Microsoft Word Sirler Xezinesi doc

Şanı şirin balıyla niyә dolub arının? 
Çünki gözü uzağı görәn olub arının. 
Әllәşәr, çәkmәz әsla ruzi qәmi qarışqa, 
Sabahına bu gündәn yığar yemi qarışqa. 
Qafilliyә kor kimi etmәsә meyil insan, 
Arıdan, qarışqadan heç әskik deyil insan. 
Bu dünyadan kamını almalısan, almalı, 
Yayda qışın qeydinә qalmalısan, qalmalı. 
Sәndәn, mәndәn savayı hanı mәslәk yolçusu? 
Zәr-zivәrlә süslәmәz canı mәslәk yolçusu. 
Son gününü düşünәn görmәzsәn bir kimsәni. 
Bir nәfәsә bağlısan - sansa mәtin kim sәni. 
Göydәn uca yerdәdir dәrgahı insanların, 
Son gününü düşünmәk - pәnahı insanların. 
Hәr kәsdә ülviyyәtә istәk hanı dünyada? 
Aqibәti düşünәn biztәk hanı dünyada? 
Candan şirin sansaq da arzu-kamı cahanda, 
Axırını düşünsün gәrәk hamı cahanda. 
Biz könüllәr hakimi, sәrvәriyik alәmin, 
Dәfinәmiz yerdәdir, gövhәriyik alәmin. 
Necә gәldik - sirrinә yetmәyimiz var bizim, 
Gәlmәyimiz kimi dә getmәyimiz var bizim. 
Әzәl günün hökmüdür - ömür qısa yazılıb, 
Doqquz mәktәb әbcәdi alnımıza yazılıb. 
Belә dağın qubarı yalnız bizik әzәldәn. 
Belә bağın nübarı yalnız bizik әzәldәn. 
O gündәn ki, әlәnib torpağımız un kimi 
Ürәklәrә mәlhәmik әn gözәl mәcun kimi. 
Torpağına әl qatan sәndә nәlәr gizlәdib? 
Bu torpağın qәlbindә xәzinәlәr gizlәdib. 
Bu torpağı әzizlә, eylә ona şükür sәn, 
Xor baxma bu torpağa, әzәldәn naşükürsәn. 
Sığındığın mәkanın yolu, mülkü hardadır? 
Gәlәn - qalmaz, gedәcәk, yerin, bil ki, hardadır. 
Niyә mәskәn seçmisәn yer üzünü, söylә sәn, 
Niyә köçüb gedirsәn, bir düzünü söylә sәn?! 
İxtiyarı dünyanın yoxdu sәndә әzәllәr, 
Hәlә sakin deyildin viran kәndә әzәllәr, 
Dövlәt quşu humay da, bir mәlәk dә özündün, 
Havalanan, millәnәn bu fәlәkdә özündün. 
Ülvi eşqin qanadı kömәk oldu fәlәkdә, 
Әbәdiyyәt uçuşun demәk oldu fәlәkdә. 
Uçub, uçub yoruldun, qanad gәrdin yer üstә, 

---

Kölgә salıb cahana, qanad sәrdin yer üstә. 
Bir gün darlıq eylәsә nәfәsinә bu dünya, 
Uç günәşә, dönmәsin qәfәsinә bu dünya. 
Yalqızlıq çox çәtindir, bu dәrdi sezmәlisәn, 
Tәnhalığın әlindәn axır ki, bezmәlisәn. 
Ürәyini tәlaşdan qanatmaqdır niyyәtin, 
Öz әslinә dönmәyә can atmaqdır niyyәtin. 
Comәrdliyin dünyada zәlilliyin, xarlığın, 
Әzәli dә, sonu da varlığındır - varlığın. 
Övladının qatili bu anadan uzaqlaş, 
Eşit atan deyәni, ülviyyәtlә qucaqlaş. 
Mәrd atanı sal yada, әgәr ki, mәrd kişisәn, 
Çıxma onun yolundan, sәn ki, comәrd kişisәn. 
Bu dünyadan gözlәmә әbәs yerә sәadәt. 
Beşcә gündә nәsibmi heç bәşәrә sәadәt? 
Bircә anda asudә nәfәs varmı hәyatda? 
Sәadәtә bir güman, hәvәs varmı hәyatda? 
Qәmlәnәrәk bir düşün vәfasını dünyanın, 
Hansı könül duyubdur sәfasını dünyanın? 
"Şadlan" deyәn fәlәyin deyil nәsib şadlığı. 
Ondan şadlıq ummayaq, bizdәn kәsib şadlığı. 
Әzab-zillәt içindә inlәmәyә gәlmişik. 
Sanma şadlıq sәdası dinlәmәyә gәlmişik, 
Sevdasına demә ki, uymamışıq dünyanın. 
Puçluğunu әzәldәn duymamışıq dünyanın. 
Gәlәn gündәn qızarıb bәnzәmisәn meyә sәn. 
Getmәyini ilk gündәn anlamısan deyәsәn? 
Görәn neçin yarandıq belә ömrü gödәk biz? 
İxtiyarsız gәlәrәk ixtiyarsız gedәk biz. 
Fәnalığa, yoxluğa zәrrә yoxdur şübhәmiz, 
Heçә dönәn varlığa çoxdan çoxdur şübhәmiz. 
Tez uçma ki, bilinmәz heç gәlmәyin cahana, 
Tez getmә ki, bilinsin gec gәlmәyin cahana. 
Gethagedi gözlәrik, ömrümüz kәmdir bizim, 
Sikkәmizdәn düzәlәn yeni dirhәmdir bizim. 
Yoğurarlar yenidәn külә dönәn varlığı, 
Döndәrәrlәr әslinә gilә dönәn varlığı. 
Bu günündәn utanıb qızarmırsan belә sәn. 
Xәcalәtin sonradır, onu düşün hәlә sәn. 
Möhnәt yükü ağırdır, bundan halı qәlbimiz, 
Hәr möhnәtә qatlaşar bu yaralı qәlbimiz. 
Mәslәk eşqi çıxarar bu vadidәn bir yana, 
Çalış ki, mәslәkinlә çıxasan sәn bir yana. 

---

Yolun gedәr-gәlmәzdir, köhlәnini çap indi, 
Mәtanәtlә, inamla o dәrgahı tap indi. 
Әmәllәrin aynadır, varlığına bax onda. 
İzzәtinә, şanına, xarlığına bax onda. 
Günahına peşman ol, hәr cәzadan uzaq ol. 
Әmәlinlә, sәyinlә hәr qәzadan uzaq ol. 
 
 
TÖVBӘSİNİ SINDIRAN ZAHİDİN  
HEKAYӘTİ 
 
İbadәti, tövbәni tamam atdı birisi, 
Meyxanәlәr küncündә gedib yatdı, birisi. 
Meyә döndü göz yaşı şәrab içdiyi zaman: 
"Kimdәn aman istәyim, deyin kimdәdir aman? 
Hәvәs quşu qәlbimi çaldı tamah gücünә. 
Tәsbeh dәnәm dәn oldu, - aldı tamah gücünә, 
Talanmışam yolunda, mәnim olub Kәbә dә, 
Xarabata köçәli qәnim olub Kәbә dә, 
Taleyim üz döndәrib, günüm qara haçandır! 
Qәlәndәrәm, olmuşam bir avara haçandır! 
Hәya mәndәn yaşınır, dönüb zaya әmәlim, 
Xarabatı döndәrib xarabaya әmәlim. 
Gözdәn düşdüm, bu gündәn dünya mәnә dar olsun 
Bәdnamlığım әbәdi yer üzünә car olsun. 
Bәdbәxt olub qәzadan, sәadәti boşladım, 
Xarabatı xoşladım, ibadәti boşladım". 
Himmәtlilәr lütfünü ona әyan eylәdi, 
Pәrdәdәn cavabını belә bәyan eylәdi: 
"Bәdbәxtliyin baisi sanma hәdәr qәzanı, 
Ha qınasın sәnintәk min dәrbәdәr qәzanı. 
Günahından keçәnin dәrgahını ara sәn, 
Gör dәrdini demәyә sığınmısan hara sәn, 
Özün getsәn, utanıb qızarmazsan pul kimi, 
Yoxsa zorla gedәrsәn qolu bağlı, qul kimi. 
Yaşıl şәkәr qamışı olsun sәnә fәlәklәr, 
Bu torpağın otuyla dolandın, bәsdir, yetәr. 
Gedәnәcәn yuxuya qov gözündәn yuxunu, 
Yoxluğa sovqat üçün hazırla var-yoxunu. 
Qan çanağı görmәyәk birinin dә gözünü, 
Yuxu yumar ölütәk dirinin dә gözünü. 
Sәni dinin, mәslәkin şirin yuxuda gördü. 
Üz çevirib, gizlәnib, niqab altına girdi". 

---