bu dövrün
təxminən 60-80 illərində əvvəlki mərhələnin aparıcı
istiqamətinə qarşı kifayət qədər kəskin ideya-bədii ayrılığı ilə,
qarşıdurma ilə xarakterizə edilir və bu qarşıdurmanın
təşəbbüskarları kimi o vaxtın cavan bəstəkarları çıxış edir. Bu
yeniləşmə pafosunun ən kəskin, hətta ekspansiv təzahürü
“ikinci avanqard” nümayəndələri
A.Şnitke, E.Denisov,
S.Qubaydulina kimi bəstəkarlarının yaradıcılığında daha parlaq
əksini tapır. XX əsr musiqisinə xas olan üslub təmayüllərinin
rəngarəngliyi öz cəmlənmiş izharını lokal janr olan kamera-
instrumental ansamblı janrında
daha parlaq, daha dolğun halda
tapır. Bu dövrün estetik tendensiyalarının, təmayüllərinin
musiqi səsləri ilə ifadə edilməsi yollarının axtarışı tembral,
koloristik, texniki imkanların sərhədlərini hədsiz dərəcədə
genişləndirir və ifadə üsulları sahəsində yeni, görünməmiş
irəliləyiş yaradır.
XXI əsrin sosial-mədəni şəraiti kamera ansamblının
ənənəvi anlayışına öz təsirini göstərir. Bu gün biz ifa
təcrübəsində XIX-XX əsrlərdə mövcud olmayan rəngarəng
musiqi tərkibləri ilə qarşılaşırıq. Belə ki, kamera ansamblı
təcrübəsində əvvəllər biri digəri
ilə heç cür uzlaşmayan
alətlərdən ibarət müxtəlif tərkibli – klavişli, simli, nəfəsli, zərb
və xalq çalğı alətlərini birləşdirən qarışıq ansambllarla
rastlaşırıq. Buna misal kimi müasir Azərbaycanın görkəmli
bəstəkarı Firəngiz
Əlizadənin kamera-instrumental
yaradıcılığından nümunələrini - bəstəkarın soprano, klarnet,
violino, violonçel və fortepiano üçün "İtirilmiş zaman
axtarışında", qiraətçi, solo-violonçel, violino və xalq çalğı
alətləri üçün "Dərviş" Septeti, tar (ud) və kamera ansamblı
üçün “Miraj” (“İlğım”), violino, violonçel,
çin xalq musiqi aləti
27
pipa və fortepiano üçün “Sabah” və s. əsərlərini misal
göstərmək olar.
Kamera ansamblı janrının təkamülünə ardıcıllıq və
dialektiklik əlamətləri məxsusdur. Musiqi sənətinin inkişaf
qanunlarına uyğun olaraq
Barokko dövrünün ansambl
mədəniyyəti rəngarəngliyi klassik dövrdə
“ali nizam, aqilliyin
son dərəcəsi”nin təzahürü olan hərtərəflilik, universallığa və
normativliyə meylliliyi ilə əvəz
olunur və romantik bədiilik
(gözəllik, canlılıq, əyanəlik) dünyasından keçərək, XX əsr
üslub təzahürünün
“plüralizm”inə yönəlir.
Bu gün ansambl ədəbiyyatı olduqca zəngindir. Burada
səmimi, şəxsi dairəni əhatə edən əsərdən epik-monumental
həcmli əsərə qədər istənilən diapazonlu məzmun-məna
mənbələri mövcuddur.
2.3. Ansamblı orkestrdən fərqləndirən məqamlar
Yuxarıda
qeyd edildiyi kimi, XVIII əsrin ortalarında
kamera musiqisi simfonik musiqinin, simfonik orkestrin
yaranmasına əsas, bünövrə olmuşdur. Lakin bu iki olduqca sıx
bağlı olan janrlar biri digərindən əsaslı surətdə fərqlənir və
həmin fərqlər aşağıdakılardır:
1. Kamera əsərində
hər partiyanı adətən
yalnız bir alət,
bir səs
ifa edir. Orkestr musiqisində isə, kamera musiqisindən
fərqli olaraq,
tərkib genişlənmiş, artıq
hər partiyanı bir nəfər
deyil,
unison şəklində qruplar ifa edir.
2. Müasir dövrdə adətən
orkestr musiqisi bəstəkar
tərəfindən fortepianoda bəstələnir və yalnız
işin axır
mərhələsində müxtəlif alətlər üçün
orkestrləşdirilir.
Kamera ansamblı əsəri əvvəlcədən bəstəkar tərəfindən
konkret alətlər üçün yazılır. Bu vaxt partiyaların bərabərliyi və