general Şıxlinskinin, istərsə də Qambay və Cabirin hərbi mövzuda yazılarını
acgözlüklə mütaliə edərdik.
General
Qambay Vəzirov, Cəmşidxan Naxçıvanski, komissar Hüseyn
Rəhmanov və Heyder Vəzirov hərb elmində həm də hərbi nəzəriyyəçi kimi
yetişmişlər, Qambay rus dilində olan hərbi ədəbiyyatları, nizamnamələri
Azərbaycan dilinə tərcümə etmişdi. Milli diviziya və birləşmələr haqqında həm
publisistik, həm də elmi məqalələrlə “Qızıl əsgər”, “Hərbi bilik”, “Kommunist” və
“Bakinski raboçi” kimi mətbuat orqanlarında müntəzəm olaraq çıxış etmişdir.
1920-ci ildən həyat və fəaliyyətini xalqının müdafiə qüdrətinin
möhkəmlənməsinə həsr edən Qambay Vəzirov respublikanın ictimai-siyasi işində
də fəal iştirak etmişdir. Dəfələrlə Respublika Mərkəzi
Komitəsinin tərkibinə
seçilən Qambay Vəzirov Zaqafqaziya MİK-in və SSRİ Mərkəzi İcraiyyə
Komitəsinə də üzv seçilmişdir.
* * *
Təəssüf ki, belə şöhrətli sərkərdəmiz unudulmuş, yaddan çıxmışdır. Bir-iki
dəfə anadan olma günü yetmişinci illərdə qəzetlərdə qeyd olunmuşdur. Acınacaqlı
haldır ki, Qambay haqqında yazılan quru, ürəksiz və partiyalı olan bu məqalələrin
müəllifi milliyyətcə erməni olmuşdur. Bu gün onun adı bircə ünvanda
əbədiləşmişdir: Naxçıvandakı 6 saylı orta məktəb Qambay Vəzirovun adını daşıyır.
1989-cu ilin fevralında igid komandir Qambay Vəzirov haqqında “Hünər”
televiziya verilişinin səhifələrində söhbət açdıqdan sonra xeyli məktub aldıq. Hətta
vaxtilə İzzət xanım Qiyasbəyli - Vəzirovanın qonşusu olmuş Zahidə Mustafayeva
redaksiyamıza gəlib Vəzirovlar ailəsinin faciəsindən təsirli epizodlar danışdı.
Redaksiyamıza gələn çoxsaylı məktublardan biri daha təsirli olduğu üçün onun
qısa məzmunu ilə oxucuları da tanış etmək istərdim.
Məktubu vaxtilə igid
sərkərdənin əsgəri olmuş, indi elimizdə, obamızda yaxşı tanınan ağsaqqal aşıq
Barat Şirvanlı göndərib. O yazır: “Yanvarın on dördündə olan verilişinizə də
baxdım. (Tamaşaçıların xahişi ilə Q.Vəzirov haqqında üç veriliş verdik). Həm
kədərləndim, həm də sevindim. Sevindim ona görə ki, mənim əziz komandirimi
əlli ildən sonra da olsa efirdə görə bildim. Kədərləndim ona görə ki, o illəri
xatırladım. Bu ahıl vaxtımda göz yaşlarımı saxlaya bilmədim. Verilişdən sonra
bütün varlığım titrəyirdi. Sizə məktubu da əlim əsə-əsə yazıram.
1937-ci ildə Salyan kazarmasında hərbi xidmətdə idim. Əvvəlcə mən kapitan
Şahtaxtinskinin yavəri oldum. Diviziya komandirimiz Qambay Vəzirov idi.
Vəzirovun Çovğun adlı bir atı vardı, ona da mən baxırdım. Bu yaraşıqlı at
sanki dil
bilirdi. Onu elə öyrətmişdim ki, hər səhər yəhərləyib-yüyənləyəndən sonra bircə
dəfə yüngülvari təpinib deyərdim: get, komandiri gətir. Yüyəni yəhərə bənd
olunmuş Çovğun at Salyan qazarmasından birbaşa Qambay Vəzirovun yaşadığı
Nizami küçəsindəki mənzilinə gələrdi. Həyətdə iki-üç dəfə kişnəməyi ilə gəlişini
sahibinə bildirərdi. Hər səhər əziz komandirimiz Qambay Vəzirovu Çovğun at
beləcə işə gətirərdi. Bir dəfə də olsun Çovğun nə yolunu azdı, nə də yüyənini,
yəhərini itirdi.
Bir gün siyasi məşğələ keçirdik.
Xəbər gəldi ki, komandirimiz Qambay
Vəzirovu həbs ediblər. Səhərisi Çovğunun yəhərlənmək vaxtı gələndə
kişnərtisindən dayanmaq olmurdu, o dartınır, yerində oyur-oyur oynayırdı. Yerə-
göyə sığışmayan Çovğunu göz yaşımla yəhərləyib, həmişəki kimi yüyənini
yəhərinə bənd eləyib buraxdım. İzlədim ki, görüm hara gedəcək. Çovğun at yenə
birbaşa
Nizami küçəsinə, komandirimizin həyətinə getdi. Dalınca gəlib gördüm ki,
başıaşağı sakitcə dayanan Çovğun at burnu uzunu göz yaşı tökür. Özümü saxlaya
bilməyib məndə zülüm-zülüm ağladım. Zorla onu darta-darta kazarmaya gətirdim.
Heç kəsi minməyə yaxın qoymurdu. Kişnəyib şahə qalxan at Salyan kazarmasının
həyətini başına götürmüşdü. Qərargah binasına yaxınlaşır, tükürpədici səslə bir-iki
ağız kişnəyib, götürülürdü klub tərəfə, məşq meydanına, həyətdə fır-fır fırlanırdı.
Sanki dilə gəlib “hanı mənim sahibim?” - deyə nalə çəkirdi.
Heç kəs Çovğun ata
baxa bilmirdi. Hamı qulağını tutub içəriyə qaçırdı. Bir həftəyə yaxın heç nə
yeməyib, nalə çəkən Çovğun çərləyib öldü.
Bax, bu hadisə oldu, məni sizin verilişdən sonra zülüm-zülüm ağladan...
KOMİSSAR HEYDƏR VƏZİROV
Zülmət gecələrin birində “Çornı voron” maşını komissar Heydər Sadıq oğlu
Vəzirovun həyətində dayandı. Maşından düşən üç kölgənin biri çöldə qapı ağzında
dayanıb, ikisi sürətlə ikinci mərtəbəyə qalxdı. Evi ələk-vələk elədilər, qorxudan
titrəşən körpələrə məhəl qoymadılar. Şəkilləri, əlyazma və sənədləri yığışdırıb
kəndirlə bağladılar. Gicgahları yenicə ağarmış kişi meşin qovluğu açıb həbs
orderini stolun üstünə qoydu, naqanın lüləsini onun son səhifəsinə dirəyib “burdan
qol çək” - dedi. Komissar Heydər Vəzirov bir kəlmə danışmadan qol çəkdi.
Bilirdi
ki, danışmağın, müdafiə olunmağın xeyri yoxdur. “Əmioğlu Qambayı apardılar,
ailəsini həbs etdilər. Naxçıvandakı uzaq-yaxın qohumları da apardılar... İndi də
növbə mənimdir”. O, şinelini geyindi. Əvvəlcə dörd yaşlı qızı Elmiranı öpdü. Uşaq
tir-tir titrəyirdi, boynuna sarılıb boğula-boğula ağladı. Onu zorla özündən qoparıb,
anası Leylaya verdi. Öz adını qoyduğu böyük oğlu Heydərin alnından öpüb
astadan “anandan, bacından muğayat ol. Yaxşı, ayıbdı, sən axı kişisən” - deyib,
özü də doluxsundu.
Qambayın əmisi oğlu komissar Heydəri beləcə sorğusuz-sualsız apardılar.
Köpək leşə dadanan kimi onlar da harda xalqımızın yaxşı oğulları, adlı-sanlı
nəsilləri vardısa, onlara hücuma keçib “təmizləmə” aparırdılar. Beləcə, 37-ci illərin
ağır zərbəsi xalqımızın milli tarixinə, bütun sahələrdə - ədəbiyyat, incəsənət, kənd
təsərrüfatı, sənaye və ən başlıcası hərb tariximizə çox dəhşətli zərbələr vurdu. Hər
gecə bir komissar,
hər gecə yüksək rütbəli zabit, hərbi komisar gedər-gəlməzə
göndərilirdi. Əgər o illərin haqsız qırğınları olmasaydı, indi neçə-neçə general,
admiral oğullarımızın şan-şöhrəti ilə fəxr edərdik. Stalin, Beriya və Bağırov
vəhşiliklərinin ehtirasının qurbanı olan zabitlərimiz günahsız olaraq həbs edilib
Sibirin, Qazaxıstanın həyat nişanəsi olmayan qarlı çöllərində, dar və havasız, bir
nəfərlik kameralarda üstünə min cür yalan, şər atılmaqla məhkəməsiz və qanunsuz
güllələndilər.