____________Milli Kitabxana____________
342
həmçinin. Belə görüşlərdə və söhbətlərdə M.Əzizbəyov onların
mövqelərini və mühakimələrini
marksist dünyagörüşü, bolşevik
prinsipiallığı baxımında rədd etsə də, oxucunun şüurunda artıq
“başqa cür düşünmək” istiqamətində cığırlar açılır.
Budur, Muxtarovla Əzizbəyovun söhbətindən bir parça.
Muxtarov deyir:
“ – Bakının bu dəqiqə əsl sahibi kimdir? Mantaşev,
Nobel!.. Bunu siz də bilirsiniz ki, dədə-baba torpağımızdan
çıxan qızıl onların xəzinəsinə axır. Amma müsəlman milləti
boğulur. Axı biz də istəyirik ki, bu bədbəxt millət qəflət
yuxusundan oyanıb, adam cərgəsinə qarışsın: oxusun,
injener, doktor olsun, daha ömrünü dartayçılıqda çürütməsin.
Ancaq sən başlamısan ki, gərək əmimin xirtdəyindən yapışıb
canını alam. Daha orasını fikirləşmirsən ki, aclığa, susuzluğa
bais o deyil. Niyə Hacı mədənləri buraxıb fabrik açdı? Çünki
tuzlar onu vurub cərgədən çıxartdılar. Qoymadılar kişi
istədiyi qədər dövlətlənə, məktəb aça, teatr tikə, millətinə gün
ağlaya...
– Cənab Muxtarov, – Əzizbəyov nəzakətlə müsahibinin
sözünü kəsdi. – Hacı məktəb də açıb, oğlanları, qızları
oxutmağa da az pul sərf eləmir.
____________Milli Kitabxana____________
343
– Atan oldu rəhmətlik. O məktəbdən birini yox, beşini
açsaydı günah olardı?” (48, 260).
Bu deyilənlər həqiqət deyildimi? Mantaşevlər, nobellər
Azərbaycanın sərvətlərindən daha çox faydalanmırdılarmı?
Muxtarov niyə də milli insan kimi qəbul edilməsin?
M.Əzizbəyovun sinfilik anlayışında düşüncələri niyə də öz
zəhmətləri və bacarıqları sayəsində varidat sahibi olan Hacı
Zeynalabdinin və Murtuza Muxtarovun millət haqqında
düşüncələrini üstələməlidir?
M.Əzizbəyovla söhbətində Muxtarovun aşağıdakı sözləri
də diqqəti çəkir:
“ – ...Siz güclü olmağına güclüsünüz, amma heyf, səd
heyf ki, bu gücdən sənin millətinə xeyir əvəzinə ziyan dəyir.
Əzizbəyov elə bil tamam biganə və etinasız bir tərzdə
soruşdu:
– Necə ziyan?
– Bəli, bəli, ziyan dəyir. Siz lap nahaq yerə millətin
arasına ikitirəlik salırsınız. Qaşınmayan yerdən qan
çıxardırsınız. Bəs bundan da böyük ziyan olar? Əgər millətdə
birlik olsaydı, əgər sən də, Nərimanov da rusdan, ermənidən
ümid gözləməsəydiniz, oturub-durub müsəlman
qardaşlarımızın kölgəsini qılınclamasaydınız, o vaxt bizim də
____________Milli Kitabxana____________
344
millətimiz ağ günə çıxardı. Neyləyəsən ki, qoşulmusunuz
kafirlərə, bizə bir yumruq o vuranda, siz ikisini vurursunuz”
(48, 261-262).
Belə epizodları axıra qədər izləyirsən və Muxtarovun
millilik mövqeyinə qarşı Əzizbəyovun bolşevik yozumu
qoyulsa da, bu, inandırıcı və əsaslı görünmür.
1952-ci ildə çap olunan “Səhər” romanında
belə məqamlar
bir daha Mehdi Hüseyn yaradıcılığının 1930-1955-ci illər
mərhələsinə birmənalı yanaşmamaq üçün əsas verir.
Yuxarıda təhlilə cəlb etdiyimiz əsərlərlə yanaşı, haqqında
bəhs etdiyimiz dövrün digər romanlarında da milli-mənəvi
ideallarla bağlı müəyyən məqamları görmək mümkündür.
Məsələn, inqilabi hərəkatın “təşəkkülü”nü tərənnüm edən
“Araz” romanında (A.Şaiq) müəllif imperiyanın Azərbaycan
xalqına münasibətini belə ifadə edir:
“Çar hökumətinə yalnız Azərbaycan nefti lazım idi... Üzdə
özünü dost kimi göstərən çar hökuməti gizlində xalqın
kökünü qazıyırdı...Çar hökuməti bir zaman bütün Azərbaycan
xalqını Sibirə köçürüb yerinə rus mühacirlərini gətirmək
istəyirdi. Bu iş baş tutmadığı üçün o indi Azərbaycan xalqını
göstərdiyimiz yollarla məhv etməyə çalışırdı” (109, 315).
____________Milli Kitabxana____________
345
Azərbaycan
xalqını
əzən
rejimin
nümayəndəsi
– həbsxana
rəisi Kok razılıqla deyir:
“ – Biz ordumuzun qalib süngüləri ilə bu dikbaş xalqların
məğrur başlarını əyib, torpağına sahib olduq. Onlar bizim
pəncəmizdən xilas olmaq üçün min çarə düşünürlər” (109,
345).
Aşağıdakı parçada isə A.Şaiq Arazın və onun kimilərin
inqilabi hərəkata qoşulmalarının, bolşevik inqilabçılığının milli
təbiətimizə zidd olduğu təsdiq etmirmi?
“...təşkilata üzv yazıldığına görə müsəlman fəhlələri və
kənd əhli onu dinsiz, “millət xaini” adlandırıb hörmətdən
salırdılar” (109, 355).
____________Milli Kitabxana____________
346
N Ə T İ C Ə
1930-1950-ci illər (1955-ci ilədək) Azərbaycan romanının
siyasi-ideoloji proseslər və milli düşüncə kontekstində tədqiqini
aşağıdakı elmi-nəzəri nəticələrlə ümumiləşdirmək olar:
1. İyirminci ildən başlayaraq sosializm diktaturası öz
“mədəni inqilab” proqramını irəli sürərək həyata keçirməyə
başladı. Bu proqrama görə sinfi-siyasi
münasibətlər ön plana
çəkilirdi. Təbii ki, çox keçmədən SSRİ-nin digər respublikaları
kimi Azərbaycan mədəniyyəti də sosialist mədəniyyətinin
tərkib hissəsinə çevrildi. Siyasi-sinfi münasibətlərin həyatda,
gerçəklikdə özünü göstərən pafosu bədii ədəbiyyatda da təzahür
etdi. Bu dövr ədəbiyyatının tarixində mürəkkəb, ziddiyyətli
məqamlar çoxdur. Aparıcı siyasi-ideoloji
təfəkkürdə elə meyllər
və prinsiplər olmuşdur ki, bunlar yaradıcılıq prosesinə,
ədəbiyyata münasibətə çox mənfi təsir göstərmişdir. Sosialist
mədəniyyəti nəzəriyyəsinin, bunun əsas metodoloji təlimi olan
sosialist realizmı konsepsiyasının bir çox elə prinsipləri, meyar
və tələbləri
var idi ki, bunlar çox vaxt bədii yaradıcılığı dar,
məhdud çərçivəyə salırdı. Bu işdə xüsusilə Sov.İKP-nin
ədəbiyyat və incəsənətə aid qərarlarının, bu qərarlarda işlənib
hazırlanmış siyasi-ideoloji təlimlərin rolu daha böyük idi.