90
altında nənəciyəzimi minərmiş. Qalan ölülərimizi özüyçün
işlədərmiş. Babacığazıma verdiyim yeməkləri çəkib alıb yeyərmiş.
Onun əlindən nə ölümüz, nə dirimiz qurtarar. Din eşqinə, çıxar
onu quyudan.
***
Beyrək öz quyusunda oturmuşdu. Zindançı quyuya nərdivan
salladı, Beyrəyi səslədi:
—Xandan buyuruq oldu ki, yer üzünə çıxasan.
Beyrəyi yer üzündəki zindana saldılar. Zindanın dar pəncərəsinə
dəmir barmaqlıqlar vurulmuşdu. Gecə düşəndə Beyrək bu dəmir
barmaqlar arasından ulduzlu göyə baxırdı. Ulduzlar içində
karvanqıran ulduzu tapırdı.
...Bir cüt ala göz də karvanqıran ulduza baxırdı. Yaş dolu ala
gözlər. Banıçiçəyin həsrət gözləri. Banıçiçək Beyrəkdən uzaqlarda,
uca-uca dağların, daşqın-daşqın suların arxasında, Qız Bənövşə
yaylağında, öz çadırında uzanıb ulduzlu səmada Beyrəyin ulduzunu
axtarırdı.
...Bayat obasının kənarında Bəybura da kor gözlərini ulduzlu
səmaya zilləmişdi.
...Ay işığında dolama yollarla bir karvan gedirdi. Tacirlərin
karvanı. Yavaş-yavaş dan sökülürdü, ağla-qara seçilirdi.
...Beyrək də gözlərini yummamışdı. Hava işıqlaşanda o, zindanın
dar pəncərəsindən müdhiş bir mənzərə gördü: uzaqda, hündür bir
bürcün başına insan kəlləsi sancılmışdı. Beyrək barmaqlıqlardan
yapışıb başını yuxarı uzatdı, boylandı, iri bir meydan gördü.
Meydanın dörd tərəfində bürclər ucalmışdı və onların çoxunun
başına insan kəllələri sancılmışdı.
Beyrək zindançını səslədi:
—Bura bax, o kəllələr, hansı biçarələrindir? Ora niyə sancılıblar?
Zindançı dedi:
—Qara Arslan Xaqanın dünyalar gözəli bir qızı var, adına sarı
donlu Selcan xatun deyərlər. Küllü-aləmin igidləri o qıza aşiqdir.
Qapısına elçi düşürlər. Xaqanın bir aslanı, bir qara buğası, bir də
erkək dəvəsi var — hər biri bir əjdahadır. Xaqan şərt qoyub, qızına
elçi düşənlər gərək bu əjdahalarla vuruşsun. Onları bassalar, Selcanı
alacaqlar, basmasalar, başları kəsiləcək. Hələ bu üç əcdahanı basan
olmayıb. O, otuz iki baş da ki, bürclərdən asılıb, haman o otuz iki
igidin başıdır, heç birisi aslanla dəvənin üzünü görməyib, elə birinci
91
döyüşdəcə həlak olublar.
Beyrək:
—Rəvadırmı ki, cavan igidlər bir qızdan ötrü buğanın
buynuzunda həlak olsunlar. Get, xaqana xəbər apar, de ki, məni
meydana buraxsın, mən əjdahaları öldürüm, yaxşı igidlərin canını
qurtarım.
Xaqana xəbər getdi. Təbillər, şeypurlar çalındı. Sağ bəylər, sol
bəylər, əyanlar, əmirlər meydana toplaşdı. Xüsusi köşkdə Xaqanın
qızı sarı donlu Selcan xatun əyləşmişdi. Yanında yeddi incə belli qız
vardı.
Beyrəyi meydana gətirdilər.
Xaqan:
—Bu qoçağı anadangəlmə soyundurun, — dedi. Beyrək soyundu,
bircə qızılı incə kətan bezini belinə sarıdı.
Qız koşkdən baxırdı. Beyrəyi görəndə öysəl olmuş dana kimi
ağzının suyu axdı, igidə aşiq oldu, yanındakı qızlara dedi:
—Allah atamın könlünü rəhmə gətirsin. Kəbin kəsib məni bu
igidə versin... Hayıf deyilmi bunun kimi igid heyvanların əlində
həlak ola?
Zəncirlə buxovlanmış buğanı çəkib meydana gətirdilər. Buğa
dizin-dizin çökdü, buynuzu ilə mərmər daşı yoğurdu, pendir kimi
diddi. Beyrək sağına baxdı, soluna baxdı, dedi:
—Sarı donlu Selcan xatun koşkdən baxar, kimə baxsa eşqilə oda
yaxar, sarı donlu qız eşqinə "hu"!
Beyrək "hu" deyib buğanın üstünə cumdu. Buğanın zəncirini
açdılar, meydana buraxdılar, buğa buynuzlarını almaz cida kimi
Beyrəyin üstünə sürdü.
Beyrək buğanın alnına bir elə yumruq vurdu ki, buğanı dalı üstünə
çökdürdü, alnına yumruğunu dayadı, sürüdü, meydanın başına çıxardı,
çox çarpışdılar, nə buğa yenər, nə Beyrək yenər. Buğanın ağzı
köpükləndi. Beyrək buğanın onündən çəkildi. Buğa buynuzu üstünə
yıxıldı, Beyrək onun quyruğundan tutub qaldırdı, üç kərə fırladıb yerə
saldı. Buğanın sümükləri xurd-xəşil oldu. Beyrək buğanı basdı,
boğazladı, bıçaq çıxarıb başını kəsdi, aparıb xaqanın önünə atdı.
Selcan xatun sevincək yerindən sıçradı. — Bu igidi gözüm gördü,
könlüm sevdi, — dedi.
Xaqan:
—Heyvanların sərvəri aslandır, — dedi, onunla da oyun göstər.
92
Aslanı gətirdilər, aslan elə qışqırdı ki, meydanda nə qədər at
vardısa, hamısı qan işədi.
Selcan xatun qızlara:
—Bu yazıq buğadan qurtuldu, aslandan necə qurtulacaq? — dedi:
Beyrək: — Sarı donlu qız eşqinə bir aslandan donərəmmi? —
dedi.
Aslan sürdü gəldi. Beyrək gözətçilərdən birinin yapıncısını qapıb
qoluna doladı, aslanın pəncəsinə verdi, sonra aslanın alnına bir
yumruq vurdu, aslan səndələdi.
Beyrək onun belini üzdü, leşini xaqanın önünə atdı.
Selcan xatun qızlara:
—Vallah bu igidi gözüm gördü, könlüm sevdi, — dedi.
Xaqan dedi:
—Heyvanların padşahı dəvədir. Onunla da oyun oyna. Dəvəni
gətirdilər. Beyrək fırladı dəvənin qoltuğuna girdi, fırladı çıxdı. İki
heyvanla savaşmışdı, taqətdən düşüb, sərxoş kimi olmuşdu. Bacara
bilmirdi. Altı cəllad Beyrəyin başının üstünü aldılar, yalın qılınclarını
havaya qaldırdılar.
Dəvə Beyrəyi sıxışdırıb Selcan xatunun köşkünün altına gətirdi.
Beyrək yıxıldı, aşağıdan yuxarıya baxanda gördü ki, Selcan xatun
ona işarət edir. Selcan əyilib, pıçıltıyla Beyrəyə:
—İgid, — dedi, — bilməzmisən ki, dəvə burnundan zəbun olar?
— Beyrək son gücünü toplayıb dəvənin burnundan yapışdı, dəvə
bağırıb, ayaq üstündə durammadı, yıxıldı. Beyrək basıb onu iki
yerdən boğazladı, dərisindən iki qayış çıxartdı, xaqanın önünə
apardı.
Xaqan:
—Qızı bu igidə verdim — dedi. Despinə xatun:
—Üç heyvan öldürdüyü üçün bircə qızcığazımızı alsınmı —
dedi?
Xaqan: — Bəli, — dedi. — Xaqan verdiyi sözün üstündən
qaçmaz, həm də bu igid bizə qohum olsa, onu tez yola gətirərik.
Sonra üzünü Beyrəyə tutdu:
—İgid, — dedi. — Selcan xatunu verdim sənə.
Beyrək:
—Mən sənin qızını istəmirəm, — dedi. —Mənim məqsədim
yaxşı igidlərin canını sənin əjdahalarından qurtarmaq idi. Mənim öz
elimizdə, göz açıb gördüyüm, konül verib sevdiyim adaxlım var.
Dostları ilə paylaş: |