70
Köklənər dünyanın qəmləri üstə,
Bir az bu dəniz də mənə bənzəyər.
Dövləti daşınar, varı talanar,
Sərvəti çapılar-mənə bənzəyər.
Bir gün bu sahilin qumları üstdə
Günbatan tərəfdə gülzarı qalan,
Hər dağın döşündə məzarı qalan,
Əli o dağlara uzalı qalan,
Köksü titrəməyən, nəbzi vurmayan,
Bir qoca tapılar-mənə bənzəyər...
***
2002
DƏNİZ MƏNDƏN KÜSÜBDÜR
Neçə gündür sahilinə gəlmirəm,
Dəniz məndən küsübdür-
Mas-mavi paltar geyən,
Mavi nəğmələr deyən
O qız məndən küsübdür.
Gəl qovuşaq deyirəm,
Gəl barışaq deyirəm.
Sən ey etibarlı qız,
Ay silikon dodaqlı,
Dekolte paltarlı qız.
***
2009
71
YAY GECƏLƏRİ
Elə ki istidən təngiyər ürək,
Gözüm sularında sərinlik gəzər.
Ləpələr yelpikdi, dalğalar örpək,
Yaxşı ki sən varsan Xəzər, ay Xəzər.
Şər qarışan kimi dəyişir aləm,
Sular ayın olur, ulduzun olur.
Sabaha bir qıza görüş vermişəm,
Bu yay gecələri nə uzun olur.
***
2013
KÖRPƏLƏR
Arzular, istəklər böyüdər bizi,
Gah xoşbəxt olarıq, gah qanıqara.
Başa düşməyəndə böyüklər bizi,
Ehtiyac duyarıq gül balalara.
Tumurcuq dodaqlar oxuyar, gülər,
Ən ağır gündə də həmdəm olarlar.
Yarımca söz ilə, təbəssüm ilə
Bütün dərdimizə məlhəm olarlar.
Sinəmiz-bir kiçik rəqs meydanı,
Oynayar balalar yorulanadək.
Bizə bəxş edərlər geniş cahanı,
Çıxar yadımızdan ağrıyan ürək.
72
Heyrətlə açılar xırdaca gözlər,
Xırdaca qədəmlər atılar-düşər.
Onlar çıxacağı yollar, rizlər,
Bizim sinəmizdən açılar düşər.
Bəli, ilim-ilim itər qəm, kədər,
Kiçik zarafata, sözə bənd olar.
Körpələr dil açar-
Südlü kəlmələr
Dönüb şəkər olar, dönüb qənd olar.
Soyuq divarları sevinc bürüyər,
Baldan şirin olar çay-çörəyimiz..
Hələ ümidlərdən tutub yeriyər
Yıxıla-yıxıla gələcəyimiz.
Təmiz qəlblərində nəğmələr yaşar,
Lalələr bəzəyər yanaqlarını.
Yaxşı ki evlərdə körpələr yaşar,
Yuyar böyüklərin qəm-qübarını.
***
73
TƏKİ SƏN AĞLAMA
Ulduzlar qoynuna yazdırım səni,
Çiçək dənizində üzdürüm səni,
Gözümün içində gəzdirim səni,
Təki sən ağlama, Fuadım mənim.
Bəlkə “Şəngülümə” dönüm yolunda,
Yüyürüm, yıxılım, sönüm yolunda.
Alışsın ürəyim sənin yolunda,
Təki sən ağlama, Fuadım mənim.
Qırx arşın quyudan baş qaldırım mən,
Çiynimdə bir “Qara qoç” qaldırım mən.
Qanlı kirpiyimlə daş qaldırım mən,
Təki sən ağlama, Fuadım mənim.
Məzar dəbilqəmi ruhumla dəlləm,
Min illik yolları bir günə gəlləm.
Yatıb küləklərin üstünə gəlləm,
Təki sən ağlama Fuadım mənim!..
***
74
GERÇƏK DÜNYA, YALAN DÜNYA
Gerçək dünya, yalan dünya,
“Bizi dərdə salan dünya”.
Nəvələrin gülüşüylə
Könlümüzü alan dünya.
Nə veribsə yarı verib,
Dərdi, intizarı verib.
Bizə dünyaları verib,
Əlimizdən alan dünya.
Çiçək kimi solub gedər,
Ürək kimi dolub gedər.
“Öl” deməknən ölüb gedər
“Ol” deməknən olan dünya.
***
2010
VAXTIM OLMAZ
Gözlərim gözəllik gəzər dünyada,
Dizlərim diz çökər daşda çeşməyə.
Mənim vaxtım olmaz gözəl dünyada
Pis şeylər haqqında fikirləşməyə.
Gəlin ürəyimdən bənövşə dərin,
Sinəm başdan-başa duyğudur, hissdir.
Bənövşə hisslərin, nərgiz hisslərin
Tanrının yanında xətri əzizdir.
***
2010
75
ƏLİNDƏ QALDIQ
Yoxuşdan adlayıb düşdük enişə,
Qorxunun, hədənin əlində qaldıq.
Məsləhət qanmayan, söz eşitməyən,
Hər gəda-güdənin əlində qaldıq.
Arxasız bəndəyə arxa çıxınca,
Qorxduq canımızdan qorxu çıxınca.
Ölən günümüzün qırxı çıxınca,
Gələnin- gedənin əlində qaldıq.
Uşaq anlamayan, qoca saymayan,
Varlıya, yoxsula məhəl qoymayan,
Bu boyda dünyanı yeyib doymayan,
Acın, acgödənin əlində qaldıq.
Dərdik ömrümüzün acı barını,
Adlaya bilmədik qəm hasarını.
Abırsız qocanın, xırsız qarının,
Ərköyün körpənin əlində qaldıq.
***
2011
Dostları ilə paylaş: |