- 114 -
NAXÇIVAN DÖVLƏT UNİVERSİTETİ.
ELMİ ƏSƏRLƏR, 2018, № 1 (90)
NAKHCHIVAN STATE UNIVERSITY.
SCIENTIFIC WORKS, 2018, № 1 (90)
НАХЧЫВАНСКИЙ ГОСУДАРСТВЕННЫЙ УНИВЕРСИТЕТ.
НАУЧНЫЕ ТРУДЫ, 2018, № 1 (90)
SƏYYARƏ SADIXOVA
GÜNAY HƏSƏNOVA
Naxçıvan Dövlət Universiteti
seyyare.sadiqova@mail.ru
UOT:7.04
AZƏRBAYCANIN MÜXTƏLİF SƏNƏT NÜMUNƏLƏRİNİN DEKOR
SİSTEMİNDƏ BƏZİ HƏNDƏSİ ORNAMENTLƏRİN YARADILMA
PRİNSİPLƏRİ VƏ MƏNASI
Açar sözlər: ornament, xalça sənəti, dekorativ-tətbiqi sənət, naxış motivi, haşiyə, şəbəkə
Key words: ornament, carpet art, decorative-apllied art, pattern motif, edge, chain
Ключевые слова: орнамент, ковровое искусство, декоративно-прикладное
искусство, узорный мотив, каёмка, шебеке
Ornament- uzaq keçmişdə özündə simvolik və sehirli məna, əlamət, semantik funksiya
daşımaqla insanın təsviri fəaliyyətinin ən qədim növlərindən biridir.
Ornament tarixin mərhələlərini,
əsrin simasını əks etdirmək funksiyasını daha qabarıq yerinə yetirdiyinə görə onun daşıdığı əsas
informasiya funksiyasını nəzərə alaraq ona “dövrün dəsti-xətti” adı verilmişdir (1, s.5).
Tarixdə ornament təsviri formalarla paralel olaraq inkişaf etmiş və ayrı-ayrı dövrlərdə məna
daşıyıcısı rolunu oynamaqla qısa, aydın informasiya sisteminə çevrilərək cəmiyyətin dini, sosial,
fəlsəfi dünyagörüşünü əks etdirmişdir. Ornament yarandığı gündən təyinatından asılı olaraq qrafik
təsvirli, heykəlvari, həndəsi, nəbati, zoomorf, antropomorf, epiqrafik ornamentlər, stilizə edilmiş
motivlər kimi məişətimizə daxil olmuşdur. Qədim insan dünyanın quruluşu haqqında öz
təsəvvürlərini müəyyən işarələrlə verirdi. Məsələn dairə-günəş, kvadrat-əkin sahəsi, übucaq-dağlar,
svastika-günəşin
hərəkəti, yaxud
dörd ünsür, spiral-inkişaf, hərəkət və s.
Azərbaycan xalqının tarix boyu yaratdığı maddi-mədəniyyət nümunələrini bəzəyən
ornament sənəti özünəməxsus anlamlar ifadə edərək günümüzə qədər gəlib çatmışdır. Bu
ornamentlər sırasında həndəsi naxışlar olan üçbucaq və dördbucaqlı naxışlar təsviri və tətbiqi
sənətimizdə geniş istifadə olunmuşdur. Bu sahələrdən ən əhəmiyyətlisi olan milli xalçalarımızda da
həmin naxışlara tez-tez rast gəlinir.
Xalça sənətimizdə bəzək naxışlarının bir hissəsini “üçbucaq” formalı ornamentlər təşkil edir.
Azərbaycan xalçalarında “üçbucaq” motivləri daha çox haşiyələrdə və ya ara sahənin doldurucu,
köməkçi naxışları kimi yerləşdirilir.
Üçbucaq- əsasən parça bəzəklərində və mozaik döşəmə bəzəklərində motiv kimi tətbiq
olunur. Düzbucaqlı və kvadrat isə əməli olaraq motivlərlə doldurulacaq sahənin sərhəddini
göstərmək üçün istifadə edilir.
Üçbucaqlar Azərbaycanda, həmçinin, bütün şərq aləmində daha geniş yayılmış ornamental
motivlərdən biridir. Bu naxışlar Azərbaycan dekorativ tətbiqi sənətinin bütün sahələrində olduğu
kimi, xalça sənətində də həm aparıcı, həm də doldurucu, köməkçi naxış elementi kimi çıxış edir.
Üçbucaq naxışları daha çox xalçaların “mədaxil”, “cağ” haşiyə zolaqlarında müşahidə edilir. Bu
tipli naxışlar kontrastlı rənglərdə verilərək haşiyə tipli zolaqlarda yan-yana, baş-başa, iç-içə formalı
kompozisiyalarda yerləşdirilir.
Dekorativ-tətbiqi sənətdə geniş istifadə olunan “üçbucaq” naxışının yaranması neolit-eneolit
dövrünə təsadüf edir. Elə bu dövrdən də üçbucaqların müxtəlif variantları dekorativ-tətbiqi sənətin
bir çox növlərində tətbiq olunur. Həmin dövrə aid bir keramik qab diqqəti cəlb edir. Arxeoloji
qazıntılar zamanı Cənubi Azərbaycanın İsmayılabad yaşayış məntəqəsi yaxınlığından tapılmış bu
qab e.ə. V minilliyə aiddir. Ağız hissəsi geniş və qısa lüləkli camvari formaya malik olan keramik
- 115 -
qabın üzərində baş-başa birləşmiş üçbucaqlar təsvir olunmuşdur. Qırmızı anqobla üzəri örtülmüş bu
qabın üzərindəki naxışlar qəhvəyi rəngdədir.
Tunc dövrünün dekorativ-tətbiqi sənətində üçbucaq formalarının özünəməxsus yeri
olmuşdur. Bu dövrdə üçbucaqlar dekorativ bəzək kimi təsvir olunmaqla yanaşı onlar həm də
həndəsi formalı dəliklər şəklində da çıxış etmişlər. Bu cür dəlikli üçbucaq dekoruna Gədəbəydə
Çovdar ərazisindən tapılmış bürüncdən quş fiqurunun üzərində rast gəlinir (3, s.11).
Arxeoloji qazıntılar zamanı Həftəvan-təpədən tapılmış tunc dövrünə aid gildən hazırlanmış
bir qab da xüsusi maraq doğurur. Bu rəngli saxsı qabın üzərindəki üçbucaqlar müxtəlif rənglər
vasitəsilə iç-içə, kənarları haşiyələnmiş, içərisi rombların şəbəkəvari düzülüşü ilə doldurulmuş və s.
variantlarda təsvir olunmuşdur.
Üçbucaq naxışları qədim dövrün tətbiqi sənət nümunələrində də izlənilir. Cənubi
Azərbaycanda Həsənli təpəsindən tapılmış dar boğazlı küpəni, Mingəçevirdən tapılmış iki dəstəkli,
dar boğazlı küpəni və s. buna gözəl nümunədir. Bu tipli naxışlara arxeoloji qazıntılar zamanı
aşkarlanmış dəmir dövrünə aid məişət əşyalarının və müxtəlif quş, heyvan fiqurlarının üzərində də
rast gəlinir. Həmin dövrə aid Mingəçevirdən tapılmış nimçə formalı gil qabı, Gəncəçaydan,
Xaçınçaydan tapılmış saxsı qabları və s. nümunə göstərmək olar.
Üçbucaq formalı ornamentlərin geniş şəkildə tətbiqi Alban mədəniyyətində, eləcə də, İslam
dövrünün dekorativ-tətbiqi sənətində də müşahidə olunur. Buna XII əsrə aid olan bürünc çırağın
üzərində (2, s.26), Şah İsmayılın babası Şeyx Cüneydin məzarüstü sənduqəsinin üzərində (XVI əsr
Qusar rayonu, Həzrə kəndi) (3, s.97), XVIII-XIX əsrlər abidəsi olan Gəncə şəhərindəki Göy İmam
türbəsinin günbəzi üzərində olan üçbucaq naxışlarını nümunə göstərə bilərik.
Üçbucaq formalı motivlər Qazax xalça məktəbinin “Öysüzlü”, “Dağkəsəmən”, “Borçalı”,
Bakının “Suraxanı”, Şirvanın “Bico” və s. xalçaların ayrılmaz bəzək elementləridir.
Yaranması neolit-eneolit dövrünə təsadüf edən üçbucaq naxışların mənşəyi təbiətlə, daha
dəqiq desək dağlarla bağlıdır. Əcdadlarımız zəngin landşaft formalarına malik Azərbaycan
dağlarının təbii sərhədlər rolunu oynadığını dərk edərək öz dekorativ kompozisiyalarında da sərhəd
funksiyasını yerinə yetirən mədaxil kompozisiyalarını yaratmışlar. Bu ornamenti müxtəlif
variantlarda (“üçbucaq”ların içərisində nöqtələr, xətlər, romblar, düzbucaqlar, dairələr, yaxud
əksinə, baş-başa, üz-üzə, tünd və açıq rəngli, kənarları haşiyələnmiş və s.) təsvir etməklə isə ona
çoxlu semantik mənasına görə dağları, sərhəddi, bədxah ruhlardan qorunmağı, bolluğu, bərəkəti,
şumlanmış və toxum səpilmiş torpağı, birliyi, yaranışı-həyatı-ölümü, həyatı-ölümü-yeni həyatı, ata-
ana-uşağı, ilahiliyi-bəşəriyyəti, göy qübbəsini-səmaviliyi-dünyəviliyi, mənəviyyatı-cismaniliyi,
odu-suyu və s. semantik mənaları ifadə edirlər.
Üçbucağın sərhəd semantikası ilə bərabər sakral mənası müqəddəs üçlük, vəhdət ideyasını
da ifadə edir. Ornament sənətində özünəməxsusluğu ilə seçilən naxış motivlərindən biri də
dördbucaqlılardır. Dekorativ sənətin bütün sahələrində geniş tətbiq olunan bu naxışa
xalça sənətində
də tez-tez rast gəlinir. Azərbaycanın xovlu və xovsuz xalçalarında əsas, aparıcı, köməkçi, doldurucu
naxış motivi olan
bu element həm ara sahədə, həm də haşiyə zolaqlarında yerləşdirilir.
Hazırda dekorativ bəzək formasını və semantikasını saxlayan bu cür naxışların ilk
nümunələrinə tunc dövrünün keramikasında təsadüf olunur. Arxeoloji qazıntılar zamanı Həftəvan-
təpədən tapılmış tunc dövrünə aid rəngli gil qabların üzərindəki bu naxış rənglərin vasitəsilə təsvir
olunmuşdur. Qablar üzərindəki bu cür naxışlar ağ-qara rənglərin şahmat prinsipi ilə yerləşdirilməsi
nəticəsində əmələ gəlmişdir.
Təpə-Siyalkdan tapılmış e.ə. IX əsrə aid çaydan formalı gil qabın üzərindəki dördbucaqlı
ornament xüsusi prinsiplə iç-içə yerləşdirilmişdir (6, s.16). Xanlarda 1/1 №-li kurqandan tapılmış
dəmir dövrünə aid olan ağzı geniş olan saxsı qabın üzərində də bu cür naxış təsvirinə rast gəlinir (5).
Bu tipli ornamentlərə Qazax rayonunun Qazaxbəyli kəndi yaxınlığında aşkar olunmuş daş
kitabələri də nümunə göstərmək olar. Bu daş kitabələr üzərindəki oyma işləməli dördbucaqlı
naxışların içərisində düz xətlər və sıra ilə düzülmüş nöqtələr təsvir olunmuşdur.
Dördbucaqlı naxış elementlərinə Alban mədəniyyəti dövründə də rast gəlinir.
Mingəçevirdən aşkar edilmiş şüşə piyalə bu qəbildəndir. Bu piyalə üzərindəki naxışlar şəbəkə
formalı, bir-birinə birləşmiş şəkildə təsvir olunur.
İslam dövrünün dekorativ sənətində dördbucaqlı naxışlara memarlıq abidələrində, bədii
metal, bədii tikmə və s. məmulatlarda təsadüf olunur. Ərdəbildə XVI-XVII yüzilliklərə aid Şeyx
Səfi türbəsi (3, s.96), 1456-cı ildə Təbrizdə tikilmiş Göy Məscidin kaşı bəzəkləri bu naxışlarla tərtib