Puaro ara qapının sürgüsünü vurdu.
– Birdən bizim xanım Habbard qızına cinayətin təfsilatını yaza bilmək üçün buraya
girmək fikrinə düşər, – deyə izah etdi. Təkrar ətrafına göz gəzdirdi. – Məncə, artıq
burada görə biləcəyimiz bir iş qalmadı. İndi müsyö Bukun yanına gedək.
VIII fəsil
Deyzi Armstronqun oğurlanması
Onlar kupeyə daxil olanda müsyö Buk omletini yeyib tamamlayırdı.
– Vaqon-restoranda dərhal günorta yeməyinin verilməsini tapşırmışam, – deyə
bildirdi. – Ondan sonra ora boşaldılacaq və müsyö Puaro sərnişinləri rahat-rahat
dindirər. Bizim də yeməyimizi buraya vermələrini söylədim.
– Çox yaxşı fikirdir, – Puaro sevindi.
Ancaq heç biri hələ acmamışdı, buna görə də nahar etmək o qədər də zamanlarını
almadı. Yeməklərini tez-tələsik yedilər. Ancaq müsyö Buk bu saatlarda beyinlərini
məşğul edən məsələylə bağlı yalnız qəhvələrini içərkən söz açdı, yeni nələr
olduğunu soruşdu.
– Mərhumun kim olduğunu öyrəndim. Onun Amerikadan nəyə görə qaçmaq
məcburiyyətində qaldığını da bilirəm, – Puaro dedi.
– Kimmiş?
– Yadınızdadırmı, Armstronqların kiçik uşaqlarıyla bağlı qəzetlərdə bir vaxtlar çox
yazardılar. Bax həmin kiçik Deyzi Armstronqu öldürən adam Retçettdir, daha
doğrusu, Kassetti.
– İndi xatırladım. Qorxunc bir faciə idi! Ancaq lap incəliklərinə qədər
xatırlamıram.
– Polkovnik Armstronq ingilisdi, Viktoriya ordeni kavaleri idi, ancaq anası
amerikalıydı, məşhur uoll-stritli milyoner U.K.Van der Holtun qızıydı. Polkovnik
Armstronq zamanının ən adlı-sanlı faciə aktrisası Linda Ardenin qızıyla evliydi.
Amerikada yaşayırdılar. Bir uşaqları vardı, hamının pərəstiş etdiyi kiçik bir qız idi.
Uşaq üç yaşındaykən qaçırıldı. Geri vermək üçün ağlasığmaz ölçüdə çox pul
istədilər. Ondan sonra olanları danışaraq sizi darıxdırmaq istəmirəm. Ancaq uşağın
anasıyla atası iki yüz min dollar ödədilər və bunun ardınca, çox keçmədən
Deyzinin ölüsü tapıldı. Üstəlik, uşaq öləli ən aşağısı, iki həftə olmuşdu. Hamının
necə həyəcanlandığını təsvir etmək çətindir, əlbəttə. Ancaq fəlakət bununla
bitmədi. Xanım Armstronq hamilə idi, yeni bir uşağı dünyaya gətirmək ərəfəsində
idi. Sarsıntı keçirdiyinə görə uşağı ölü doğdu, xanım Armstronq özü də doğuş
zamanı həlak oldu. İztirabdan dəliyə dönən əri tapançayla özünü vurub intihar etdi.
– Ay Allah! – dedi Buk. – Nə dəhşətli hekayətdir! İndi xatırladım. Yanılmıramsa,
bir nəfər də ölmüşdü o arada.
– Bəli. Uşağın qulluqçusu zavallı bir fransız, ya da isveçrəli bir xidmətçi qız. Polis
onun bu hadisə haqqında bilgisi olduğundan əmin idi. Qızın ağlayıb-sızlayaraq heç
bir şeydən xəbəri olmadığını söyləməsinə inanmadılar. Sonunda zavallı qız böyük
bir ümidsizliyə qapılaraq özünü pəncərədən atdı. Daha sonra onun hadisəylə heç
bir əlaqəsi olmadığı ortaya çıxdı.
– Adam bunları düşünəndə belə dəhşətə gəlir! – Buk üşənmiş halda dedi.
– Altı ay sonra bu Kassetti deyilən adam tutuldu. Uşağı qaçıran dəstənin başçısı
imiş. Daha öncə də eyni şeyi etmişdilər. Polisin izlərini tapacağını anlar-anlamaz
qaçırdıqları adamı öldürüb cəsədi basdırır, cinayət ortaya çıxanadək də mümkün
olduğu qədər çoxlu pul qoparırdılar. Onu deyim ki, günahkarın Kassetti olduğuna
heç bir şübhə ola bilməz. Ancaq əldə etdiyi böyük sərvət sayəsində və bəzi
kimsələrin üstündə gizli hakimiyyəti olduğuna görə hansısa formal məsələlərdə
çək-çevirə salınaraq bəraət ala bildi. Buna baxmayaraq, bir yol tapıb qaçmasaydı,
xalq tərəfindən linç ediləcəkdi. İndi olanları daha yaxşı anlayıram. Kassetti adını
dəyişdirərək Amerikadan qaçıb. O gündən bəri də işi-gücü olmayan zəngin bir
adam sifətində dünyanı dolaşmaqda idi.
– İyrənc heyvan! – Bukun səsi əsəb və ikrahla doluydu. – Onu öldürdüklərinə görə
bir qram da heyifsilənmirəm. Əcəb olub.
– Mən də sizin kimi.
– Ancaq Şərq ekspressində olmamalıydı bu hadisə. Öldürmək üçün başqa yerlər
başına qəhət deyildi.
Puaro xəfifcə gülümsədi, müsyö Bukun öz hayında olduğunu başa düşürdü.
– İndi bizim üçün əsas məsələ Kassettini kimin öldürdüyünü tapmaqdır: bu cinayət
Kassettinin vaxtıyla quldurluq etdiyi rəqib bir dəstənin işidir? Yoxsa şəxsi bir
intiqamdır? – Yanıq kağızda oxuduğu o bir neçə kəlmə haqqında danışdı. – Əgər
səhv etmirəmsə, o məktubu qatil yandırıb. Nəyə görə? Çünki burada Armstronqun
adı çəkilirdi. Bu da həmin bu sirri tapmağımız üçün bizə bir ipucu verə bilərdi.
– Armstronq ailəsindən həyatda olan kimsə varmı?
– Təəssüf ki, bilmirəm. Ancaq deyəsən, qəzetlər Cənab Armstronqun kiçik
bacısının olduğu haqda yazmışdılar.
Puaro Buka doktor Konstantin ilə birlikdə gəldikləri nəticəni danışdı. Sınıq saat
söhbətini eşidən müsyö Buk əməlli-başlı canlandı!
– Demək, biz indi cinayətin dəqiq saatını bilirik artıq.
– Bəli. İşimizi asanlaşdıran şeylərdən biridir bu. – Səsindəki qəribəlik digər iki
adamın ona maraqla baxmalarına səbəb oldu.
– Retçettin birə iyirmi dəqiqə qalmış bələdçiylə danışdığını söyləmişdiniz
deyəsən? – dedi Buk.
Belçikalı bu gecə baş verənləri danışdı.
– Hər halda, bu, Kassettinin və ya Retçettin birə iyirmi dəqiqə qalmış həyatda
olduğunu sübut edir, – müsyö Buk dedi.
– Əgər lap dəqiq olmaq istəyiriksə, birə iyirmi üç dəqiqə qalmış.
– Rəsmi dillə desək, sıfır otuz yeddidə mister Retçett hələ sağ imiş. Hər halda,
əlimizdə bir fakt var.
Puaro cavab vermədi. Düşüncəli halda qarşı tərəfə baxırdı.
Kupenin qapısı döyüldü və qarson daxil oldu.
– Restoran boşdur, müsyö, – dedi.
– Gəlin, oraya keçək, – müsyö Buk ayağa qalxdı.
– Mən də sizinlə gələ bilərəmmi? – Konstantin soruşdu.
– Əlbəttə ki, əzizim doktor. Əgər müsyö Puaro etiraz etmirsə.
– Yox, canım, nə etirazım ola bilər?
“Apres vous, monsieur” ; “Mais non, apers vous”1 – deyərək qısa nəzakət
kəlmələrindən sonra onlar koridora çıxdılar.
II HISSƏ
ŞAHİDLƏRİN DİNDİRİLMƏSİ
I fəsil
Yataqlı vaqon bələdçisinin dindirilməsi
Vaqon-restoranda istintaq üçün hər şey hazırlanmışdı. Puaro ilə müsyö Buk
masanın bir tərəfində oturmuşdular. Doktor isə üzbəüz oturmuşdu. Masada
Puaronun önünə İstanbul – Kale vaqonunun planı qoyulmuşdu, yolçuların adları
qırmızı mürəkkəblə üzərinə yazılmışdı. Bir yanda pasportlar və biletlər vardı.
Onların yanında kağız, mürəkkəb, qələm və karandaş qoyulmuşdu.
– Hər şey qaydasındadır, – Puaro dedi. – Artıq yubanmadan istintaqa başlaya
bilərik. Hər kəsdən əvvəl, məncə, yataqlı vaqon bələdçisiylə danışsaq, daha doğru
Dostları ilə paylaş: |