158
Soyuq müharibədən sonra beynəlxalq vəziyyətdə mühüm
dəyişikliklərin baş verməsi
NATO-nun fəaliyyət strategiyasında da müəyyən yeniləşmələrə gətirib çıxardı. 1994-cü
il Roma və 1999-cu il Vaşinqton sammitlərində təşkilatın yeni strateji konsepsiyalarının
qəbul edilməsi həmin prosesi sürətləndirdi. NATO rəhbərliyinin qərarlarına uyğun
olaraq, təşkilatın hərbi infrastrukturunda ixtisarlar aparıldı və silahlı qüvvələrin sayı
azaldıldı.
NATO-nun strateji konsepsiyasındakı dəyişikliklərin əsas xüsusiyyətlərindən biri
beynəlxalq təhlükəsizliyin təmin edilməsi üçün dövlətlərarası münasibətlərdə qarşılıqlı
inama və əməkdaşlığa üstünlük verilməsidir. Təşkilatın 1994-cü ildə keçirilən Brüssel
sammitindən sonra NATO üzvü olmayan ölkələrlə də münasibətlər yaratmaq nəzərdə
tutulmuşdur. 1993-cü ildən etibarən NATO-nun keçmiş sosialist ölkələri hesabına
genişlənməsi məsələsi aktuallaşdı. Bu ölkələrdən Polşa, Çexiya və Macarıstan 1999-cu
ilin aprelində, 2004-cü ildə isə Rumıniya, Bolqarıstan, Slovakiya, Sloveniya, Litva,
Latviya və Estoniya NATO-ya üzv qəbul edildilər.
Dünya siyasətində mühüm təsir gücünə malik çoxfunksiyalı regional qurumlardan
biri də Qərbi Avropa İttifaqıdır. Qərbi Avropa İttifaqı (QAİ) 1948-ci ildə Brüssel
müqaviləsi əsasında yaradılmışdır. Belçika, Böyük Britaniya, Almaniya, Yunanıstan,
İspaniya, İtaliya, Lüksemburq, Niderland, Portuqaliya, Fransa kimi Qərbi Avropa
dövlətləri bu təşkilatın ilkin üzvləri, Norveç, Türkiyə, İslandiya assosiativ, Avstriya,
İsveçrə, Finlandiya, İrlandiya isə müşahidəçi üzvü olmuşdur. Ümumiyyətlə, 28 Avropa
ölkəsi hazırda QAİ-nin nüfuz dairəsindədir. Petersberq bəyannaməsinə (1992) görə,
QAİ-yə beynəlxalq münaqişələrin aradan qaldırılması üçün preventiv tədbirlər görmək
və digər humanitar aksiyaların həyata keçirilməsində silahlı qüvvələrdən istifadə etmək
səlahiyyəti verilmişdir. Bu bəyannamədə və Maastrixt bəyanatında (1992) QAİ, NATO
və Avropa İttifaqı arasındakı münasibətlərin formalaşması prinsipləri öz əksini tapmışdır.
1999-cu ildə Köln şəhərində keçirilən tədbirdə QAİ və Avropa İttifaqının (Aİ) xarici
siyasət, hərbi məsələlərlə bağlı birgə mövqedən çıxış etmələrinin vacibliyi qeyd edilmiş
və bu məqsədlə Aİ-nin tərkibində yeni koordinator vəzifəsinin yaradılması qərara
alınmışdır.
Afrika Birliyi Təşkilatı (ABT) 1963-cü ildə yaradılmış və tərkibində 50-dən çox
dövləti birləşdirir. ABT də çoxfunksiyalı regional qurum hesab olunur. Bu regional
təşkilatın idarə olunması Hökumət və Dövlət Başçılarının Assambleyası, Nazirlər
Şurası, Baş Katiblik və xüsusi komissiyalar tərəfindən həyata keçirilir. Həmçinin, Afrika
159
İqtisadi Birliyi, Ümumafrika Telekommunikasiyalar İttifaqı, Ümumafrika Poçt İttifaqı və s.
xüsusi agentliklər ABT-nin vəzifələrinin yerinə yetirilməsində mühüm rol oynayırlar.
ABT-nin Afrika xalqları qarşısında ən böyük xidmətlərindən biri qitənin
müstəmləkədən azad edilməsi və aparteid əleyhinə fəal mübarizə aparması ilə bağlıdır.
Təşkilat qitədə müxtəlif motivli münaqişələrin aradan qaldırılması üçün böyük səylər
göstərmiş, hətta 1993-cü ildə münaqişələrin həllinə dair xüsusi mexanizmini də işləyib
hazırlamışdır. Lakin maliyyə mənbələrinin və lazımi siyasi dəstəyin olmaması bu
məsələlərin həllinə imkan verməmişdir. Afrikada nüvə silahından azad zona haqqında
müqavilənin imzalanması (1996) ABT-nin böyük nailiyyəti kimi dəyərləndirilir.
Amerika Dövlətləri Təşkilatı (ADT). ADT çoxfunksiyalı regional təşkilat olaraq
1948-ci ildə regionda sülhün və təhlükəsizliyin qorunması, hərbi sahədə əməkdaşlığa
nail olunması və üzv dövlətlərin inkişafının təmin edilməsi məqsədilə yaradılmışdır.
Qərb yarımkürəsinin (Amerika və Latın Amerikası ölkələri) 34 dövləti bu təşkilatın işində
yaxından iştirak edir. ADT-nin idarəetmə strukturu Baş Assambleya, xarici işlər
nazirlərinin məsləhətçi müşavirəsi, sosial, iqtisadi, təhsil, elm və mədəniyyət sahələri
üzrə şuralar, Baş Katiblik və s. orqanlardan təşkil edilmişdir. Soyuq müharibənin başa
çatması ADT-nin fəaliyyət strategiyasında və metodlarında yeni meyllərin əmələ
gəlməsinə səbəb olmuşdur. Demokratiya və insan hüquqlarının müdafiəsi, korrupsiya,
terrorizm və narkobiznesə qarşı mübarizə aparılması ADT-nin əsas məqsədlərindən
biridir. Təşkilat demokratik mühitin yaradılması üçün Haiti, Peru və Qvatemalada böyük
missiya həyata keçirmişdir.
Ərəb Dövlətləri Liqası (ƏDL).
Bu çoxfunksiyalı regional ictimai-siyasi təşkilat
1945-ci ildə yaradılmış və öz tərkibində 22 ərəb dövlətini birləşdirir. Təşkilatın əsas
məqsədi üzv dövlətlər arasında qarşılıqlı münasibətləri, iqtisadi, siyasi və mədəni
əlaqələri inkişaf etdirməkdən ibarətdir. Eyni zamanda, təşkilat xarici təcavüz zamanı
üzv dövlətlərin müzakirələr aparmasını və müvafiq qərarlar qəbul etməsini nəzərdə
tutur. Liqa regionda sülhün və təhlükəsizliyin təmin edilməsi üçün münaqişəli
vəziyyətlərin aradan qaldırılmasında yaxından iştirak edir. Təşkilatın 2003-cü ildə
keçirilən sammitində ərəb ölkələri İraq müharibəsində iştirak etməməyə çağırılmış və
İraq hakimiyyətindən BMT-nin qətnamələrini yerinə yetirməsi xahiş olunmuşdur.
ƏDL-in ali orqanı ildə iki dəfə toplaşan Şuradır. Şuranın iclasları hökumət və
dövlət başçıları, xarici işlər nazirləri, səfirlər və yaxud daimi nümayəndəliklər
səviyyəsində keçirilir. Şuranın sədrliyinə növbəlik ərəb əlifbasına uyğun olaraq
müəyyənləşir. Şurada hər bir üzv dövlət bir səsə malikdir.