Microsoft Word Sirler Xezinesi doc

Buna qurdla Yusifin macәrası deyәrәm, 
Qurd Yusifi yeyibsә, mәn dә onu yeyәrәm. 
Aldada bilmәz mәni qurduğun hiylә, kәlәk, 
Sәnin kimi şikarı tazısız qoymaz fәlәk". 
Ovçu belә deyәndә hәr yan toza büründü, 
Toz tazının dalınca pәrdә kimi süründü. 
Ora-bura şütüdü o şikarın hәrisi, 
Şir dişiylә tülkünün parçalandı dәrisi. 
Dedi ki, pusqudayam, gәrәk qәsdә girәm mәn, 
Tülkü yaxşı bilir ki, şikar vaxtı şirәm mәn. 
İtmәyimdәn sәbrinin kasası doldu sәnin, 
Tülkünü parçaladan inamın oldu sәnin. 
Mütiliyim boynuma xalta salıb әzәldәn, 
Vәfam ixtiyarımı әldәn alıb әzәldәn. 
Kimin ki ixtiyarı sәdaqәtә bağlıdır, 
Taleyinin axırı sәadәtә bağlıdır. 
Mәslәk yolu ülviyyәt yoludur kainatın, 
Yüksәliş, tәmiz niyyәt yoludur kainatın. 
Şәrәfә yüksәlәrsәn hökmün, qәtiyyәtinlә, 
Daşın dönәr qızıla müqәddәs niyyәtinlә. 
Әzminlә, inamınla, dolanarsan hәr yanı, 
Atәşdәn su alarsan, qurudarsan dәryanı. 
Kimә ki, inamıyla bәxti yardır dünyada, 
Tanrının nemәtilә bәxtiyardır dünyada. 
Cibintәk, mığmığatәk qan sormağa can atma, 
Tamahın neştәriylә ürәyini qanatma. 
Qapına gәlәn nemәt qismәtindir, yeyәrsәn, 
Ruzi verәn kimsәyә min-min alqış deyәrsәn. 
Kimdә varsa comәrdlik, yollan onun üstә sәn. 
Ruzini, nemәtini yalnız ondan istә sәn. 
Comәrdin qapısını kim ki, kәsib cahanda, 
Ona dünya nemәti olub nәsib cahanda. 
Hәqiqәt carçıları bağlı qapı açandır, 
Bizim kimi qul deyil, tağlı qapı açandır. 
Xarabat guşәsindә keçir ibadәtlәri, 
Saf şәrabı bal kimi içmәkdir adәtlәri. 
Vәfasız ömrә görә dәrdә, qәmә batma sәn, 
Yüz ilin sәrvәtini yığmağa can atma sәn. 
Sanma başdan-binadan dәrd yolunu kәsibdi, 
Hәr qismәtin, nemәtin әzәl gündәn nәsibdi. 
Hәr canlıya nәsibdi qüdrәtin naz-nemәti, 
Qismәtinә sevinәn ucuz tutmaz nemәti. 
İnsan oğlu әllәşib darınıbdır hәmişә, 

---

Hamı öz qismәtindәn barınıbdır hәmişә. 
Mәslәk yolu seçәnlәr tamaha baş әyәrmi? 
Dövlәtin artsın deyә әllәşmәyә dәyәrmi? 
Çarpışmağı bacarsan havadarın tapılar. 
Üzünә açıq olar bütün bağlı qapılar. 
Nizaminin eşq odu sanma külә dönәndi, 
Qüdrәtin al Günәşi sönsә, o da sönәndi. 
 
 
YEDDİNCİ SÖHBӘT 
 
İNSANIN ÜLVİYYӘTİ 
 
Sәn, ey yerdә fәlәyi heyrәtdә qoyan insan, 
Yer dә, göy dә nazınla daim oynayan insan. 
Ülviyyәt alәmindәn xәbәrdarsan deyә sәn, 
Qüdrәtinlә şәrәfsәn, şansan yerә, göyә sәn. 
Qüdrәtin pәrvәrişi dayәn olub әzәldәn, 
Süd deyil, şәkәr yemәk qayәn olub әzәldәn, 
Hәdsiz nәcibliyinlә әşrәfisәn dünyanın, 
Әzәldәn xeyirxahlıq bütüsәn gen dünyanın. 
Ecazkardır qüdrәtin ucu iti qәlәmi, 
Yaradıb-sәnin kimi gözәl bütü qәlәmi, 
Can damarı bağlayıb ciyәrinin telinә, 
Can gövhәri parlayan kәmәr vurub belinә. 
Alәmdir incәliyin, dünya sәnin heyranın. 
Çatmaz arıq ahuya әsla kökü ceyranın. 
Yer üzündә vәhşilәr ramdır zoruna sәnin, 
Quş kimi yemlәyirsәn, düşüb toruna sәnin. 
Dövlәt quşu humaysan, qayәn sәadәt olsun. 
Az yemәk, az danışmaq, nәciblik adәt olsun. 
İşığı, qaranlığı, xeyri, şәri alәmin, 
Bil ki, әbәs deyildir, ey bәşәri alәmin! 
Uğursuz adlansa da әfsanәlәrdә bayquş, 
Xәzinә bülbülüdür viranәlәrdә bayquş 
Bu dünyanın hikmәti çatmaz sona әzәldәn, 
Hәr canlının şirindir canı ona әzәldәn. 
Üstünlükdә varlığın birincidir dünyada. 
Hәr canlı da sәnintәk bir incidir dünyada. 
Qan bahası istәyәn çoxdur deyә can alma, 
Can vermәyә qüdrәtin yoxdur deyә can alma. 
Dünyanın xeyri, şәri sәni güdür hәmişә, 

---

Әmәlini göstәrәn bir güzgüdür hәmişә. 
Başmağını cütlәsәn o, başına tac qoyar, 
Pәrdә yırtsan, ay kimi pәrdәyә möhtac qoyar. 
Sәhәrtәk pәrdә yırtma, - qanlar udan olasan. 
Gecә kimi hәr sirrә pәrdә tutan olasan. 
Arının pәrdәsidir qızılgülün әtәyi, 
Hәr sirrinin pәrdәsi - arıların pәtәyi. 
Dünya-üstә cumduğun bal daman şandı sәnә, 
Hörümçәyin toruna düşmәyin şandı sәnә? 
Әl vardır ki, әl qoyan yox әlinin üstünә, 
Pәrdә çәkәr sirrinin, әmәlinin üstünә 
Can atırsan açasan bu pәrdәnin sirrini, 
Yırtdığın pәrdә açar, bil ki sәnin sirrini. 
Pәrdәsiz bir könülü alqışlama heç zaman, 
Pәrdәsiz bir havanı sәn xoşlama heç zaman. 
Möcüzәni göstәrәn bu sehirli pәrdәdә 
Ağlını heyran qoyur hәr bir sirli pәrdә dә. 
Bu pәrdәdәn savayı, gәl, heç hava çalma sәn, 
Bu pәrdәdәn kәnarda xaric hava çalma sәn. 
Hәr xalından, gәl, şadlan bu әsrarlı pәrdәnin. 
Ahәngiylә qanadlan bu әsrarlı pәrdәnin. 
Ruhunun aynasından qoy pak olsun varlığın, 
Qırx günün zillәtindәn gülsün bәxtiyarlığın. 
İnsan oğlu qazanar zindanda da şan-şәrәf, 
Kölәlik zәncirini zillәtsiz atmaq olmaz. 
İztirabsız, әzabsız şәrfә çatmaq olmaz. 
Tәbiәt gümüşünü әridәrәk әzabla, 
Qızıla döndәrәsәn onu gәrәk әzabla, 
Әzaba qatlaşmaqla hәr niyyәtә çatarsan, 
Zәlillikdәn qurtarıb ülviyyәtә çatarsan. 
Hünәrin bәdöy atı ram olar inadına, 
Sәdaqәt sikkәsini vurdurarsan adına. 
Vәrdişinlә, ağlınla sәn gözüsәn dünyanın, 
Dәmirçisi, әttarı sәn özünsәn dünyanın: 
Üzünün dәrisini oddan qopan görәrsәn, 
Nәfәsinә әnbәrdәn әtir hopan görәrsәn. 
Varlığın yuvasından uçmalısan, uçmalı, 
Ülviyyәt sәmasını qucmalısan, qucmalı. 
Hәr ömrün öz köçü var, karvanı var әzәldәn, 
Sәadәt karvanının sarvanı var әzәldәn. 
Dünyaya baş әymәyәn tacidardır cahanda, 
Peyğәmbәrlik qüdrәti ona yardır cahanda. 
Tamahını öldür ki, möhlәt sәni gözlәyir, 

---

Gey başmağı, düş yola, cәnnәt sәni gözlәyir. 
Öz nәfsini mәlәdәn, lәlidәn oğul ol sәn, 
İblisә qul olunca, mәslәkinә qul ol sәn. 
Can at ki, sığınasan dәrgahına mәslәkin, 
Mәhşәr odu qıyarmı günahına mәslәkin?! 
Cәhәnnәmin atәşi yaxarmı suçsuz kәsi? 
Әmisini qorudu peyğәmbәrin nәfәsi. 
Tanrı salmaz nәzәrdәn pak ruhları, canları, 
Zireh kimi qoruyar qәlbi saf insanları. 
 
 
FİRİDUNLA CEYRANIN HEKAYӘTİ 
 
İki-üç dostu ilә sәhәr çağı Firidun, 
Seyrә çıxıb dolaşdı gen ovlağı Firidun. 
Ovlağa çatan kimi ov gәzdi gözü şahın, 
Vuracağı ceyrana vuruldu özü şahın. 
Ürkәk gözü, sağrısı qıyma deyir ovçuya, 
Şuxluğu qansızlığa uyma deyir ovçuya. 
Duyuq düşdü qәsdindәn ona tor quran kәsin, 
Nәzәrindәn yayındı-qәsdinә duran kәsin. 
İşvәsiylә, nazıyla dağ çәkdi ceyran şaha, 
Dostları mәftun görüb, qaldılar heyran şaha 
Köhlәni şığıdıqca hirsi sәmuma döndü, 
Ahunun qarnı kimi kamanı muma döndü. 
Süzәn ox izinә dә batammadı ceyranın, 
Uçan at tozuna da çatammadı ceyranın. 
Oxunu qınadı ki: can almağın nә oldu? 
Atını qınadı ki: yan almağın nә oldu? 
Әzәlki uçuşunuz, sürәtiniz yoxdumu? 
Ot yeyәn bir ahuca cürәtiniz yoxdumu? 
Ox dedi: "Yağın deyil bu bağrı qanlı sәnin. 
Gözlәrini oxşayır bu dilsiz canlı sәnin. 
Bir canın zirehi ki öz sayәndә toxuna, 
Mümkünmü o zirehә hәr süzәn ox toxuna? 
Zövq әhli hәr bir zaman hey zövq alsa yaxşıdır, 
Tәbilçinin tәblini özü çalsa yaxşıdır. 
Ülviyyәt timsalıtәk ucalmağa çalış sәn, 
Ülviyyәt göylәrindәn öc almağa çalış sәn. 
Ülvi eşqә can atar әsil insan cahanda, 
Bәşәr ülvi eşqiylә qazanıb şan cahanda. 
Uzaqgörәn kәslәri zövqü sәfa ucaldıb, 
Eşqinә sadiqliyi, әhdә vәfa ucaldıb. 

---