81
Beyrək dedi:
—Belə şeydən ötrü pərt niyə olursunuz. Bu gün mən geyinirəm,
sabah sən gey. Yeddi gün, yeddi gecə toy olacaq, hər gün biriniz
geyinin, ondan sonra bir dərvişə verərik.
Yeddi gün, yeddi gecə toy oldu. İgidlər Qobustan qayalıqlarında
həkk olunmuş oküzləri, keçiləri, maralları nişan alıb ox atdılar, at
çapdılar, qılınc çaldılar, güləşdilər, yallı getdilər. Hər gün də
Beyrəyin qızılı qaftanı başqa bir cavanın əynində idi.
...Qız Bənəvşə yaylağında da toy dəsgahı idi. Banıçiçəyə toy
paltarı geyindirirdilər. Qısırca Yengə onun döşünə güzgü tutmuşdu,
anası başına qırmızı parçadan çalma bağlayırdı.
Oba kənarında bir xarabalıq vardı. Gecə ay işığında xarabalardan
qəribə kölgələr düşürdü. Burada sərgərdan itlər dolaşar, bayquşlar
ulaşardı. Xarabalığın bir divarına iki nəfər qısılmışdı. Onları
kolgələrindən tanımaq olardı: biri Alp Aruz, o biri qara niqablı adam
idi.
Alp Aruz:
—Deməli Qıpçaq Məlik hələ fürsət gözləyir, tələsmir.
Onda gərək ayrı tədbirə əl ataq. Bayburd hasarının xaqanıyla
sövdələşək, haydı, çap, Parasarın Bayburd hasarına xəbər apar.
Xaqana de ki, Dəli Qoçər bacısını onun qardaşı oğluna vəd etmişdi,
ilqarına dönük çıxdı. Qızı Boz atlı Beyrəyə verdi. Sabah gecə
gərdəyə girəcəklər. De ki, Beyrəyi aradan götürsələr, Qazanın beli
qırılar. Onun dayağı, dirəyi Beyrəkdir. Qara niqablı çapar atın belinə
qalxdı. O çaparkən heç bir nal səsi eşidilmirdi. Çapar qaranlığda
əridi, gözdən itdi.
***
...Banıçiçək çadırında uzanmışdı, çadırın açıq qapısından səmaya
— karvanqıran ulduza baxırdı, yastığının yanına yığdığı yovşan
topalarını iyləyirdi. Gözünə yuxu getmirdi.
...Beyrək də öz çadırında yovşan iyləyirdi, karvanqıran ulduza
baxırdı, düşünürdü. Yavaş-yavaş xumarlanırdı, gözlərini yumdu,
yuxuya getdi.
Beyrəyin gərdəyi bomboş, ucsuz-bucaqsız çölün ortasında idi.
Yeddi ağaç məsafədə nə bir işıq ucu görünürdü, nə bir hənirti
duyulurdu. Haradansa İsaq-Musaq quşunun səsi eşidilirdi. Beyrəyin
Boz ayğırı uzağda ilxının içində idi.
Boz ayğırın xasiyyəti vardı, haçan ki, yağı qorxusu duyulsa,
82
ayağını yerə döyərdi, tozu göyə çıxardı. İndi də dırnaqlarıyla torpağı
didim-didim diddi, fınxırdı, kişnədi, səsini eşidən olmadı.
Gecənin qaranlığında səssiz gələn səkkiz atlı kirimişcə atdan
düşdülər, ətrafı pusa-pusa gərdəyə yanaşdılar. Yeddisi əllərində qalın
bir örkən gərdəyə girdi, biri çöldə marıqda durdu. Gərdəkdən boğuq
səs eşidildi, az sonra ordan həmin o yeddi nəfər çıxdı. Onlar örkənlə
möhkəm sarıdıqları, ağzına parça tıxadıqları Beyrəyi sürükləyib
gərdəkdən çıxardılar, atın tərkinə atdılar. Atlılar gəldikləri kimi
səssizcə də çıxıb getdilər. Yeddisi getdi, biri qaldı. Qalan həmin o
qara niqablı adam, atlılar uzaqlaşandan sonra qılıncını sıyırdı, sonsuz
bir nifrət və hiddətlə gərdəyi parçalamağa başladı, təpikləri altında
çadırı yerlə yeksan etdi, çapıb uzaqlaşdı.
***
Qazanın divanına igidlər yığnaq olmuşdu. Dədə Qorqud da
buradaydı.
Qazan:
—Dədə, məsləhət sənindir, — dedi.
Dədə Qorqud:
—Yer altını ilan bilər, yer üstünü insan bilər, — dedi. —İgidləri
göndər, dörd iqlimi dolaşsınlar. Beyrəyin ölüsü, dirisi xəbərini
gətirsinlər. Qazan dedi:
—Əmən gündoğana getsin. Dondar günbatana getsin. Qarabudaq
Ala dağın güneyindən xəbər gətirsin, Yalıncıq Qazılıq dağının
quzeyindən xəbər gətirsin. Beyrəyin dirisi xəbərini gətirənə var-
dövlət verərəm, ölüsü xəbərini gətirənə — Banıçiçək qismət olsun.
İgidlər atlandılar, dörd yerə çapdılar. Qalanlar intizarda qaldı.
Qazan xəbər gözlədi, Banıçiçəyin gözləri yol çəkdi, Beyrəyin
atası, anası, bacıları dörd yol ayrıcında durdular.
Əmən qayıtdı, başını bulayıb:
—Beyrəyi gördüm deyən olmadı, — dedi.
Dondar qayıtdı, gözünü yerə dikib:
—İzi-sorağı yoxdur, — dedi.
Qarabudaq geri döndü:
—Beyrəkdən nam-nişan tapmadım, — dedi.
Yalıncıq gəlib çıxdı, atdan düşüb hönkür-hönkür ağladı.
—Aman Beyrək, can qardaş, — dedi, — muradına—maqsuduna
çatmayan yoldaşım.
Qazan: — Yalıncıq, nə xəbər gətirmisən? — dedi.
83
—Nə xəbər gətirəcəm, xan Qazan? Gətirməsəm gətirdiyimdən
yaxşıydı. Namərd düşmən Beyrəyi qaçırıb, yoldaca paralayıb,
cəsədini dağdan-daşdan yuvarladıb, qarğaya-quzğuna yem edib.
Qazan:
—Bunu nədən bildin? — dedi.
Yalıncıq ağlaya—ağlaya heybəsindən Beyrəyin al qana bulaşmış
qızılı qaftanını — həmin o Banıçiçəyin tikdiyi qaftanı çıxartdı.
—Beyrəyin qaftanıdır, — dedi. — Adaxlısı tikmişdi.
Qazan:
—Biz bunu bilmərik. Adaxlısına göstərin — dedi.
Qaftanı Banıçiçəyə gətirdilər, Banıçiçək al qan olmuş qaftanı
görən kimi, zar-zar ağladı:
—Vay şah igidim, vay şahbaz igidim, al duvağım ağası, alnım-
başım umudu, doyunca üzünə baxmadığım canım igid, hara getdin
məni yalqız qoyub, vay Beyrək!
Dartdı yaxasını yırtdı, payız alması kimi al yanaqlarını cırdı.
***
...Bayat obasına şivən girdi, Bəybura çalmasını açıb yerə çırpdı, qara
geyib göy sarındı, yaxasını yırtdı, "oğul, oğul" deyib hönkür-hönkür
ağladı. Ayna Mələk saçını yoldu, bacıları: — Vay qardaş, can qardaş!
Muradına, məqsuduna çatmayan yalqız qardaş, — deyib göynəyə-
göynəyə ağlaşdılar.
Beyrəyin bacıları ağ çıxarıb qara geydilər. Qazan xan ağ çıxarıb
qara geydi. Beyrəyin yar-yoldaşları, bütün Oğuz igidləri ağ çıxarıb
qara geydilər, ümidlərini üzdülər.
Beyrəyə yas tutdular. Beyrəyin anası, bacıları, Banıçiçək
Beyrəyin paltarlarını ortalığa töküb ağı dedilər:
—Oğul vay, qardaş vay, Beyrək vay! Ay kimi doğdun, gün kimi
batdın. İtik qardaş, itik bala vay!..
Beyrəyin boz ayğırının quyruğunu kəsdilər, belinə Beyrəyin
paltarını, qanlı qaftanını qoydular, üstünə qara ortük çəkdilər, atı qara
bəzədilər. Beyrəyin atası, anası, bacıları, Banıçiçək atın qabağına
düşüb obanı, eli gəzdilər, yerlə-yeksan olmuş gərdəyin yanına
gəldilər.
Ayna Mələk dedi: — Gərdəyi goru olan balam, tanrı sənə bir
məzarı da çox gördü.
Birdən Boz ayğır fınxırıb üstündəki pal-paltarı yerə çırpdı,
yerindən qopub harasa çapdı. Dalınca düşmədilər. At çapıb-çapıb
Dostları ilə paylaş: |