YUXU
Bu gecə
Kəndimizə getmişdim
Yuxumun qanadlarında...
Bu gecə
Xoşbəxt idim
Fikrimin inadlarında...
Bu gecə
Kəndimizə getmişdim
Babaları,
Nənələri,
Qohum-əqrəbanı yoxlamağa.
Atamın-anamın
Küskün qəbri üstə uzanıb,
Hönkür- hönkür ağlamağa.
Bu gecə ağlayırdım,
Ağlaya- ağlaya
Necə də xoşbəxt idim.
Nə zamandı gəzmədiyim
Yerləri gördüm.
Ayrılıqdanmı ağlayırdım?
Sevincdənmi?
Bilmirəm!
Daşımı,
Qayanımı ağlayırdım?
Göyçə adlı
Dəryanımı ağlayırdım?
Ağlayırdım
Kəndimizdə qalanlarımı?
Bir vaxt toyumu edib,
Laylamı çalanlarımı?
Kim mənə nə eləyib?
Bilmirəm?
Kim başıma kül ələyib?
Bilmirəm!
Bəs nə vaxt biləcəyəm?
Axır zaman olandamı?
Dünyanı su alandamı?
Bu gecə
Kəndimizə getmişdim.
Yuxumun dumanıda
Öz qapı itimizi
Həyətimizdə gördüm.
Gözlərində yaş
Hürə-hürə üstümə gəldi,
Birə min artdı dərdim.
Yenə də həyətimizi,
Qapı-bacamızı gözləyir!
Bizə tərəf gələn
Qadanı-balanı izləyir!
Ay allah,
Bir tikə kütün
Qədrini bilən
Bu itin sədaqətinə bax!
İtin etibarına,
İtin məhəbbətinə bax!
1988.
VƏTƏNDƏN SÖZ AÇMAQ ÇƏTİN
Vətən, millət, dil!
Cəlil Məmmədquluzadə.
Vətəndən söz açıb, danışmaq çətin,
Vətənin sevgisi, dərdi böyükdür.
Hardasa, kimləsə barışmaq çətin,
Vətən ki, beləcə bölük-bölükdür.
Vətən sürüdürmü, qoyun sürüsü,
Quldurlar dağıdıb, çəkib apara?!
Vətən dəridimi, qoyun dərisi,
Hər qurd ağız atıb çəngə qopara?!
Kimsə öz gərəkli işinə görə,
Kimsə bir "malades" alıb dinməyib!
Üzünü bir yana çevirib hərə,
O biri çarəsiz qalıb dinməyib!
Dinməmək fağırlıq, bəlkə də ölüm,
Haqqını deyərkən ölmək səadət!
"Vətən" kəlməsində susubdu dilim,
Özümdən özümə böyük xəyanət...
"Vətən" deməyən dil,"Millət" deyərmi?
"Millət" deməyən dil"Dilim" də deməz!
Duyğusuz bir ürək "qeyrət" deyərmi?
Qeyrətsiz bir vicdan "elim" də deməz!
Qorxular nə imiş bir vaxt, bir vədə,
Bunlar həqiqətmi? Yuxumu görən?
Dilində danışmaq törəyən hədə,
Dilində ağlamaq qorxumu görən?!
Sevdim millətimi, sevdim dilimi,
Sevdim sevə bilim bütün dilləri!
Mən sevə bilməsəm doğma elimi,
Sevə bilərdimmi qardaş elləri?!
Bir dahi göstərir Vətən eşqimi:
"Özüldu bir yurda: Vətən, millət, dil!
"Ömrün son ucuna yetənə kimi,
Bunları unudan vətəndaş deyil!
10.02. 88.
ANAMI AXTARIRAM
Könlüm intizardadı,
Gözlərim yollardadı.
Görən anam hardadı?
Anamı axtarıram!
Günəş nurun yaxanda,
Eyvanıma axanda...
Mən otaqdan çıxanda
Anamı axtarıram!Ü
stümdən yel əsəndə,
Soyuq məni kəsəndə...
Bacılarım küsəndə
Anamı axtarıram!
Ağlayanda, güləndə,
Göz yaşımı siləndə...
Axşam evə gələndə
Anamı axtarıram!
Bu dağların qaşında,
Baharında, qışında...
Bulaqların başında
Anamı axtarıram!
Kədərlər tufanında,
Həsrətlər ümmanında...
Atamın hicranında
Anamı axtarıram!
Ömrümün hər anında,
Ürəyimin qanında...
Anaların yanında
Anamı axtarıram!
23.11.76.
ŞAİR
Çiçəkdən danışıb, bağdan deməsin,
Könlündə baharı olmayan şair.
Qayadan söz açıb, dağdan deməsin,
Özünün vüqarı olmayan şair.
Hər saxta alqışa gərək dözməsin,
Təpədən keçməmiş zirvə gəzməsin.
Söyüdə, qovağa dodaq büzməsin,
Palıdı, çinarı olmayan şair.
Döşündə döyünsün bir təmiz ürək,
Pisə qənim olsun, yazığa kömək.
Özgə süfrəsindən yazmasın gərək
Evində naharı olmayan şair.
Elə gəlib keçsin izi itməsin,
Səsi- sözü qulaqlardan getməsin.
Əhdə xilafları danlaq etməsin
Məsləki, ilqarı olmayan şair.
Eldar, sənin sözün qəzəb yatırar,
Nanəcib hər addım hiddət artırar.
Düzlükdən danışsa ad- san batırar
Düzlükdə uyğarı olmayan şair.
30.09.1984.
YORULDUM DAHA
Yenə nə haydasan, ağıllı ağlım,
Sənə söz deməkdən yoruldum daha.
Səbrli ol, -dedin hirsimi boğdum,
Haqqı gizləməkdən yoruldum daha.
Varmı mənim kimi öz həsrətində,
Haçandı qalmışam düz həsrətində.
Haqqımda insaflı söz həsrətində
Qəzet izləməkdən yoruldum daha.
Yolumda daş-kəsək, başımda duman,
Bu mərəz nə mərəz, güman nə güman.
Dodağımda gülüş, içimdə tufan,
Astar üzləməkdən yoruldum daha.
Taledənmi qismət bəxtimə kədər?
Ümidim aldanış, sevincim zəhər.
Tablayım nə qədər, dözüm nə qədər?
Dərdi düzləməkdən yoruldum daha.
Əgər bu qərarlar baş tutsa, Eldar,
İlk oxu o sənin sinənə vurar.
Axşamlar bir qərar, sabah bir qərar,
Qərar gözləməkdən yoruldum daha.
5.10.90.
HEÇ NƏYİMİZ YOXDUR
Hər şeyimiz var,
Heç nəyimiz yoxdur.
Dostları ilə paylaş: |