37
NAXÇIVAN DÖVLƏT UNİVERSİTETİ.
ELMİ ƏSƏRLƏR, 2016, № 5(79)
NAKHCHIVAN STATE UNIVERSITY.
SCIENTIFIC WORKS, 2016, № 5 (79)
НАХЧЫВАНСКИЙ ГОСУДАРСТВЕННЫЙ УНИВЕРСИТЕТ.
НАУЧНЫЕ ТРУДЫ, 2016, № 5 (79)
İSMAYIL ZEYNALOV
Naxçıvan Dövlət Universiteti
UOT: 94 (479.242)
XIX-ƏSRİN SONU XX-ƏSRİN BİRİNCİ YARISINDA AZƏRBAYCANIN NAXÇIVAN
BÖLGƏSİNDƏ ƏKİNÇİLİK TƏSƏRRÜFATI (TAXILÇILIQ)
Açar sözlər: tarixi etnoqrafiya, kənd təsərrüfatı, əkinçilik, taxılçılıq, “Qafqaz” qəzeti, aqrar
islahat, əkinçilik mədəniyyəti
Key words: historical ethnography, agryculture, plantation, wheet growing, “Qafqaz”
newspaper, agrarian reform, culture of plantation
Ключевые слова: историческая етнография, сельское хозяйство, земледелие,
зерноводство, газета «Кавказ», аграрная реформа, земледельческая культура
Azərbaycanın ayrılmaz tərkib hissəsi olan Naxçıvan bölgəsinin tarixi etnoqrafiyasının ayrı-
ayrı sahələrinin öyrənilməsi ilə yanaşı onun XIX-əsrin sonu XX-əsrin birinci yarısında əkinçilik
təsərrüfatı ilə bağlı taxılçılıq sahəsinin də etnoqrafik baxımdan araşdırılıb tədqiq olunmasını təqdirə
layiq hesab etmək olar. Çünki Azərbaycan xalqının tarixində özünəməxsus mövqeyi olan hər bir
bölgənin istər inzibati-ərazi, istər əhalinin məşğuliyyəti, istərsə də təsərrüfat həyatını öyrənmək və
üzə çıxarmaq vacib məsələlərdən biri sayılır. Həm də Azərbaycan etnoqrafiyasındakı bölgələr üzrə
çatışmayan məlumatlar əldə edilmiş olur.
Məlumdur ki, Naxçıvan Azərbaycanın ayrıca bir tarixi etnoqrafik vilayətidir. Bölgənin ərazisi
əsasən düzənlik, dağətəyi və dağlıq sahələrə ayrılır. Bu vilayətin Ermənistanla sərhəddə olan
nöqtələri Qapıçıq dağı (hündürlüyü 3904 metr) və Küküdağ (hündürlüyü 3120 metr) zirvələridir.
Zəngəzur və Dərələyəz dağ silsiləsinin qovşağında yerləşən Biçənək aşırımı (Batabat ərazisi) dəniz
səviyyəsindən 2346 metr hündürlükdədir. Bölgənin çayları Arpaçay, Əlincəçay, Naxçıvançay,
Ordubadçay, Gilançay və başqaları öz başlanğıcını Qafqaz dağlarının Zəngəzur və Dərələyəz
silsiləsindən götürür və Araz çayına tökülürlər.
Qeyd etmək lazımdır ki, XIX-əsin əvvəllərində (1828-ci il Türkmənçay sülh müqaviləsi ilə)
Azərbaycan Çar Rusiyasının tərkibinə birləşdirildikdən sonra Azərbaycanın tarixi etnoqrafiyasının
yazılması və öyrənilməsinə biganə yanaşılmışdır. Məhz bu baxımdan da deyə bilərik ki, istər XIX-
əsrdə, istərsə də sonrakı illərdə Azərbaycanın tarixi etnoqrafiayası haqqında həcm etibarı ilə böyük
olmayan məcmuələri, qəzet materiallarını nəzərə almasaq elə bir sanballı əsər yazılmamışdır. Eyni
zamanda nəşr olunmuş məqalələr müəyyən bir mövzunu əhatə etməyib, müxtəlif sahələri özündə
əks etdirən,
o cümlədən tarixi,
iqtisadi, maliyyə, hərbi xarakterli məlumatlar olmuşdur.
Ancaq bütün bunlara baxmayaraq XIX-əsrin sonunda Azərbaycan etnoqrafiyasının
inkişafında, onun tədqiq olunmasında ciddi dönüş yaranmış və Azərbaycanın ayrılmaz tərkib
hissəsi
olan Naxçıvan bölgəsində də bu sahədə mühüm addımlar atılmışdır.
Qeyd etmək lazımdır ki, Azərbaycan etnoqrafiyasının bəzi məsələlərinin araşdırılmasında, o
cümlədən onun Naxçıvan bölgəsində etnoqrafik məsələlərə dair elmi-tədqiqat işlərinin
aparılmasında Xristian Xristianoviç Stevanın (1781-1861), İvan İvanoviç Şopenin (1798-1847) və
başqalarının əsərlərindəki məlumatların xüsusi xidmətləri olmuşdur. Bununla yanaşı Azərbaycan
etnoqrafiyasının inkişafında 1846-cı ildə Tiflisdə dərc olunan “Qafqaz” qəzetinin də böyük rolu
olmuşdur. Eyni zamanda adlarını çəkdiyimiz etnoqrafların və “Qafqaz” qəzetinin köməyi ilə
Azərbaycanın tərkib hissəsi olan Naxçıvanın XIX-əsrin sonu XX-əsrin birinci yarısında bölgə
əhalisinin təsərrüfat həyatını əks etdirən dəyərli məlumatlara da rast gəlmiş oluruq. Ona görə də bu
etnoqrafların və mətbuat səhifələrinin məlumatlarına, həmçinin 2014-2015-ci illərdə Naxçıvan
bölgəsində apardığımız şəxsi etnoqrafik tədqiqatlarımıza söykənərək, Naxçıvan əhalisinin maddi-