__________________Milli Kitabxana_________________
408
Göydən gedən alabaxta
Qanadı var taxta-taxta,
Mənim yarım ol otaxda,
Gəzir sallana-sallana.
Şair də aşığın gözü ilə gəlin üçün bəzədilmiş ağ keçə alaçığda nazlanaraq
gəzişən incə sənəmi görər kimi oldu. Aşıq isə onun xəyalında da sazını dilləndirib,
sözünə davam edir, ürəyi nəğməni xoş bir nəqarət kimi hey təkrarlayırdı:
Göydən gedən topa qazlar,
Laçın vurar, tükün tozlar,
Alaçıqdan baxan qızlar -
Gəlir sallana-sallana.
Bu elə təbii bir mənzərə idi ki... şairin məftun, vurğun gözləri alaçıqdan oğrun-
oğrun baxıb, qaçıb gizlənən toy yaraşığı, əlvan bəzəkli qızları, canlı-qanlı bir həyat
kimi gördü... və gördüyünə dodaqları səyridi, gülümsədi: "Nə gözəldir, ilahi...
camaat da yaxşıca başa düşür, həvəslə qulaq asırdı... Bəs Füzuli? ...Bəs mənim
təkilər?...Yox, elə eləməliyik ki, qəzəllərimizi də aşıq məclislərində oxunan qoşma
kimi, gəraylı kimi oxuyub anlasınlar... Təkcə savadlılar yox, hamı, bütün el!..
Görəsən, elə bir zaman olacaqmı ki, bizim yazdığımızı da hamı, bütün el-camaat
beləcə yaxşı başa düşəcək? Bax, mənim əsil məqsədim, amalım da budur... hamı
oxuya bilsin... hamı!.. Lap elə qaravəlli do, nabırrı da, şəhərli də, köç əhli də...
Məktəb... bizə indilik ən böyük və vacib məsələ məktəb açmaqdı... Elə olsun ki,
təkcə şəhərlərimizdə deyil, kəndlərimizdə də məktəb aça bilək. Elin dövlətlisi də,
kasıbı da öz balasını oxuda bilsin!".
Gözəl xəyallar onu alıb aparırdı...
Şair Qaravəllidən qayıdırdı. Atın cilovunu yəhərin qaşına keçirmiş, birayaq
addımlarla gəlib Rusdarçaya çatmışdı. At caya girən kimi dayandı. Dağlardakı buz
bulaqlardan süzülüb gələn göz yaşı kimi dumduru, səhər mehi kimi sərinlik və
təzəlik gətirən sudan içməyə başladı, O boynunu çayın alçaq səthinə uzadıb, qalın,
bozumtul və pırpız tüklü yumşaq dodaqları ilə zərif-zərif, ehmal-ehmal suyun üst
qatlarını sormağa başladı. Arabir yügənli ağzını yuxarı qaldırıb göyşədikcə şehə
bənzər parlaq damcılar dodaqlarından çaya süzülür, xırda ləpə
__________________Milli Kitabxana_________________
409
ciklər yaradıb axır, gedirdi. Şair təəssüfləndi: "Kaş çaya girməmiş yügəni
aleydim, yazıq heyvan rahat içeydi".
Çayın o tayında sürünü enişə endirən çoban aram-aram, irəliyə-irəliyə, həzin
bir səslə Şirvan şikəstəsi çağırır, sanki el sənətinə heyran olmuş şairin xəyallarına
cavab verərək oxuyurdu:
Şirvanın biyanı var,
Otu var, biyanı var.
Barı gəl, yuxuma gir,
Desinlər, hayanı var.
Şirvanın aşığı var,
Sazı var, aşığı var,
Belə qara günlərin,
Həlbət bir işığı var.
Şair gülümsədi, "yaxşı deyirsən, çoban qardaş, dünya belə durub-dayana
bilməz. Onun bir işıqlı günü olsun gərək. Sənə bu ümidi verən, səni xoşbəxt eləyib.
Yaxşı ki, qəlbində belə bir inam var. Yoxsa heç yaşamağa dəyməzdi. İnsan həmişə
yaxşı gün ümidi ilə yaşayır. Bununla da bəxtiyar olur", - deyə düşündü.
Şair düşündükcə az əvvəl sahildən uzaqlaşmış qadın kölgəsini də gözlərilə
izləyirdi. Qadın görünür səhərdən sahildə qazan açıb, paltar yuyub qurutmuş, indi
təmiz paltar boğçasını iri mis qazanın ağzına qoymuş, çadrasına sıx bürünmüş,
qazanı da başına götürüb gedirdi.
Əvvəl əldə şairin qəlbi titrədi, diksindi. Bir anlığa ona elə gəldi ki, qarşısındakı
qadın Sarabəyimdir; onun yolunu gözləyə-gözləyə neçə gündür ki, çayın qırağını
kəsdirib oturub. Seyyid bütün diqqətini gözlərinə toplayıb uzaqlaşmaqda olan
qadına zillədi. Yox, bu o deyildi... Sarabəyimin şux, rəqsan yerişi hara, bu hara?
Bunun yerişindən aydın bilinirdi ki, cavan deyil, yaşlı adamdır, bəlkə də hamilədir,
yanbasa yeriyirdi. Şairin ürəyi sıxıldı, səhərdən bəri qəlbində çalınan Koroğlu
cəngisi, Şirvan şikəstəsinin səsi xırp kəsildi. O atın su içib doyduğunu görüncə,
cilovu yəhərin qaşından çıxarıb yügəni çəkdi, ağzını qantarğa kəsən at cəld ayaq
götürdü, tərpəndi, bir göz qırpımında, ətrafa minlərlə zərrələr sıçradaraq çayı keçdi,
qarşı sahilə çıxdı, əl qalınlığında, tapdanmaqdan una çevrilmiş yumşaq torpaqlı
yolla yorğalamağa başladı, atlının ardınca toz dumanı qalxdı.
__________________Milli Kitabxana_________________
410
Qadın arxasında at hənirtisini eşidincə, başını geri çevirmədən yoldan çıxdı.
Atlı ötüncən yovşan və qaratikan bitmiş yol qırağı ilə yeriyəcəkdi, möhkəm
yaşınmışdı. Atlı ona çatanda addımlar yavaşıdı, qadının ürəyinə mübhəm bir qorxu
doldu: "Kimdir? Nəçidir? Fağır, hamilə qadından nə istəyə bilər?.." - düşünərək
rübənd altdan atlıya baxdı. "Ah... Allah sənə şükür, Ağadır ki..." – deyə fikirləşdi
və dərhal da ürəyinin çırpıntısı sakitləşdi.
Şair atı birayaq sürməyə başladı, qadınla bərabərləşincə əl uzadıb qazanqarışıq
boğçanı onun başından götürdü və yəhərin qaşında qucağına qoydu, nə baş
verdiyini anlamağa macal tapmamış qadına:
-Bacı, - dedi, - sən ehmal-ehmal gəl, mən qazanı, boğçanı, bax,şəhərin
girəcəyindəki o qoşa söyüdün altında yerə qoyacam, tələsmə,çatıb götürərsən.
Qadın cavab vermədi, yalnız minnətdarlıqla başını təsdiq və anlayış işarəsi
olaraq yellədi:
-Salamat ol.
Yenə cavab gəlmədi. Şirvanlı qadın naməhrəm kişiyə cavab verər? Ətini də
kəssən dinməyəcək. Yalnız ürəyində, onda da pıçıltı ilə deyirdi: "Allah sənə yar
olsun, Ağa, Allah Mir Cəfər ağanı sənə çox görməsin, ömrün uzun olsun! Gözə
görünməz pərvərdigar səni hardan mənə yetirdi? Gözümə durmuşdu yol, cəddüvə
qurban olum, Ağa!"
"MİZAN-TƏRƏZİ"
VƏ YAXUD DÖRD RAMAZAN
1305-ci il Ramazan ayının 4-ü idi. Cəmi dörd gün idi ki, orucluq başlamışdı.
Rəcəb ayından bu günəcən artıq üçaylığın iki ayını oruc tutmaqda olan möminlər,
indi üçüncü ay idi ki, gündüzdən axşamacan dillərinə bir tikə çörək, bir qurtum su,
bir qullab qəlyan vurmurdular. Onlar hər gün sübh namazından, demək olar ki,
iftara kimi vaxtlarının çoxunu məsciddə, axund otağında keçirirdilər. Kimisi qiraət
öyrənir, kimisi ramazan dualarını təkrarlayır, bir qismi də qəza, ayət, hacət
namazları qılmaqla vaxt keçirir, birtəhər özünü iftara çatdıranacan günü axşam
eləyirdi.
Ramazanın dördü... Altı gün idi ki, Seyid Əzim məktəbdarlıq fəaliyyətinə görə
döş nişanı ilə təltif edilmişdi. Düşmənlər Seyid Əzimi artıq
Dostları ilə paylaş: |