51
deza integre e ki anmemtan, zot pa poz okenn problem prononsiasion, zot bizin
trete kouma bann mo antie an zotmem ( anba, anka, anplener, etc.).
6.6.4 Tretman bann mo kot servi adverb negasion « pa »
Problem ki poze avek adverb negasion « pa » li inpe parey, sirtou kan li rant dan
enn konbinezon ek enn lot item (pa + oule; pa + ena; pa + ankor) e kot toule de
debous lor enn form kontrakte. Si lor plan prononsiasion, sa form kontrakte la pa
soulev gro problem, kestion poze lor ki fason pou ekrir li.
Prinsip ki finn retenir par AKM dan renion ki finn ena Mardi 21 Desam 2010, se
desizion pou rekomann itilizasion form plin sa bann expresion-la sak fwa ki ekrir,
plito ki zot form kontrakte (ki fer parti liniver oral) pou fer desort ki bann zelev
konpran fonksionnman intern bann konstriksion-la avan ki zot ekrir li dan zot form
kontrakte.
Me si bizin ekrir bann form kontrakte, par exanp kan pe transkrir enn diskour oral,
li bon kone ki opsion pou swazir. Ena de opsion ki prezante isi: servi enn apostrof
ouswa non. Par exanp, pa + oule kapav, dan so form abreze, vinn pale ouswa
pa’le; pa + ena kapav vinn pena ouswa p’ena; pa + ankor kapav vinn pankor
ouswa p’ankor. Ki opsion pou swazir dan sakenn sa bann ka-la ?
Ena de kriter kot nou pe baz nou pou determinn nou swa: enn ladan li statistik, lot-
la li lozik. Sak fwa ki, dapre nou analiz, form abreze enn anplwa paret pli frekan ki
so version long dan itilizasion kouran bann Morisien, nou finn opte pou pa met
apostrof (ex.: pa + ena = pena; pa + ankor = pankor). Sak fwa ki enn form long
paret pli dominan ki so form abreze, dan itilizasion bann Morisien, nou finn opte
pou met enn apostrof (ex.: pa + finn = pa’nn; pa + oule = pa’le). Me kriter lozik,
li ena so linportans ousi. Pena ek pankor pena zot omonim dan Kreol Morisien.
Donk posibilite ki ena konfizion lor sa plan-la, li pa existe. Par kont, pann ek pale
deza existe antan ki bann mo otonom dan Kreol. Donk, kan nou servi apostrof pou
ekrir pa’nn ek pa’le, nou pe kontribie pou diminie risk konfizion. Mem prinsip
pou aplike pou bann lezot mo ki trouv dan mem sitiasion.
Me ankor enn fwa, prinsip ki rekomande isi, se servi form plin kan pe ekrir e non
form abreze, seki vedir ki pa ankor pou privilizie dan lekritir dan plas pankor, pa
ena olie pena, pa finn olie pa’nn, etc.
52
KONKLIZION
Nou pou konklir sa rapor-la an trwa mouvman. Dabor par enn rapel lor bann gran
lax ki finn gid nou dan so preparasion, so bann propozision ek so redaksion. Dan
enn deziem tan, nou pou donn detrwa indikasion lor so bann limit. Pou fini, nou
pou donn enn apersi lor travay ki ena ankor pou fer dan domenn standardizasion
lekritir Kreol Morisien.
•
Enn rapel lor bann gran lax ki finn gid sa rapor-la …
Sa rapor-la rezilta enn travay reflexion ki enn Komite Teknik finn fer lor bann
propozision grafik ki enn lot rapor, ki ena pou nom Grafi-larmoni, finn fer an
2004, lor fason pou ekrir Kreol Morisien. Komite Teknik la finn etablir enn bilan
kritik lor sitiasion lekritir an Kreol, si-z-an apre ki bann propozison Grafi-larmoni
finn met an pratik par plizier dimounn ek institision. Bilan kritik ki finn etablir
finn permet Komite Teknik: (1) konsolid laplipar bann propozision Grafi-larmoni;
(2) vinn de-lavan avek plizier nouvo propozision; (3) formil tou sa bann
propozision grafik la, dan form bann regleman ortografik pou Kreol Morisien.
Nou travay finn tourn otour de lax: (a) transpozision son-grafi ; (b) konvansion lor
enn seri item kouma: sistem ponktiasion, lortograf pou bann zour lasemenn ek
mwa dan lane, nom langaz, nom prop, toponim, itililizasion tredinion ek apostrof,
indikasion ler, kantite, sinbol pou bann size teknik, siantifik, etc.
•
Limit rapor-la…
Sa rapor-la konsern inikman bann regleman lor fason ekrir bann mo an Kreol
Morisien, apartir enn bann kriter ki Komite Teknik finn desid pou pran an
konsiderasion. Li pena okenn pretansion perfeksion, e li pa dir ki bann regleman-la
absoli ek definitif. An fonksion reaksion ki bann itilizater lang-la pou ena dan
bann mwa ek lane ki pe vini, e par rapor ek degre difikilite ki zot pou exprime,
kitfwa boukou ladan pou bizin modifie. Me nou ti bizin koumans kikpar, e pou
lemoman, se fason pli sinp, pli obzektif, e pli lozik ki nou finn trouve.
53
Rapor-la pena nonpli pretansion pou dir dimounn kouma bizin koze, ni ki varyete
kreol zot bizin swazir, dan bann sitiasion kot ena plizier varyete ki posib. Li pa dir
si li preferab dir sime ouswa semin, devan ouswa divan, ousi ouswa osi, etc. Li
zis dir kouma pou ekrir sa bann mo-la, enn fwa ki dimounn finn fer zot swa. Me
kouma li ete pou tou lang, avek letan, sak domenn ek sak kontext kot itiliz Kreol
Morisien dan enn fason partikilie, pou fini par devlop enn varyete ki prop pou li.
Avek letan, Kreol Morisien pou fini par devlop bann diferan stil ek diferan rezis ki
li pa neseserman ankor posede zordi: institisionel, teknik, administratif, relizie,
etc.
•
Seki pe atann nou pli divan...
Se par rapor ek sa bann devlopman ki pou vini la, ki Komite Teknik konsidere ki
bann regleman ki kontenir dan sa rapor-la, zot reprezant zis enn premie letap dan
prosesis standardizasion lekrititr pou Kreol Morisien. Pou bizin ena enn deziem
letap ki pou interes li ek normalizasion bann term teknik ki servi dan diferan
disiplinn ek dan diferan spesialite. Enn letap kot pou bizin travay lor bann konsep
ki pou servi dan bann size teknik kouma Matematik, Fiziks, Biolozi, etc., ouswa
dan bann diferan disiplinn (kouma spor, par exanp), ouswa ankor dan bann diferan
metie/profesion. Se pou sa rezon-la ki nou rekomande ki bann selil lor travay
lekritir kontinie res aktif dan AKM e ki zot pran responsabilite pou asim sa travay
terminolizik la.
•
Remersiman.....
Nou adres nou bann dernie mo tou dimounn ki finn donn koudme direkteman ou
indirekteman pou prezantasion sa rapor-la. Enn gran remersiman zot tou: bann
manb Komite Teknik pou koumanse, bann kolaborater, tou bann manb AKM, so
Prezidan ek bann responsab Minister Ledikasion pou konfians ki zot finn fer nou.
Nou donn tou nou lankourazman bann lezot komite AKM e nou swete ki proze
pou introdir Kreol Morisien dan lekol, konkretize dan bann meyer kondision dan
lintere bann zanfan morisien.
Dostları ilə paylaş: |