156
quruluşa malikdir. OPEK-in ali orqanı olan
Konfrans, eləcə də İdarəetmə Şurası,
İqtisadi Komissiya və Katiblik dünya bazarında neftin qlobal enerji mənbəyi kimi
əhəmiyyətini qoruyub saxlamağa çalışır.
Müasir beynəlxalq münasibətlər sistemində iştirak edən regional qurumların bir
qismi çoxfunksiyalı ictimai-siyasi təşkilat kimi fəaliyyət göstərir. Bunlardan: Avropada
Təhlükəsizlik və Əməkdaşlıq Təşkilatı (ATƏT) 1973-cü ildə sosialist və kapitalist
sistemini təmsil edən Avropa ölkələri arasında diplomatik qurum kimi formalaşaraq
beynəlxalq münasibətlər sistemində aparıcı mövqelərdən birini tutmağa başlamışdır.
Bu təşkilat uzun müddət Avropada Təhlükəsizlik və Əməkdaşlıq üzrə Müşavirə
(ATƏM) adlandırılan birliyin əsasında meydana gəlmişdir.
Göründüyü kimi, ATƏM-də
təmsilçilik heterogen xarakter daşımışdır, yəni bu təşkilatın üzv dövlətləri siyasi
münasibətlərin xarakteri baxımından bir-birindən fərqlənmiş, onların bir qismi NATO-nu,
digərləri isə Varşava Müqaviləsini təmsil etmişlər.
1975-ci ildə qəbul olunan Helsinki Yekun Aktı ATƏM-in həyatında mühüm hadisə
olmuşdur. Aktın beynəlxalq əhəmiyyəti ondan ibarət idi ki, orada dövlətlərarası
münasibətlərin inkişafını nəzərdə tutan prinsiplər, həmçinin müxtəlif sahələr üzrə
əməkdaşlıq məsələləri öz əksini tapdı. ATƏM Helsinki Yekun Aktının, eləcə də 1986-cı
ildə Stokholmda və 1990-cı ildə Vyanada qəbul edilmiş sənədlərin tələblərinə müvafiq
olaraq Avropada silahlı qüvvələrin məhdudlaşdırılması məsələsində yaxından iştirak
etdi. Təşkilatın bu sahədəki fəaliyyəti Avropada sabitliyin möhkəmləndirilməsinə xidmət
edir və beynəlxalq birlik tərəfindən dəstəklənirdi. ATƏM-in atdığı addımlar ümumavropa
əməkdaşlığının inkişafına böyük təkan verdi. Ən başlıcası, dünyada “soyuq
müharibə”nin qurtarmasında ATƏM-in mühüm xidmətləri oldu.
ATƏT-in fəaliyyəti onun ali orqanı olan və iki ildə bir dəfə keçirilən Dövlət və
Hökumət Başçılarının Sammiti, xarici işlər nazirlərinin təmsil olunduğu Nazirlər Şurası
tərəfindən tənzimlənir. ATƏT müxtəlif qərarların qəbulu zamanı konsensusa əsaslanır.
ATƏT-in sədri qurumun ümumi fəaliyyətinə nəzarət edir və onu həyata keçirir. Sədrlik
vəzifəsinə növbə ilə ildə bir dəfə üzv dövlətlərin xarici işlər nazirləri seçilir. Təşkilata
rəhbərlik edən əsas şəxs Nazirlər Şurasının üç il müddətinə seçdiyi Baş katibdir.
ATƏT-in fəaliyyətində Avropa ölkələrinin ictimai-siyasi həyatında demokratik
dəyərlərin və prinsiplərin üstünlüyünün təmin edilməsi, soyuq müharibədən sonrakı
dövrdə müstəqillik əldə etmiş ölkələrdə hüquqi dövlət və vətəndaş cəmiyyətinin
inkişafına nail olunması və s. məsələlər ön planda dayanır. ATƏT-in Demokratik
İnstitutlar və İnsan Hüquqları Bürosu, Kütləvi İnformasiya Vasitələri üzrə Nümayəndəliyi,
157
Təhlükəsizlik Sahəsində Əməkdaşlığa Dair Forum kimi təsisatları yuxarıda göstərilən
məsələlərin həlli ilə bilavasitə məşğul olur. Eyni zamanda, təşkilatın diqqət
mərkəzində dini, etnik münaqişələr və onların aradan qaldırılması yolları da mühüm yer
tutur. Bu cür məsələlər Nazirlər Şurasının dəstəyi ilə yaradılmış Münaqişələrin aradan
qaldırılması üzrə Mərkəzdə araşdırılır və üzv dövlətlər tərəfindən müvafiq tövsiyələr
verilir. Mərkəzdə Dağlıq Qarabağ, Abxaziya, Cənubi Osetiya, Dnestryanı və s.
münaqişələr də dəfələrlə müzakirə edilmiş və bununla bağlı bəyanatlar qəbul
edilmişdir.
Dağlıq Qarabağ münaqişəsinin aradan qaldırılması üçün ATƏT-in rəhbərliyi ilə
xüsusi Minsk qrupu yaradılmışdır. ATƏT-in Budapeşt sammiti BMT Təhlükəsizlik
Şurasının müvafiq qətnamələrini əsas götürüb, hərbi münaqişənin dayandırılması, sülh
əldə etdikdən sonra çoxmillətli sülhyaratma qüvvələrinin yaradılması və ərazidə
yerləşdirilməsi haqqında qərar qəbul etmişdir. Həmçinin bu qüvvələrin
formalaşdırılması, tərkibi və operativ fəaliyyəti üçün plan hazırlamaq qərara alınmışdır.
Hazırda ATƏT Mərkəzi, Cənubi və Şərqi Avropa, Qafqaz regionu və Mərkəzi Asiya
ölkələrində böyük fəaliyyət proqramları yerinə yetirir. Ötən dövr ərzində ATƏT-in bu
ölkələrin beynəlxalq, siyasi həyatında özünəməxsus yeri olmuşdur.
Regional çoxfunksiyalı təşkilatlar sırasında mühüm yer tutan qurumlardan biri
NATO hesab olunur. 1949-cu ilin aprelində ABŞ-da 12 dövlət tərəfindən yaradılan
Şimali Atlantika Müqaviləsi Təşkilatı ilk olaraq ABŞ, Kanada, Böyük Britaniya, Fransa,
Belçika, Niderland, Lüksemburq, İslandiya, Danimarka, Norveç, Portuqaliya və İtaliyanı,
sonralar isə Yunanıstan, Türkiyə, AFR, İspaniya kimi ölkələri birləşdirmişdir. Soyuq
müharibədən sonra NATO-ya keçmiş sosialist düşərgəsindən olan Polşa, Çexiya və
Macarıstan kimi dövlətlər də qoşuldular. Hazırda 26 dövlət bu təşkilatın üzvüdür.
Preambula və 14 maddədən ibarət olan Şimali Atlantika Müqaviləsində NATO-
nun məqsəd və vəzifələri öz əksini tapır. Təşkilatın ali siyasi orqanı Şimali Atlantika
Şurasıdır. Nizamnaməyə görə, hər iki ildən bir üzv dövlətlərin xarici işlər nazirləri
səviyyəsində Şuranın sessiyasının keçirilməsi nəzərdə tutulur. Bəzən sessiyanın işində
müdafiə nazirləri də iştirak edir. Şura beynəlxalq aləmdə baş verən hadisələri daim
diqqət mərkəzində saxlayır, ümumiyyətlə, təşkilatın fəaliyyət istiqamətlərini
müəyyənləşdirir.
Alyansın hərbi təşkilatına rəhbərliyi Birləşmiş Hərbi Komandanlıq həyata keçirir.
Komandanlıq hərbi münaqişələr zamanı kollektiv müdafiə məqsədi ilə üzv dövlətlərin
silahlı qüvvələrini səfərbərliyə alır və hərbi birləşmələr arasında koordinasiya yaradır.