edən dəhşətli qanunları sən yaratmısan və o qanunlar həmin istək və arzuları
günah və cinayət kimi sayır.
Kimsə deyib ki, dünyada ən böyük hadisələr insanın
beynində baş verir. Mən də deyirəm ki, dünyanın ən böyük günahları beyində,
yalnız insan beynində doğulur. Siz də, mister Qrey, özünüz gəncliyinizdə,
yeniyetməlik çağlarınızda, öz ehtiraslarınızdan, istək və arzularınızdan
qorxmusunuz; düşüncələriniz, ağlınıza gələn fikirləriniz sizi dəhşətə gətirib; siz
bəzən elə istəklərlə yaşamısınız, elə yuxular görmüsünüz ki, onları xatırlayanda
utandığınızdan qızarırsınız...
– Bircə dəqiqə, bircə dəqiqə! – Dorian Qrey donquldandı, – dayanın! Siz məni
həyəcanlandırırsınız. Mən bilmirəm indi sizə nə cavab verim! Sizinlə mübahisə də
eləmək olar, mülahizələrinizə cavab
da vermək olar; amma bu dəqiqə mən buna
hazır deyiləm. Danışmayın! Qoyun bir qədər fikirləşim. Ya da, nə isə... yaxşısı
budur, bu barədə düşünməyim!
O, təxminən, on dəqiqə hərəkətsiz durdu; ağzı açıq, gözləri heyrətdən bərələ
qalmışdı. Dorian dumanlı şəkildə hiss edirdi ki, onun içində hansısa yeni duyğular
və fikirlər oyanır. Ona elə gəlirdi ki,
bu duyğular çöldən yox, məhz onun içinin
dərinliyindən baş qaldırıb. Bazilin dostunun dedikləri, həm də təsadüfən, elə-belə
söylədikləri sözlər, paradokslarla dolu sözlər, onun qəlbinin “sarı simlərinə”
toxundu və bu vaxta qədər onlara beləcə toxunan olmamışdı; və indi o simlər
titrəyir, coşqun təkanlarla yerindən oynayırdı.
İndiyə kimi onu yalnız musiqi riqqətə gətirmişdi; bəli,
musiqi onun qəlbində
dəfələrlə təlatümlər oyatmışdı və bu təlatümlər qarışıq və qayğısız həyəcanlarla
müşayiət olunurdu. Lakin bu musiqi aydın deyildi, orada yeni dünyanın nəfəsi
duyulmurdu, əksinə, qəlbdə xaos yaradırdı. Burada deyilən sözlər isə! Ah! Necə
sadə və... dəhşətli sözlərdir! Onlardan qaça bilməzsən! Bu sözlər necə aydın, necə
rəvan, necə çevik və amansız idi! Heç kəs onlardan canını qurtara bilməz! Bu
sözlərdə şeytani bir ovsun var! Onlar insanın qeyri-müəyyən istəklərinə gözə
çarpacaq, hiss ediləcək bir forma verir; onların öz musiqisi var, lütnya1 və
violanın şirin səsləri var! Yalnız sözlər! Deyin görüm həyatda sözdən sanballı və
real qüvvə olan nəsə varmı? Yox! O, Dorian, hələ yeniyetməlik çağlarında çox
şeyləri başa düşmürdü! İndi isə anlayır. Həyat birdən-birə onun üçün rəngarəng
boyalarla parladı. Ona elə gəlirdi ki, od-alovun içiylə addımlayır. Necə olub ki, bu
vaxta qədər bunu hiss etməyib?
Lord Henri onu
incə təbəssümlə izləyirdi; hansı məqamda, nə vaxt susmaq lazım
olduğunu yaxşı bilirdi. Dorian Qrey onu daha çox maraqlandırmağa başladı;
Henri sözlərinin gənc oğlana necə təsir etməsi təəssüratından özü də heyrətə gəldi.
On altı yaşı olanda oxuduğu bir kitab yadına düşdü; həmin kitab onun gözlərini
açmışdı, əvvəllər bilmədiyi şeyləri ona öyrətmişdi. Ola bilsin ki, Dorian da eyni
anları yaşayır! Necə oldu ki, onun elə-belə, qarasına havaya atdığı ox hədəfə
dəydi? Ah! Bu oğlan necə də sevimlidir!
Holvardın başı şəklə qarışmışdı; o, həmişəki kimi, parlaq və füsunkar boyalardan
istifadə edir, sənətdə parlaq istedadın əlaməti sayılan
möcüzəli və təbii boya
elementlərindən incəlik və ustalıqla istifadə edirdi. Araya çökən sükutu hiss
etmirdi.
– Bazil, mən belə durmaqdan yoruldum, – Dorian Qrey birdən sükutu pozdu. –
Havaya çıxmaq istəyirəm, bura boğanaqdır, ürəyim sıxılır...
– Bağışlayın, dostum, mən şəkil çəkəndə hər şeyi unuduram. Bu gün siz yaxşı
durdunuz, tərpənmədiniz. Mən də istədiyim cizgiləri götürdüm. Siz heç vaxt belə
yaxşı durmamışdınız. Nə gözəl tapıntı – yarıaçıq dodaqlar, gözlərdə parlaqlıq...
Bilmirəm Harri nədən naqqallıq eləyirdi,
amma deyim ki, sizin üz cizgilərinizin
dəyişilməsinə o səbəb oldu. Heyrətedici ifadələr vardı sifətinizdə! Görünür, sizə
komplimentlər yağdırırmış, hə? Siz onun heç bir sözünə inanmayın.
– Yox, o, mənə ayrı şeylər söyləyirdi. Bəlkə, buna görə də mən onun heç bir
sözünə inanmıram.
– Amma qəlbinizdə inandınız, – lord Henri dalğın-dalğın ona baxdı. – Elə mən
də bağçaya çıxmaq istəyirəm. Studiya çox istidir. Bazil, de, bizə sərin bir şey
versinlər içməyə... meyvə şirəsi olsa, pis olmaz...
– Əlbəttə, əlbəttə... Harri, zəngi bas, qoy Parker gəlsin, mən deyərəm bir şey
gətirər... Bir azdan mən də sizə qoşularam, qoy fonu qurtarım... Amma Dorianı
çox yubatma. Bu gün nəsə işləmək istəyirəm... Bu portret mənim şedevr əsərim
olacaq. Hətta bu formada da artıq o, heyrət doğurur...
Lord Henri bağçaya çıxdı
və gördü ki, Dorian Qrey başını yasəmən kolları arasına
soxub, üzünü gül topalarının sərin qoxusu içində gizlədib; sanki, cavan oğlan
yasəmən güllərinin ətrini sərin, qırmızı şərab kimi içinə çəkirdi. Henri Doriana
yaxınlaşdı, əlini onun çiyninə qoydu. Astaca dedi:
– Əsl işi siz görürsünüz, belə yaxşıdır... Adamın qəlbini belə şeylər sakitləşdirir;
qəlbi yalnız güllərdən aldığın duyğular sağalda bilir.
Dorian diksindi və geri çəkildi. O, papaqsız idi və yarpaqlar onun qıvrım, sarışın
saçlarına qarışıb onları oxşayırdı. Gözləri yuxudan qəfil oyanan adamın gözləri
kimi
qorxu içində idi; zərif burun pərələri gərginlik içində qalxıb-enir, çəhrayı
dodaqları hansısa sirli həyəcanla titrəyirdi.
– Hə, bax belə, mister Qrey, – lord Henri davam etdi, – həyatın belə bir böyük
sirrini bilmək lazımdır – öz qəlbinizə duyğularla şəfa verin, duyğularınız isə qoy
qəlbiniz vasitəsilə şəfa tapsın. Siz füsunkar bir varlıqsınız. Siz düşündüyünüzdən
çox, bilmək istədiklərinizdən az bilirsiniz.
Dorian Qrey tutuldu və baxışlarını yerə dikdi. Belə bir hündürboy, yaraşıqlı cavan
adamın onun yanında durması xoşuna gəlmişdi. Onun
romantik, zeytun rəngli
gözləri və yorğunluq ifadə edən səsi Dorianı maraqlandırdı. Onun yumşaq və
həlim səsində nəsə vardı və bu, ovsuna bənzəyirdi. Onun soyuq, ağ, çiçək kimi
zərif əllərində qəribə və gizli bir cazibə vardı. O danışanda əlləri də, sanki, musiqi