41
Elçin ƏHMƏDOV
Dosent
Günel ƏHƏDOVA
Magistrant
KİTABXANALARIN HÜQUQİ TƏMİNATINDA
BEYNƏLXALQ ƏMƏKDAŞLIĞIN ROLU
Hüquqi təminat bütün sahələrdə zəruri ünsür hesab olunur. Hüquqi təminat
olmadan heç bir sahənin inkişafından danışmaq olmaz. Hər bir kitabxana
hüququn subyekti kimi müxtəlif vəzifələrə malik
olub öz fəaliyyətini qüvvədə
olan hüquqi aktlar əsasında həyata keçirmək imkanlarına malikdir. Bu
baxımdan kitabxana işində hüququn aliliyi başlıca rol oynayır.
Kitabxanaların hüquqi təminatında beynəlxalq təşkilatların rolu danılmazdır.
Onların qəbul etdiyi manifest və proqramlar hüquqi əhəmiyyətə malikdir və
kitabxanaların hüquqi təminatında mühüm rol oynayır. Bu cəhətdən beynəlxalq
əməkdaşlığın inkişafına xüsusi diqqət yetirilməlidir.
Biliklər cəmiyyətində informasiya mənbələrinin geniş və sürətli mübadiləsi
olmadan elmin, texnikanın, mədəniyyətin daha da tərəqqi etməsi, xalqlar və
dövlətlər arasındakı inamın inkişafı mümkün deyil.
Ona görə də beynəlxalq
informasiya əməkdaşlığı informasiya təminatının ümumdünya və lokal
beynəlxalq əlaqələr kompleksinin mühüm ünsürü olur. Bu mühüm işdə
müstəqillik yollarında irəliləyən Azərbaycan Respublikası da öz yerini
tutmalıdır.
Kitabxana işi sahəsində beynəlxalq əməkdaşlıq, əslində müxtəlif ölkələrin
müvafiq hökumətlərarası və qeyri-dövlət beynəlxalq təşkilatların iştirakı ilə
həyata keçirilir.
Kitabxana işi sahəsində ən mühüm təşkilatlardan biri YUNESKO-dur.
YUNESKO (United
Nations Educational, Scientific and Cultural Organization
– Təhsil, Elm, Mədəniyyət Məsələləri üzrə Birləşmiş Millətlər Təşkilatı) BMT-
nin 13 ixtisaslaşdırılmış idarəsindən biridir.
YUNESKO-nun başlıca məqsədi təhsil, elm və mədəniyyət sahəsində
beynəlxalq əlaqələrin inkişafına, mədəniyyətin və elmi-texniki informasiyanın
yayılmasına, milli mədəniyyətlərin müdafiəsinə və s. köməklik göstərmək,
YUNESKO üçün müəyyən
edilmiş qlobal kursda ədaləti, qanunçuluğu və insan
hüquqlarına hörməti təmin etmək naminə xalqların geniş əməkdaşlığının
inkişafı zəminində insanların şüurunda sülh ideyasını, ümumbəşəri dəyərləri
möhkəmləndirməkdir.
42
Hazırda 186 ölkə BMT-nin bu iri ixtisaslaşdırılmış təşkilatının üzvüdür. O
cümlədən, Azərbaycan Respublikası 1992-ci ilin iyunun 3-dən YUNESKO-nun
tam hüquqlu üzvüdür.
1947-ci ildən kitabxanalar üçün YUNESKO-nun bülleteni çıxır. Əvvəlcə, bu
bülleten ingilis, fransız dillərində, 1953-cü
ildən ispan, 1957-ci ildən rus və
1970-ci ildən isə ərəb dilində çıxır. Təşkilat kitabxana işi üzrə monoqrafik
seriyalar da nəşr edir.
1949-cu ildə YUNESKO kütləvi kitabxanalar haqqında manifest qəbul etdi.
Bu manifestdə müharibədən sonrakı dövr üçün kütləvi kitabxanaların vəzifələri
və fəaliyyət dairələri müəyyənləşdirilmişdir.
Beynəlxalq kitabxanaçılıq-biblioqrafiya təşkilatlarının qarşılıqlı əlaqələri
müharibədən sonrakı dövrün ən xarakterik əlamətləri olmuşdur. Belə ki, 1947-
ci ildə YUNESKO ilə İFLA arasında bir-birini tanımaları haqqında qarşılıqlı
razılaşma imzalanmışdır.
Dünyanın ən iri peşəkar birliyi olan İFLA qeyri-hökumət təşkilatı olaraq
yarandığı vaxtdan bütün növ kitabxana-informasiya xidməti səviyyəsinin
yüksəldilməsinə köməklik etməkdədir. Bu məqsədlə o geniş miqyaslı iş aparır,
hər il bir ölkənin paytaxtında özünün baş konfransını keçirir, xüsüsi jurnalını
dərc edir, iki ildə bir dəfə İFLA-nın məlumat-kitabxana təşkilatı İFLA
şurasının hesabatını dərc edir və s.
İFLA 8 şöbədən, 2 dəyirmi masadan və 35 bölmədən ibarətdir. İFLA,
bütövlükdə bir çox ölkələrdə kitabxana işinin yenidən qurulmasına və
inkişafına yönəldilmiş YUNESKO-nun çoxplanlı proqramları üzrə işlərin və
tapşırıqların həyata keçirilməsinə başlamış və işlər sonrakı illərdə də uğurla
davam etdirilmişdir.
Müharibədən sonrakı dövrdə ümumi kitabxanaların
vəzifələri, fəaliyyət
miqyası ümumi kitabxanalar haqqında YUNESKO-nun 1949-cu ildə qəbul
etdiyi ilk manifestdə müəyyən edilmişdir.
Ona görə də, dünyanın ən iri beynəlxalq peşəkar birliyi İFLA 1994-cü ildə
özünün baş konfransında (60-cı konfrans) Ümumi Kitabxanalar haqqında
manifesti tam yeni redaksiyada təsdiq etmiş və həmin ilin oktyabrında manifest
YUNESKO-nun şurasında təsdiq edilərək geniş ictimaiyyətə çatdırılmışdır.
Lakin ilk manifestin qəbulundan keçən 60 ildə dünya miqyasında
baş verən
köklü ictimai-siyasi dəyişikliklər, elmi-texniki tərəqqi, milli mədəniyyətlərin
inkişafı və yaxınlaşması cəmiyyətin sosial tərəqqisi və bu prosesdə
kitabxanaların mühüm rol oynaması və s. obyektiv
amillər bəşəriyyətin gələcək
inkişafında ümumi kitabxanaların yerinin və vəzifələrinin müasir tələblər
baxımından müəyyənləşdirilməsi məsələlərini ön plana çəkmişdir.
Manifestdə ümumi kitabxanalar belə xarakterizə olunur:
“Ümumi kitabxanalar xidmət etdiyi rayon üçün istifadəçilərə, bütün bilik və
informasiya mənbələrinə operativ çıxış təmin etməklə informasiya mərkəzi