Microsoft Word Sirler Xezinesi doc

Yeddi xәlifә gördüm bir kaşanә içindә. 
Yeddi macәra vardı bir әfsanә içindә. 
Könül mülkü göylәrdәn daha geniş, әngindi. 
Sakinlәri bәxtiyar, nemәti dә zәngindi. 
Günortanın sultanı baş tәrәfdә әylәşib. 
İlıq nәfәs sahibi közәrmәkdәn keylәşib. 
Qızıl atlı süvari qarşısında baş әyir, 
Yaqut qәbalı әsgәr ondan zәfәr dilәyir. 
Acıdil, cavan cәsus hәr an hazırdır ova. 
Qüssәli qara kölә qorxudan düşüb lova. 
Bәrәdә pusqu quran bir kәmәndatan da var, 
Gümüşdәn zirehlәnib misbәdәn pәhlәvanlar. 
Hamısı pәrvanәdi, nur saçan şamdı könül, 
Hamısı tәlәşdadı, lakin aramdı könül. 
Döndüm könül mülkünün әziz mehmanına mәn. 
Canımı töhfә verdim könül sultanına mәn. 
Könül qәrargahında bayraqdara qovuşdum. 
Hamıdan üz çevirdim, çünki yara qovuşdum. 
Könül dedi: " Heyrәtdәn itirmisәn huşunu, 
Bu yuvadan uçurma sәadәtin quşunu, 
Adicә ürәkmiyәm, can bürünә tüstümә? 
Bir parça әt deyilәm duz sәpilә üstümә. 
Ürәklәrin sәrvindәn kölgәm böyükdür, böyük! 
Ürәklәrin mülkündәn ölkәm böyükdür, böyük, 
Mәn Qarunun yığdığı xәznәyә tay deyilәm, 
Hәr kәsin sәrvәtiyәm, hәr kәsә pay deyilәm". 
Söz tәrlanım yolundu od saçan nәfәsindәn. 
Xәcalәtdәn çıxmadı öz qızıl qәfәsindәn. 
İsmәtimdәn qızardım atәşdәki pul kimi, 
Sözündәn sırğa taxdım qulağıma qul kimi. 
Tәzәlәdi dünyamı könül mülkünün şahı, 
Nizamiyә açıqdır fәlәklәrin dәrgahı. 
Paklıqdan, ülvilikdәn uzaq olsam, nәyәm mәn? 
Könlümün sәrvәrinә, müqәddәs bәndәyәm mәn. 
 
 
KÖNÜL PӘRVӘRİŞİ HAQQINDA TӘNHALIQ  
DÜŞÜNCӘLӘRİ 
 
Bәdöy atım yumşaldı, ramdı, deyil xam indi, 
Fәlәklәrin torundan qurtardı yaxam indi. 
Varlığımın kәlәfi dolaşıqdı yüz yerdәn, 
Dolaşığım açıldı açılmaz düyünlәrdәn. 

---

Açılmaz, dolaş-dolaş, düyün-düyün tellәri 
Kәsdi ömür sapımdan sәrvәrimin әllәri. 
Könül - pәnahımızdır, dәrgahımızdır biz 
Tanrımız olmasa da, öz şahımızdır bizim. 
Başımın darğasıdır iki cahanda mәnim. 
Qәmxarım olardımı yoxsa bir an da mәnim?! 
Sirdaş kimi sirrini açıb demәz heç zaman, 
Lakin öz şәfqәtini әsirgәmәz heç zaman. 
Gördü ki, tәrbiyәsiz, tәlimsiz bir naşıyam, 
Tәlim-әdәb verdi ki, İnsan adı daşıyam. 
Xoşdu hәr әzabıma qatlaşaraq inlәmәk, 
Bir zavallı bәndәnin söhbәtini dinlәmәk. 
Züleyxanın eşqindәn Misirtәk yandı alәm, 
Yusifin camalıyla nura boyandı alәm. 
Gecәnin gözlәrindә sönәn kimi nur, çıraq, 
Sәhәrin gözlәrindә şölә saçdı gur çıraq. 
Fәlәklәr yandıranda sәhәr çağı şamını 
Qızıl atlaz bәzәdi gündüzün әndamını. 
Ustadım günәş kimi nurlu çırağa döndü, 
Әlimdәn yapışaraq bir güllü bağa döndü. 
Qәm tikanı yığmışdım, onu atası oldum, 
Gül-çiçәyin içindә itib-batası oldum. 
Dodağımda tәbәssüm lalә kimi açıldı, 
Qönçә tәki açıldı, әtrim bağa saçıldı. 
Sinәsi dağlı lalә ürәyimi dağladı, 
Gül-çiçәk çәlәngini kәmәrimә bağladı. 
Yanaqlarım allıqda qanlı şәrab rәngidi, 
Vücudum gül-çiçәyin әtirli çәlәngidi. 
Tәlaşdan gülü-gülә, şaxı-şaxa qatanda. 
Nәşәsindәn çağlayan çeşmә gördüm hәr yanda. 
Eşqin qızıl bayrağı vüqarla dalğalandı, 
Vәfa әtri qoxuyan könül oda qalandı. 
Öz nәfәsi qasiddi şirindilli canana. 
İsanın nәfәsitәk can verdi cansız cana. 
Zәrrin tәxti-rәvanı köhlәnimdәn götürdü, 
Köhlәnin cilovunu tez sәbaya ötürdü. 
Dedi ki: "Qürrәlәnmә, enmәlisәn atından, 
Hәyatın әlimdәdir, bezmisәn hәyatından?! 
Heyrәtdәn su üzündә yelkәnsiz bir gәmiydim. 
Cәnnәt әtri qoxuyan nәfәsin hәmdәmiydim. 
Çalxalanan, çağlayan gur dalğaya qovuşdum, 
Susuzluqdan yanırdım, artıq çaya qovuşdum. 
Günәşin şölәsindәn çoxdu nuru çeşmәnin, 

---

Xızır da tәşnәsidir belә duru çeşmәnin.  
Nәrgiz kimi xumardı göy çәmәni buranın. 
Yatmağa can yeridi yasәmәni buranın. 
Әnginliyi, alәmi xatırladır göylәri, 
Behişt öz nәfәsilә süslәyibdir bu yeri. 
Gül qucub yasәmәni, - seyr edirәm bayaqdan, 
Gül toxunsa ayağa, tikan çıxar ayaqdan. 
Ovçu gözüm çәmәndә ceyran tülkü hәrisi 
Gül - ceyran göbәyidi, tikan - tülkü dәrisi. 
Tәbәssümlü güllәrin kefi, kökdü çәmәndә. 
Xәcalәtdәn tükünü tuti tökdü çәmәndә. 
Yemlik qәndmi qatıbdır - südü belә şirindi? 
Ceyranlar şirin süddәn sәrxoş gәzişir indi. 
Güllәrin gәrdәyindәn gәlir külәyin sәsi, 
Otlar quzu ceyrana olub gül mürәbbәsi.  
Xeyri mәnsәb fәrmanı tutubdu әllәrindә, 
Әnbәr saçan yelpikdi gülşәn gözәllәrindә. 
Nәrgiztәk sürmә çәkәr bu çәmәni süzәnlәr, 
İlanları qırıbdı zümrüd otlar, süsәnlәr. 
Ağıl-huş karvanını gül, yasәmәn soyubdu, 
Qumru, bülbül şairtәk ağlı heyran qoyubdu. 
İsadilli, birgünlük süsәn necә nәşәli, 
Musanın әli kimi olub sübhün mәşәli. 
Göyәrçin inildәyir sübh zamanı ahından, 
Öz rәnginә boyayıb göy sәmanı ahından. 
Eşqi sığmır söyüdün әnbәr varaqlarına, 
Sәba namә yazırdı çәmәndәki yarına. 
Baharın salamına baş әyir yasәmәnlәr. 
Tikana gül çәlәngi bağışlayır çәmәnlәr. 
Yasәmәn - türk gözәli çadır qurub düzәndә. 
Sürәyyanı andırır ay hüsnünü süzәndә. 
Lalәnin atәşgahı - lalәzardır burada. 
Hindli atәşpәrәstdir, yanıb çatıb murada. 
Lalәnin qara xalı, şux yasәmәn incisi,- 
Qara әrәb qarğası, parlaq Yәmәn incisi. 
Sular xәzә bәnzәyir, narın-narın lәpәlәr 
Ağ xәzi, göy sincabı sahillәrә sәpәlәr. 
Al-әlvan bayraqlarla yelkәn açıbdır gәmi. 
Ulduzlu asimandı çiçәklәrin alәmi. 
Fәlәyin şәfәqini şax budaqlar sökdülәr, 
Sayәnin qәdәminә altun pullar tökdülәr. 
Kölgәlәri lәlitdi günәşin hücumları, 
Lәpәlәr alqışladı rәqs elәyәn qumları. 

---