Ömər Xəyyam
Rübailər
2
TƏRTİBÇİDƏN
İranın XI əsrdə yaşamış görkəmli filosof şairi Ömər Xəyyam
Azərbaycanın oxucuları arasında geniş şöhrət tapmış, rübailəri Nizami
dövründən bu günə qədər xalqımız tərəfindən sevilə – sevilə oxunmuş və
əzbərlənmişdir.
Təkcə XX əsrdə şairin lirik – fəlsəfi rübailəri Mikayıl Müşfiq, Mir
Mehdi Seyidzadə, Əkrəm Cəfər kimi nüfuzlu qələm ustaları tərəfindən
doğma dilimizə tərcümə edilmişdir.
Mikayıl Müşfiq keçən əsrin 30-cu illərində Xəyyamın rübailərinin
bir qismini ana dilimizə çevirmiş, görkəmli alim və əruzşünas Əkrəm Cəfər
isə şairin bütün rübailərinin öz vəznini və qafiyə sistemini saxlamaqla
tərcümə edərək ayrıca kitab haqqında nəşr etdirmişdir.
İndi Ömər Xəyyamın oxuculara təqdim etdiyimiz «Rübailər» kitabı
görkəmli şairimiz Mir Mehdi Seyidzadənin yaradıcılıq axtarışlarının
məhsuludur.
Şair Ömər Xəyyamın rübailərindən etdiyi tərcüməni iki dəfə –
1955-ci ildə və 1969-cu ildə ayrıca kitab şəklində çap etdirmişdir. Hər iki
kəşfi müqayisə edərkən aydın olur ki, şair Ömər Xəyyamın rübailərinin
tərcüməsinə çox ciddi yanaşmış, birinci nəşrdə nəzərə çarpan nöqsanları
düzəltmiş və o qədər də poetik olmayan misra və ifadələri yenidən işləyib
təkmilləşdirmişdir. Məsələn, birinci nəşrdə (33-cü rübai):
Saqi,
xoş ətrli qırmızı mey ver,
Boş danışıqlara qoyma qalsın yer
Zaman torpağımızı kuzə etməmiş
Mey
içim,
edim
mən çəmənzarı seyr! – şəklində
verilmiş həmin rübai ikinci nəşrdə aşağıdakı formada işlənib,
təkmilləşdirilmiş, gözəlləşdirilmişdir:
Gül rəngli şərab ver bizə, ey saqi!
Uymayaq söhbətə, sözə, ey saqi.
Bir kuzə mey gətir, torpağımızdan
Dövran
düzəltməmiş kuzə, ey saqi.
Belə misalların sayını artırmaq da olar.
Bunu
da
oxucularımızın nəzərinə çatdırmağı lazım bilirəm ki, Ömər
Xəyyam rübailərinin 1-ci nəşrinə görkəmli alimimiz, filologiya elmləri
namizədi mərhum Məmmədağa Sultanov şairin dövrü həyatı və rübailərinin
fəlsəfi mahiyyətini geniş şəkildə şərh edən dəyərli bir müqəddimə yazmışdı.
3
Lakin bizə məlum olmayan səbəblərdən həmin məqalə şairin rübailərinin
ikinci nəşrinə daxil edilməmişdir.
Oxucularımızın Xəyyam haqqında, rübailərinin məzmunu və ideya
istiqaməti barədə düzgün, dolğun təsəvvür əldə etməsi üçün son dərəcə fay-
dalı olacağını nəzərə alaraq onu şairin latın qrafikası ilə çap olunan bu ki-
tabına əlavə etməyi zəruri saydıq.
İnanırıq ki, gözəl şairimiz Mir Mehdi Seyidzadənin böyük
məhəbbətlə və ustalıqla, sadə və rəvan bir dildə doğma
dilimizə çevirdiyi
bu rübailər Xəyyamsevərlər və gənc oxucularımız tərəfindən sevinclə qarşı-
lanacaq və sevilə-sevilə oxunacaqdır.
Əlibala Hacızadə
16.03.2004.
Bakı
4
ÖMƏR XƏYYAM
Dünyanın mədəni xalqları arasında şöhrət tapan klassik şairlərdən
biri də XI əsr filosof şairi Ömər Xəyyamdır.
Ömər Xəyyamın həyatı haqqında əlimizdə müfəssəl məlumat
yoxdur. Ondan bəhs edən şərq təzkirəçiləri şairin həyatı haqqında demək
olar ki, heç şey deməmişdir. Xəyyam yaradıcılığını tədqiq edən Şərq və
Avropa alimlərinin əsərlərində də bu məsələ son dərəcə səthi
işıqlandırılmışdır. Hələlik, mənbələrdə bu böyük şair haqqında aşağıdakı
məlumat verilməkdədir:
Xəyyam ( bəzən də Xəyyami) təxəllüsü ilə bütün dünyada şöhrət
tapan, hikmətli rübai ustadının adı Ömər, atasının adı İbrahimdir. O, 1040-
cı ildə Xorasan əyalətinin Nişabur adlanan mahalında bir çadırçı ailəsində
anadan olmuşdur. Xəyyam təxəllüsü də atasının sənətindən alınmışdır.
Ömər Xəyyam ibtidai təhsilini vətəni olan Nişaburda alaraq, öz dövrünün
əsas elm sahələrinə yiyələnmişdir. O, xüsusilə hikmət, nicum, riyaziyyat,
kimya və tibb elmləri üzrə çalışaraq, sonralar bu elmlər sahəsində kəşflər
belə etmişdir. Buna görə də Xəyyamın məşhur münəccim və riyaziyyatçı
kimi də adı çəkilməkdədir. O, poeziyaya meyl etmiş, misli görünməmiş
dərin mənalı rübailər yazmışdır. Xəyyamın ara-sıra yazdığı bu rübailər
sonralar ona böyük şöhrət qazandırmış və onu dünya şairləri cərgəsinə daxil
etmişdir. Bu rübailər Xəyyamın yaradıcılığında miqdarca çox cüzi bir yer
tutsa da, məzmunca olduqca mühüm fəlsəfi fikirlər ifadə etdiyindən daima
diqqət mərkəzində olmuşdur.
Ömər Xəyyam, Məlikşah Səlcuqinin vəziri dərəcəsinə yüksələn,
məşhur «Siyasətnamə» əsərinin müəllifi Nizamülmülklə, sonralar ismaililər
firqəsinin başçısı olub, Səlcuq hökmdarlarını qorxu altında saxlayan Həsən
Sabbahla bir məktəb yoldaşı olmuşdur. Lakin Xəyyam heç bir şöhrət və
mənsəb sahibi olmağa çalışmamış, bütün ömrünü elmə, fəlsəfəyə və
poeziyaya sərf etmişdir. Xəyyam Yaxın Şərqin bir çox məşhur şəhərlərini
gəzmiş və dövrünün adlı-sanlı alimləri ilə tanış olaraq, yeri gəldikcə,
onlarla elmi, ədəbi mübahisələr etmişdir. Ömər Xəyyam orta əsr feodalizmi
şəraitində çox dəb olan məddah saray şairləri cərgəsinə daxil olmaq
istəməmişdir. Əksinə, o, azadlığı, mərdliyi hər şeydən üstün tutaraq
yaşamış, ancaq Məlikşahın rəsmi xahişi ilə özünün məşhur «Cəlali
təqvimini» (Nicum cədvəlini) yaratmışdır. Bu təqvim bir çox cəhətdən hələ
bu gün də öz elmi əhəmiyyətini itirməmişdir.
Xəyyam 1123-cü ildə vətəni Nişaburda vəfat etmişdir.
* * *